Read Zeme Naga 1 KRONIKIL 16 Bible Online

1 KRONIKIL 16 - Zeme Naga bible

1 KRONIKIL 16

¹Zai Hera gu hingdebung ze penui ne teigut kai lu, Dabidbe ne chize kai ra teleugaibe hetiamki lungge kai bei de lei; zai penui ne Hera masuage rûkambe-râtewbe benai desieyibe-râtewbe tew gai de lei.

²Zai rûkambe-râtewbe benai desieyibe-râtewbe Dabidbe tew kam gai lu dege Tingwang ji gene baudime je pa ne ’nnam gai lu ze,

³Israelme leine ’mpeumi ’mpuimi hangkat-kat hangge tingkuliâp kat kat, hemeikâng kat kat zai grepchî kang tingku kat kat ’nzi gai bei de lei.

⁴Chipau peireige du Tingwang Israelme Rapeu je ’ngngâ ra kû ra, misuiyibe sam salia ra, zai toa ra hang pa ne Tingwang gu hingdebung masuage tâka’ngguame hang Lebime hanggesame je tew’ntip kai de lei.

⁵Asapbe zene kedipeu de lei, zai pe sin ge bambe ze Zekariabe, Je-ielbe, Shemiramothbe, Jehielbe, Mattithiabe, Eliabbe, Benaiabe, Obededombe zai Je-ielbe, ’ntoî, ’nrateime bau, zai ’ntoî kedibe kagekêupeu, Asapbe,

⁶zai Hera gu samhatkaibe hingdebung masuage hegeîluîkie ramme ’mmut ze bamme tingkupeu hangna Benaiabe benai Jehazielbe de lei.

⁷Chidadege â Tingwang dage misuiyibe leu Asapbe benai pe kiduîme ne tewlia gai ra chipau mai ge Dabidbe ne sum gai raî de lei.

⁸Hei, Tingwang je misuiyibe pei gai ze pe ji kû lau, ziemmename ruage pe tatew ramme chilia gai be lau!

⁹Pe dage heleutew lau, pe dage getoabe leu tew lau, pe gu ningdaulakbe tâtewbe ramme haimena je salia lau!

¹⁰Pe ji ka’nchibe ge pe ngeudi lau; peize Tingwang je peume lung suiyi’nta lau!

¹¹Tingwang benai pe ranchi je peu lau; pechu peu bam lau!

¹²Pa ne ningdaulakbe tatew tewgaibe ramme chî bam lau, pa ningdaulakbe tatew tewgaibe ramme pa samrampatkaibe ramme chî bam lau,

¹³Hei, Abrahambe hikme pe guâ ka’ngguapeu Jakobbe name, pa ne kelânggailume gau!

¹⁴Pa â Tingwang anui Rapeu de lei; kedeirei leine ge pa ne samram la lei.

¹⁵Rehei changsenângme hangge pa samdiegaibe pe gu samhatkaibe, betingbeta pe lung ge chî bam lei,

¹⁶Abrahambe dage pa samhatkaibe, Isaakbe dage deseugaibe,

¹⁷Jakob dage hingde rawgaibe hang pa tew’ntipkaibe, Israelme dage betingbeta hangge samhat kai ze,

¹⁸“Nemai ge I ne ningchu Kanaanram pei gai gu lei, ning kiram hangge gum zeu,” ze kacheu de lei.

¹⁹Penui riak du cham zai seitâulak ze, chige lung ze bambe ting ge,

²⁰heram ramme ge tirua ze, heguangram kat gene miramme dage sakkeli ze bambe ting ge,

²¹penui je mî ne deîhereu ze bam ra pa ne pei gai mak lei; penui deu hangge pa ne heguangme je ’ngngiam gai ze,

²²“A gu ’nnukkaime je deîtau se lau, zai a gu kemeume je deîhereu gai se lau!” ze kacheu de lei.

²³Kedeirei leine gau, Tingwang dage heleu tewlia lau! Nai’nsangne pa tewka’nringbe rasam salia lau.

