Read Zeme Naga 1 KRONIKIL 18 Bible Online

1 KRONIKIL 18 - Zeme Naga bible

1 KRONIKIL 18

¹Aipau chângge Philistinme je Dabidbe ne duî lu penui peireige samram ze bam di de lei, zai Philistinme ba gene Gadthram benai keloa ramme pa ne lutat ’ndi de lei.

²Zai Moabram pa ne duî ’ndi de lei, zai Moabme ne pe guâ ka’ngguame chang ze ’mpuâha ramme teiwang gai de lei.

³Zai Jobah ge heguang, Hadadezarbe je du Dabidbe ne Hamath riâ chang ze duî ’ndi de lei, pa ne pe gu tingchu Euphrates geuki ge sum gai ra tattibe ziegeneu.

⁴Zai pe dagene Dabidbe ne timriang chang kat, hekun chingchuame chang sena, zai mi pî ne tatbe hereikangme chang ’ngkaime je nguatat kam di de lei; zai Dabidbe ne timriang gu hekun ramme pî tewkerîng kam gai bei de lei, kane timriang â misongga, haî kat gum ’nsak kai bei de lei.

⁵Dadege Damaska ge Siriame bamme Zobaram heguang, Hadadezerbe je ’ngngâ ra wang dadege Dabidbe ne Siriame ziemmena chang ’ngkai-ze-kename je bichat ’ndi de lei.

⁶Chidadege â Dabidbe ne Damaskaram Siria ge hereikangme bâm hang kai bei de lei, zai Siriame Dabidbe kangge wang kam di ze ’mpuâhâ teiwang ze bam di de lei. Dadege â Tingwang ne Dabidbe je pa tatkaibe bâm leine ge keduîbe pei gai bei de lei.

⁷Zai Hadadezerbe gu ziemmename ne teibe gechâk, hinggei ramme ze Dabidbe ne lu lu Jerusalem ge teiwang gai bei de lei.

⁸Zai Hadadezerbe gu namdi Tibhath benai Kun gene kangngâgeî misongga Dabidbe ne lu lu de lei; chize ne Solomonbe kechia ramme zai hepiak, hekuak ramme hang kateleu de lei.

⁹Dabidbe ne Zobaram heguangpeu Hadadezerbe gu hereikangme pelane je duî ’ndi de lei be Hamathram heguang Toube seu lu dadege,

¹⁰pa ne Hadadezerbe je herei ze duîbeibe ziegene pechu rechâ gai ra, zai getoabe sam pei gai ra pe na Hadorambe je heguang Dabidbe dage lang gai de lei; Hadadezerbe â Toube dage herei’nzie bam dadegeu. Dadege â pa ne gechâk, gepût zai kangngâgeî ne tewbe kerua zat ramme leine ’mput kai de lei;

¹¹airamme ze du Heguang Dabidbe ne heramzatme Edomme, Ammonme, Philistinme zai Amelekme dagene gepût benai gechâk pa teiwangbe kaiherua gai lu ze Tingwang dage peipat kai bei de lei.

¹²Zai Zeruiale na Abishaibe ne Edomme ziemmena chang kereu ze desatme je ’nchaîbak gezene bichat ’ndi de lei.

¹³Dadege pa ne Edom ge hereikangme bâm hang teleu gai bei de lei; zai Edomme leine Dabidbe guâ ka’ngguame chang kam gai di de lei. Zai Tingwang ne Dabidbe je pa tatkaibe bâm leine ge keduîbe pei gai bei de lei.

¹⁴Chigum ze Israelme leine peireige Dabidbe ne samram ze bam de lei; zai pa ne ziemmena leine peireige kapelingbe benai ka’nzeibe ne samram ze bam de lei.

¹⁵Zai Zeruiale na Joabbe ne hereikangme peireige sing ze bam de lei; zai Ahiludbe na Jehoshaphatbe ne rawka’nduipeu chang de lei;

¹⁶zai Ahitubbe na Zadokbe benai Abiatharbe na Ahimelekbe ne tingku chang de lei; zai Shabshabe ne rawsuipeu chang de lei.

¹⁷Zai Jehoiadabe na Benaiabe ne heguang je kereîme (Kariame benai Pelethme) peireige sing ze bam de lei; zai heguang je kereîbe tâ ge Dabidbe name bau ne rezieteime chang ze bam lei.