Read Zeme Naga 1 KRONIKIL 17 Bible Online

1 KRONIKIL 17 - Zeme Naga bible

1 KRONIKIL 17

¹Zai Dabidbe pe ki ge bambe ting ge Dabidbe ne kemeu’mpeu Nathanbe je, “Pie le lau, kedarching ne tewlubeki ge I bam de lei, kane Tingwang gu samhatkaibebung â hetiampaîki kangge la lei,” kacheu de lei.

²Zai Nathanbe ne Dabidbe je, “Ning lung ge ka’nningbe leine tew du lau, Hera ning dage la lei,” acheu bei de lei.

³Kane chipau mai tingmuî sing ge Nathanbe dage Tingwang gu sam wangkeu ze,

⁴“Tat ze a guâ ka’ngguapeu Dabidbe je rang gai lau, ‘Aigum ze Tingwang ne rang lei: Nang ne I bamrabeki hangge tew ra mak lei.

⁵Israelme je nguapatbe gene nemai riâ heki ge I bam me lei, kane paîki ramme benai mâ-mâ bâm ramme ge I tatrua bam lei.

⁶Israelme leine je ngua lu I tatkai-kaibe bâm leine ge, “’Ndaitew ningnui ne a ki hang kedarching ne tew gai mak lau,” acheu ze a gu ziemmena me je reî ra I samdiegaime Israelme samrambe tâ tewme mi-mi dage I salia gai semei?’ zeu.

⁷Chipauziegene a guâ ka’ngguapeu Dabidbe je, ‘Baudime gu Tingwang ne aigum ze rang lei, a gu Israelme peireige heguangsinpeu chang ze bam ra nang meli kumtatbe bâm timpeizeu ka’ndiakbe gene I ne ningchu tei lu de lei;

⁸zai nang tatkaibe bâm leine ge I ne ning dage bam bam de lei, zai ning masua gene ning teureime leine je I ne bikau kam gai bei de lei, zai ning ji ze kedeirei ge ziemmena kedime ji gum bam ra I ne tew gai bei de lei.

⁹Zai a gu Israelme penui bâm-bâm ge bam ze peize tewkebuak ze bam ta ra penui bâm hang peu gai ze tew’ntip kai gu lei; zai tingtie ge gum ze ziemmena pejaîsiame ne penui je peize kumtua ta ra,

¹⁰zai a gu Israelme peireige samramme hang I ne sumgaibe ting ge gum ze ning teureime leine je I ne duîwang kam gai gu lei, chipau peireige du Tingwang ne ning ki hang tew gai gu lei be ze ningchu I rang’nchi gai de lei.

¹¹Ning peume dage bam de ra ning ting chang dezai I ne ning chaname je ning chaige ning na ’mpeumime ruage hangkat je teichu gai gu lei, zai I ne a gu heguangram tei’nsap kai gu lei.

¹²Pa ne a ki hang tew gu zai pe gu heguang-bamrak ze betingbeta I ne tei’nsap kai gu lei.

¹³I ne pe gu chang gu zai pa ze a na chang gu lei; ning suage raîdipeu dagene a gu hungka’ntipbe teitattibe gum ze pe dagene I teitat ra mak lei,

¹⁴kane a ki benai a gu heguangram ge I ne pechu betingbeta tew’ntip kai gu lei, zai pe gu heguang-bamrak ze betingbeta hangge tei’nsapchu gai gu lei,’ kacheu de lei,” ze acheu nang salia ra lei.

¹⁵Aipau sam ramme luigumbe gene benai ai keliâbe luigumbe gene Dabidbe je Nathanbe salia de lei.

¹⁶Chidadege â heguang Dabidbe gut lu, Tingwang suage ’ntau gai lu sa ze, “I nung ze châu lau, Hei Tingwang Hera gau, zai a ki nung ze ’ndaikau lau, nang ne achu acheutie ge nguahangbeibe nung zeu?

¹⁷Zai Hei Hera gau, ning mik ge â aize mâ-kecheîne kau de lei; wangdairabe ge ning guâ ka’ngguapeu gu heki kedibe tewrabe rasam nang ne sa gai de lei, zai Hei Tingwang Hera gau, nang ne rehei wangdairabe hangge achu teilia bei de lei.

¹⁸Zai ning guâ ka’ngguapeu ngeutew gai ra hangge ningchu Dabidbe ne ’ndaikau sagaisua ra lau? Nang ne ning guâ ka’ngguapeu je chikâ la daseu.

¹⁹Hei, Tingwang gau, ning guâ ka’ngguapeu ji hanggene zai nang ne ’nninggailube luigum ze ai tâ kedibe ramme chî ra tewliagaibe gene nang ne ai tâ kedibe leine tew gai bei de lei.

²⁰Hei Tingwang gau, nang gumbe kau â, mî de ’ngga de lei, zai nang gum ze Hera ’ngga de lei, anui kun gene anui seulube luigum zeu.

²¹Ning gume bau Ijipram gene nang ne meupatkaibeime masua gene heramzatme je kelipatkaibe gezene nang ning runne ning ji tew’ndi ze mi kehingbe tâ ramme tew ze Hera ne pe gu baume hang meupat kai ra peugailume ning gu Israelme gumbe kau kedeirei ge kêdabe heramzatme châu la lau?

²²Zai nang ne ning gume Israelme je ning gu baume hang chang bam ra tew gai bei de lei; zai Hei Tingwang gau, nang ne penui Rapeu hangge chang bei de lei.

²³Zai Hei, Tingwang gau, chunage ning guâ ka’ngguapeu deu ge benai pe ki deu peireige ning sam sagai’ndibe ze peize ’ntiprip ze bam bam du lau, zai nang ne sagai’ndibe luî ze tew gai du lau;

²⁴zai ‘Tingwang Dilangpeu, Israelme Rapeu â Israelme gu Hera de lei,’ acheu sa ze betingbeta ning ji tew’ntip kai ze ning ji tew’ndi gai gu de lei, zai ning guâ ka’ngguapeu Dabid ki ze ning masuage tei’nsap kai gu de lei.

²⁵Nang a Rapeu, nang ne ning guâ ka’ngguapeu ki hang tew gai gu lei be pechu nang ne liâ gai bei de lei; chipauziegene ning guâ ka’ngguapeu ne ning masuage kuugiereu ze kellum ra ngau lu de lei.

²⁶Zai Hei Tingwang gau, chunage nang â Hera de lei, ai mâ-keyibe ze ning guâ ka’ngguapeu hangge nang ne samhat kai bei de lei;

²⁷chipauziegene ning guâ ka’ngguapeu ki je ’nnam gai ra, aize ne peize ning suî tewka’mmibe chang lau, chidezai ning suage peize chize betingbeta bam bam ra hangge zeu; Hei Tingwang gau, nang ne ’nnamgaibe ze â betingbeta hangge ’nnamgaibe chang lei,” ze kacheu de lei.