Read Zeme Naga 1 KRONIKIL 12 Bible Online

1 KRONIKIL 12 - Zeme Naga bible

1 KRONIKIL 12

¹Kisbe na Saulbe ziegene Dabidbe pe suitew ze hela patchi lak bambe ting ge Ziklag ge pe dage wangme ze aime bau de lei; zai penui ze herei ting ge pechu ka’ngngâme ziemmena peranchime ruage bamme bau de lei.

²Penui â bai’mpi kapchime bau lei, zai bai’mpitu benai tingchu dûm paibe ge penui ba heku hezat ne tuâchime bau lei, penui â Benjamin zatme Saulbe kiduîme bau lei.

³Penui ruage dilangpeu Ahiezerbe zai Joasbe ze Gibea’mpeu Shemaabe na kena lei; zai Jezielbe benai Peletbe ze Asmabethbe na kena lei; Berakabe, Jehube, Anathoth’mpeu,

⁴Gibeon’mpeu Ishmaiabe, ziemmena hanghimreume ruage peranchipeu zai ziemmena hanghimreume peireige besuitewpeu de lei; Jeremiabe Jahazielbe, Johananbe, Gedera’mpeu Jozabadbe,

⁵Eluzaibe, Jerimothbe, Bealiabe, Shemariabe, Shephatiabe. Hariphme zat te lei.

⁶Elkanabe, Isshiabe, Azarelbe, Jo-ezerbe zai Korame zat Jashobe-ambe de lei.

⁷Gedor ge Jerohambe na kena Joelabe benai Zebadiabe de lei.

⁸Gadme zat ruagene hereitew penîmtewme ziemmena peranchime ramme penui ju du duilui ramme ju gum zai kedeiloa ramme ge rehiê gum ze pakchibe kau ramme hênamkang ge keriengdi ge Dabidbe tailam tat ti de lei.

⁹Penui pesin-perin wangkeube ge Ezerbe ne dilang de lei, pakenabe ge Obadiabe, pakechumbe ge Eliabbe,

¹⁰pamedaibe ge Mishmannabe, pamengeube ge Jeremiabe

¹¹paserukbe ge Attaibe, pasenabe ge Elielbe,

¹²padesatbe ge Johananbe, pasekuibe ge Elzabadbe,

¹³pakereube ge Jeremiabe, kereu ze kat ge Makbannaibe.

¹⁴Aime Gadme ze hereikang saibe ramme cheibime ziemmena haî kat zai dibime ze ziemmena chang kat riâ ge bam lei.

¹⁵Jordan geu kung heduidi ze naîtenaitai bambe luage raîlangbe kêu ge aime bau ze hedui ka de lei, zai tingbia benai tingrun ge peningkâm ramme ge bamme je hûtimrarip kai bei de lei.

¹⁶Dadege Benjamin benai Juda gene ziemmena hanggesame Dabidbe tailam keriengdi ’mbe zuawang de lei.

¹⁷Dabidbe penui je hedau gai ra zuapat te lei, zai penui je, “Achu ningnui kang chang ze achu ’ngngâ gai ra wang dizai â ningnui je a lung I peihuak kai gu de lei; kane a ba ge mâ de tewmaube ’ngga leusede a teureime dage achu ningnui ne kelutew ra tew dizai â anui peume Rapeu ne peize ngau lu ze ningnui je ’ngngiam be lau,” ze acheu bei lei.

¹⁸Chidadege â ziemmena hanghimreu peireige besuitewpeu, Amasaibe peireige Herui wangkeu gai de lei, zai pa ne, “Hei, Dabidbe gau, anui â ning gu ramme lei; zai Hei, Jessibe na gau, anui â ning dage lamui lei! Peize nang lungtemi lau, lungtemi lau, zai ningchu ka’ngngâme je peize lungtemi lau! Ning Rapeu ne ningchu â ’ngnga la daseu,” ze kacheu de lei. Chidadege â penui je Dabidbe kû lu nguabam gai de lei, zai pe gu hereikangme peireige tâ-muipuame hang penui je sum gai bei de lei.

