Read Zeme Naga 1 KRONIKIL 15 Bible Online

1 KRONIKIL 15 - Zeme Naga bible

1 KRONIKIL 15

¹Dabidbe gu namdi ge Dabidbe ne pe hang heki ramme tew gai de lei; zai Hera gu hingdebung kai ra pebâm hang pa tew gai de lei, zai chipau hangge hetiampaîki gîng gai de lei.

²Chidadege â Dabidbe ne, “Tingwang gu hingdebung ze Lebime runne ne pua ze betingbeta penui ne pe guâ ’nggua ze bam ra kelânggaibe luigum ze Hera gu hingdebung ze Lebime runne ne pua dui lei,” kacheu de lei.

³Zai Tingwang gu hingdebung pa ne kedâgaibe pebâm ge teihang gai ra Dabidbe ne Israelme leine je Jerusalem ge nguawang’ndui gai de lei.

⁴Zai Dabidbe ne Aaronbe name benai Lebime je gekumwanggaime bau ze:

⁵Kohathbe name bau, ziemmena haî kat ze ’ngkai; pe kiduîme ruage Urielbe ne besuitew lei;

⁶Meraribe name bau ziemmena haî na ze ’ngkai, zai pe kiduîme ruage Asaiabe ne besuitew lei;

⁷Gershombe name bau ziemmena haî kat ze himreu; zai pe kiduîme ruage Joelbe ne besuitew lei;

⁸Eli-zaphanbe name bau ziemmena haî na; zai pe kiduîme ruage Shemaiabe ne besuitew lei;

⁹Hebronbe name bau ziemmena riakdesat; zai pe kiduîme ruage Elielbe ne besuitew lei;

¹⁰Uzzielbe name ziemmena haî kat ze kereu ze kena; zai pe kiduîme ruage Aminadabbe ne besuitew lei.

¹¹Chidadege â Dabidbe ne tingkume Zadokbe benai Abiatharbe, zai Lebime Urielbe, Asaiabe, Joelbe, Shemaiabe, Elielbe zai Amminadabbe je ku lu,

¹²pa ne penui je, “Ningnui zene Lebime gechîngme ki-kelak ramme ge bepeî changme bau de lei; Israelme Rapeu Tingwang gu hingdebung ze pebâm hang I teleugaibe ge ningnui ne teihang gai ra ningnui benai ningnui kiduîme ningnui runne ningnui je tew’nchi le du lau,

¹³keraîbe luage ningnui ne teihangmakbe ziegene anui Rapeu Tingwang ne anui je tewsâ de lei, pe sam ne tew’ntipkaibeibe luigum anui ne chize tinggeugaimakbe ziegene de lei,” ze kacheu de lei.

¹⁴Chigum ze Israelme Rapeu Tingwang gu samhatkaibebung teihang ra hangge tingkume benai Lebime penui runne penui je tewka’nchi de lei.

¹⁵Tingwang gu sam luigumbe gene Mosabe ne samdiegaibe luigum ze Lebime ne Hera gu samhatkaibebung ze penui keîtoa gene râchapua de lei.

¹⁶’Nrabung, ’ntoî zai ’nsum tei ze misuiyibe kuâ kehingbing ze tewpat kai ra kerua tei ze heleutewrame hangge Lebime ne peize penui kiduîme besuitewme je lang gai ra Dabidbe ne samdie gai de lei.

¹⁷Chigum ze Joelbe na Hemanbe je Lebime ne sum gai de lei; zai pe kiduî’mpeu Berekiabe na Asapbe je pa ne sum gai de lei; zai penui kiduîme Meraribe name, Kushaiabe na Ethanbe je sum gai de lei;

¹⁸zai penui ruage penui kiduîme pakenabe bau ze Zekariabe, Ja-azielbe, Shemiramothbe, Jehielbe, Unnibe, Eliabbe, Benaiabe, Ma-aseiabe, Mattithiabe, Eliphelehube, zai Mikneiabe zai kemuiki reîme Obededombe benai Je-ielbe lei.

¹⁹Heleutewme bau, Hemanbe, Asapbe, zai Ethanbe aime zene hetageî ne tewbe ’nsum tei ze bêurame bau de lei.

²⁰Zekariabe, Azi-elbe, Shemiramothbe, Jehielbe, Unnibe, Eliabbe, Ma-aseiabe zai Benaiabe, aime bau ne bekuâ ’nranghangdibe Alamoth luigum ze ’nrabung ramme teirame de lei.

²¹Kane Mattithiabe, Eliphelehube, Mikneiabe, Obededombe, Je-ielbe zai Azaziabe, aime bau ne bekuâ ’nnimkeudibe Sheminith luigum ze ’nrabung (Lyre) ramme teirame bau de lei.

²²Lebime ruage heleu’mmungkaibe lam ge kanguapeu, Kenaniabe ne heleu ge pa chika’mmibe ziegene chige pa ne nguagetei ra lei.

²³Berekiabe benai Elkanabe ne samhatkaibebung kaibe keriekemui kereîme chang ra lei.

²⁴Shebaniabe, Joshaphatbe, Nethanelbe, Amasaibe, Zekariabe, Benaiabe zai Eliezerbe, aime tingkume zene Hera gu samhatkaibebung masuage hegeîluîkie ’mmut ra lei. Obededombe benai Jehiabe du samhatkatbe bung kaibe keriekemui kereîme chang ra lei.

²⁵Chigum ze Tingwang gu samhatkaibebung Obededombe ki gene teihang ra hangge Dabidbe benai Israelme gechîngme zai changsenângme je kanguame penui suiyi ze tat ti de lei.

²⁶Tingwang gu samhatkaibebung puame Lebime je Hera ne nguabeibe ziegene penui ne getumsei sena zai melisei sena ne herâtew gai de lei.

²⁷Dabidbe â betachiâmbe paî, mechuatiebe kai de lei, chigum ze Lebime samhatkaibebung puame zai heleutewchime zai heleutewchime gu heleu’mmung ge kanguapeu Kenaniabe du paî ze bâ de lei; zai Dabidbe â betachiâmbe paî mechua, ephod ze kai de lei.

²⁸Chigum ze Israelme leine ne penui suiyi ’nrung ze, mâkie, hegeîluîkie, ’mmut zai ’ntoî kedibe tei ze ’nrabung ramme kebat’nchi ze Tingwang gu samhatkaibebung ze teihang de lei.

²⁹Zai Tingwang gu samhatkaibebung Dabidbe gu namdi ge wangchang dege Saulbe na Mikalle kemuicheiki gene piepelapat ze Heguang Dabidbe pe suiyi ze lim bambe ngau lu dege pe lungsui gene pechu kakerai de lei.