Read Zeme Naga 1 KRONIKIL 13 Bible Online

1 KRONIKIL 13 - Zeme Naga bible

1 KRONIKIL 13

¹Dabidbe ne hereikangme chang ne chang, haî ne haî gu besuitewme, kanguame leine dage sam ka’mpau de lei.

²Zai Dabidbe ne Israelme bau leine je, “Aize ningnui dage yi lei dizai â, zai aize Tingwang anui Rapeu ’nning lei dizai â, anui puiname Israelram leine ge bamme zai penui dage tingkume benai Lebime hereubuâ yibe heram ramme ge lungme anui dage peize lungwangherua dai ra ziemmena je hesangme ram ge anui lang gai kei lei.

³Chidezai anui Rapeu gu hingdebung anui dage peize teiwang dai ra hangge zeu; chize Saulbe ting ge anui ne mâ-hang chak kai mak tai daseu,” ze kacheu de lei.

⁴Chize ’nteumena hangge yidibe luigum ze pebaume leine ne chigum ze tew ra hezuâ gai de lei.

⁵Chigum ze Dabidbe ne Kiriath-jearim gene Hera gu hingdebung teiwang ra Ijipram Shihor ge Israelme leine je Hamath keriekemui ge nguawang’ndui gai de lei.

⁶Tingwang ji pungbe Hera gu hingdebung peireige kerubme je tei’ntaugaibe ze teihang ra hangge Judame ram Kiriath-jearim kacheube Baala ’mbe Dabidbe benai Israelme leine hang di de lei.

⁷Zai penui ne Abinadabbe ki gene Hera gu hingdebung ze timriang karchibe gene pungtat te lei, zai Uzzabe benai (pe kinapeu) Ahiobe ne timriang ze kakerei de lei.

⁸Zai Dabidbe benai Israelme leine ne Hera suage penui ranchi leine ne ’nra ramme benai ’nsumkuak ramme, ’ntoîdibe ramme, zai hegeîluîkie ramme ne heleutew ze penui suiyibe tewlia de lei.

⁹Zai penui Kidon gu kechaîpung bâm ge wang dege getumsei kena tat’nsia ’ndi dadege Uzzabe hingdebung tei ra pe ba ngiêpat te lei.

¹⁰Dadege Uzzabe peireige Tingwang lumpum ze zuapat ti de lei; zai pa ne hingdebung ge pe ba ngiêpatkaibeibe ziegene pa ne pechu lak bei de lei; zai pa chige Tingwang masua gene chai gai di de lei.

¹¹Zai Tingwang ne Uzzabe je tewkeleugaibeibe ziegene Dabidbe â pe râta-desang di de lei; zai nemai riâ chipau bâm je Perez-uzza acheu ze kû la lei.

¹²Zai chipau mai ge Dabidbe â Hera je hing ze bam lei; dadege pa ne, “’Ndaigum I Hera gu hingdebung a ki lam teitatchi ra lau?” kacheu de lei.

¹³Chigum ze hingdebung ze Dabidbe ne Dabidbe gu namdi ’mbe teitat mak tai de lei, kane Gad’mpeu Obededombe ki ge pa ne lupat lu kaikua gai de lei.

¹⁴Zai Hera gu hingdebung ze Obededombe ki ge kêu chum riâ bam di de lei; zai Tingwang ne Obededombe kiduîme benai pe gu kebambe leine peireige ’nnam gai bei de lei.