Read Zeme Naga 1 KRONIKIL 14 Bible Online

1 KRONIKIL 14 - Zeme Naga bible

1 KRONIKIL 14

¹Tira heguang Hirambe ne Dabidbe dage hepâupaume je lang gai de lei, zai kedarching ramme, zai tingchu giachime zai heching tâ tewchime je pe ki hang tew ra pe dage lang gai de lei.

²Zai Dabidbe je Tingwang ne pechu Israelme peireige heguang hang sum’ntip kai de lei, zai pe gu ziemmena Israelme hang ziegene pe gu heguangram ze suang’ndi gai bei de lei be chî di de lei.

³Zai Jerusalem gene Dabidbe pe nâu hang kûsua de lei, zai Dabidbe pe na ’mpeumi ramme benai ’mpuimi ramme lungkeusua de lei.

⁴Airamme ze napoine ramme Jerusalem gene lungkeume bau ji de lei: Shammu-abe, Shobabbe, Nathanbe, Solomonbe,

⁵Ibharbe, Elishu-abe, Elpeletbe,,

⁶Nogabe, Nephegbe, Japhiabe,

⁷Elishamabe, Beeliadabe, zai Elipheletbe.

⁸Philistinme ze Israelme peireige Dabidbe je heguang hang ’nnuk kai ’ndi lei be seu lu dege, Philistinme leine Dabidbe je peuhang di de lei; chize Dabidbe seu lu dege penui tailam pat ti de lei.

⁹Zai Philistinme wang lu, Rephaim kâm gene herei ra keleuchu de lei.

¹⁰Dadege Dabidbe ne Hera dage ’nneu gai ze, “Philistinme je ’nggi ra I hang ra mei? Nang ne a ba ge penui je pei gai ra mei?” kacheu lei. Dadege Tingwang ne pechu, “Hang du lau, zai I ne penui je ning ba ge pei gai gu lei,” ze acheu bei de lei.

¹¹Dadege â Baal-perazim ’mbe pa hang di de lei, zai chige penui je Dabidbe ne duî ’ndi de lei; zai Dabidbe ne, “Hedui lûtdi wangkeube gumbe a teureime je a ba gene Tingwang ne tewkau kam ’nde lei,” kacheu de lei. Chipauziegene chipau bâm ji ze Baal-perazim ze ku lei.

¹²Zai chige penui gu hera ramme je sâu gai ’ndi de lei, zai Dabidbe ne samdie gai bei ze chiramme rû ’ndi de lei.

¹³Zai peningkâm gene Philistinme herei giê kadai de lei.

¹⁴Dadege Hera dage Dabidbe sam ’nneu gai dai dege Hera ne pechu, “Penui chai nang hang ra mak lei; tat’ngguawang lu katlam giam balsam chingbang ramme hiagene penui dage pat lau.

¹⁵Zai balsam chingbang peirei ramme gene penui wangbe kuâ seu dezai herei ra zuapat lau; Hera ne Philistinme hereikangme je lak kai ra ningnui sua ’mbe raîtat ti daseu,” ze kacheu de lei.

¹⁶Dadege Dabidbe ze Tingwang ne pechu samdiegaibeibe luigum ze tew gai de lei, zai penui ne Philistinme je Gibeon gene Gezer ’mbe kumtua gai ’ndi de lei.

¹⁷Dadege â Dabidbe ’nsâyibe rasam ze heram leine ge tat kam di de lei, zai pezat leine ne pechu hing ze bam ra Tingwang ne tew gai bei de lei.