¹⁹Saulbe je ’nggi ra Dabidbe Philistinme je ngua lu wangbe luage Manasseme hanggesame ne Dabidbe je put kai ’ndi de lei. (Kane Philistinme ruage besuitewme ne, “Pe pau Saulbe dage anui je sâu gai bei ta ra kiâku me lei,” acheu ze ’nning gai lu ze penui ne pechu langtua’ndibe ziegene pa (Dabidbe) penui je ’ngngâ mak lei.)

²⁰Pa Ziklag ge tatbe ge pechu putkaime Manasseme ze aime bau de lei: Adnabe, Jozabadbe, Jedia-elbe, Mikaelbe, Jozabadbe, Elihube, zai Zillethaibe, Manasse ge changme peireige penui suitewme ramme.

²¹Penui ne Dabidbe gu hereikangme peireige besuitewme chang ze Dabidbe je ’nggua ze bam de lei; penui â ziemmena peranchime gekuume, zai sipai ge kanguame ramme dadegeu.

²²Ziemmena ramme Hera gu hereikangme bau gum ze hereikang pebau dipat mak tâne patingnai’nsangne Dabidbe dage wang ze pechu ’ngngâ ze bam lei.

²³Tingwang gu sam luigum ze Saulbe gu heguangram ze Dabidbe hangge ’ngngiak kai dai ra hereikangme bau ramme Hebron ge Dabidbe dage wanggaibe riak ze airamme de lei:

²⁴Juda gene hinggei benai hengeu ramme tei lu bambe hereikangme chang seruk ze haî desat lei.

²⁵Simeonme herei ge gekuume ziemmena peranchime chang sena ze haî kat lei.

²⁶Lebime chang medai ze haî seruk lei.

²⁷Aaronbe ki ge pemuitewbepeu Jehoiadabe ne pe dage hereikang kanguabe riak chang chum ze haî sena lei.

²⁸Herei ge kuu ze peranchibepeu, rehang’mpeu Zadokbe ne pe peu ki gene sipai ge kanguame ziemmena hang’ngkai ze kena pe dage kangua lei.

²⁹Benjaminme Saulbe kiduîme ze hereikang chang chum lei, penui ruage pebau kieme ne nemai riâ Saulbe ki je tei’ndi ze lamui lei.

³⁰Ephraimme penui peume ki ge kuu ze penui ranchi ze penui ji di ze bamme chang ’ngkai ze haî desat lei.

³¹Manassebe zat pa’mpi Dabidbe je heguang hang sum gai ra tat ra chaupat’nchichiakkaime chang kereu ze desat lei.

³²Israelme tâtewrabe hang beting-pehî penui dage gechîbe bamme Issakarme penui suitewme haî na zai penui ne kereîbe kangge bamme penui kiduîme ’nteumename.

³³Zebulunme suikattew ze Dabidbe je ’ngngâ ra ting kat hangge hereikerua ramme leine tei ze kedâlume hereikangme,

³⁴Naphtalime sipai ge kanguame chang kat penui dage ziemmena hinggei benai hengeuteime ziemmena chang himreu ze sena bam lei.

³⁵Danme herei hang kedâgailume ziemmena chang ’ngkai ze desat ze haî seruk lei.

³⁶Asherme ting kat hang herei ra kedâgailume ziemmena chang hedai lei.

³⁷Jordan giam gene Reubenme, Gadme, zai Manasseme pa’mpi hereikerua leine teikuame chang haî kat ze ’ngkai lei.

³⁸Herei gu ziemmena aime leine Israelme leine peireige Dabidbe je heguang hang sum gai ra ’nning sing lu ze Hebron ge wang gai de lei; chigum ze Israelme kêdadame leine du Dabidbe je heguang hang sum gai ra suikattew kam lu bam de lei.

³⁹Penui kiduîme ne kedâzun-gaibeibe ziegene Dabidbe dage penui hezie kechum ’nnai ze teu ze sak ze bam lei.

⁴⁰Israelram ge hesuiyi lung’nta ze bambe ziegene Issakar benai Zebulun zai Naphtali riâ gechangbe penui ram name ne du hekunmerângne ramme benai put-hu ramme, zai getumsei ramme zene penui hetak ramme, ’mbeuchî, tingku, grepchî tewkanglube ramme, zai grepchî zau benai mâ-châdui ramme pungwang de lei, zai tewchat ra hangge getumsei ramme benai meli ramme du teiwang de lei.