²⁴Heram zatme ruage pa pengêudibe rangba gai lau, pe gu mi ningdaulakbe tâ ramme ze baudime je rangba gai lau!

²⁵Tingwang â kedipeu daze toa’ndi-desang ra lei, zai hera leine je suadu pechu hing’nteu ra lei.

²⁶Baudime gu hera ramme â pelane heraluîtewbe kam lei; kane Tingwang ne tinggîm ramme tew gai lei.

²⁷Pe masuage hengêutewbe benai kaheguangbe la lei; pa bambe bâm ge heranchibe benai hesuiyibe la lei.

²⁸Kedeirei ge bamme gau, Tingwang je suang lau, Tingwang ngeudibe benai pe ranchi je toa lau!

²⁹Pe ji ngeudibe je suang gai lau; misuiyibe kela peipat ze pe masuage zuawang lau! Ka’nchibe kebabe ge Tingwang je kellum lau.

³⁰Pe masuage hingkedun bam lau, kedeirei leine gau; eu lei, mâtew-tewsedu ’ngngai mak ra kedeirei ze sap’ntiprip la lei.

³¹Tinggîm ramme peize penui suiyi lau, zai kedeirei je peize hesuiyi’nta lau, zai “Tingwang ne samram ze la lei!” acheu ze peize penui ne heram zatme ruage sa gai lau.

³²Sungkling benai pelung ge puigit ze bambe leine ne peize ’mbeu zu lau, heram benai pelung ge kebambe zat leine ne peize penui suiyi zu lau!

³³Chidezai Tingwang masuage hechingbang ramme ne penui suiyi ze leutewhim bam gu lei, kedeirei je samram ra pa ne wangkeu daseu.

³⁴Hei, Tingwang dage misuiyibe sam pau lau, pa â yi daseu; pa hungka’ntipbe ze â betingbeta bam bam daseu.

³⁵Zai, “Anui je tewka’nringpeu Hera gau, anui je meupat kai lau, zai heram zatme ruagene anui je gekumwang gai ze tew’nring gai lau, chidezai ning ji ka’nchibe je anui ne toa bam ra, zai ningchu toabe pengêudibe ge anui toa ra hangge zeu.

³⁶Betundaimakbe gene betundaimakbe riâ Tingwang Israelme Rapeu je peize toa bam lau!” ze acheu ze sa lau. Chidadege â baudime ne, “Amen!” acheu ze Tingwang je toa de lei.

³⁷Patingnai’nsangne ka’nnangbe hangge hingdebung suage tâ’nggua bam ra hang Tingwang gu samhatkaibe hingdebung masuage Dabidbe ne Asapbe benai pe puiname je sâu gai bei de lei.

³⁸Zai Obededombe benai pe puiname hang riakseruk ze desatme je du sâudiak te lei; Jeduthunbe na Obededombe benai Hosabe ne keriekemui kereîpeu kena chang ze bambe luage zeu.

³⁹Zai Gibeon ge bambe pebâm hulangbe ge Tingwang gu ka’nchibe bâm suage tingkupeu Zadokbe benai pe puiname tingkume je pa sâudiak kai lei,

⁴⁰Israelme peireige Tingwang samdiegaibe, pe gu hingde ge rawgaibe leine luigum ze rûkambe-râtewbe gu herâtewbe-kaira ge hechua, hegî Tingwang hangge rûkambe-râtewbe peipat kai ra hangge zeu.

⁴¹Pe gu hungka’ntipbe ze betingbeta bam-bambe ziegene Tingwang je getoabe pei ra penui dage, Hemanbe benai Jeduthunbe zai penui je mi-mige tat ra kelânggaime hanggesame dage Hemanbe benai Jeduthunbe du bam lei.

⁴²Heleu ka’nchibe tew ra hangge hegeîluîkie benai ’nsumpoine ramme ze Hemanbe benai Jeduthunbe dage bam lei. Jeduthunbe name bau je keriekemui reî ra kai bei de lei.

⁴³Chidadege â baudime ze penui ki ki lam’mbe tat kam di de lei, zai Dabidbe â pe kiduîme je ’nnam gai ra pe ki lam wang di de lei.