Read Zeme Naga 1 KRONIKIL 19 Bible Online

1 KRONIKIL 19 - Zeme Naga bible

1 KRONIKIL 19

¹Aipau châng chunage Ammonme gu heguang Nahasbe chai di de lei, zai pa kelei ge pe na ne kaheguang de lei.

²Dadege Dabidbe ne, “Hanunbe peu Nahasbe ne achu ’nchâ ze bam bei daze pe na Hanunbe je I ne ’nchâ ze bam gu lei,” kacheu de lei. Chigum ze pe peu chaibe ge pechu nguatum gai ra Dabidbe ne pe dage hepâupaume je lang gai de lei. Dadege Ammonme ram ge Hanunbe je tum gai ra Dabidbe guâ ka’ngguame wang de lei.

³Kane Ammonme gu heguangsinme bau ne Hanunbe je, “Dabidbe ne ningchu tum gai ra ziemmena je langgaibeibe ziegene ning peu ngeu pa tewbe hang nang ’nning gai mei? Ningchu peu ze tewkau ra, zai heram rik ra pe guâ ka’ngguame ning dage wangbe kau mak semei?” kacheu de lei.

⁴Chidadege â Hanunbe ne Dabidbe tâka’ngguame je nîm lu penui tam ramme gut ze penui paî ramme sûngngangkelî gene penui dang riâ gene chiaptua gai lu ze tat ra lang gai bei de lei;

⁵zai penui tat ti de lei, chime rasam ze Dabidbe je pau gai bei dege penui je hedau gai ra pa ne lang gai bei de lei, chi ziemmena ramme ze ’ngngam-desangdibe ziegeneu. Dadege Heguang ne, “Ningnui biagêu ramme puakpat mak tâne Jeriko ge bam bam lau, chipau châng dezai helatwang dai lau,” acheu bei de lei.

⁶Ammonme penui runne Dabidbe je ngaugailak ra tewgailube ngau lu dadege â Hanunbe benai Ammonme ne Mesopotamiaram, Aram-makaram zai Zobaram gene timriang benai hekun teichime je puî ra gepût talent chang kat lang gai de lei.

⁷Penui ne timriang chang himreu ze kena zai Maakaram heguang benai pe gu hereikangme, Medeba je wang ze tejeîki tew lu bamme je puî de lei. Dadege â Ammonme ze penui gu namdi ramme gene heruawang’ndui lu herei ra zuapat te lei.

⁸Dabidbe ne chize seu lu dege Joabbe benai ziemmena peranchime gu hereikangme leine je lang gai de lei.

⁹Dadege Ammonme pat lu namdi keriekemui ge herei ra hejeu peu ze bam de lei, zai heguangme ramme wanggaime ’nduloa ge bamkuâ de lei.

¹⁰Joabbe ze herei ne pe chai pe sua pechu kuâdibe ngau dadege Israelme ziemmena kelânglume hanggesame je pa kelâng lu Siriame je giêkua de lei;

¹¹kêdame pe gu ziemmename je â pe kinapeu Abishaibe ne kanguabe kangge pa kai de lei, zai penui ne Ammonme je herei ra kateleu de lei.

¹²Zai pa ne, “Siriame ne a hangge penui ranchizû dizai â, nang ne achu ’ngngâ ra de lei, kane Ammonme ne ning hangge penui ranchi dizai â I ne ningchu ’ngngâ ra de lei.

¹³Kuugiereu ze bam lau, anui gu ziemmena hang hangkat hangge benai anui Rapeu gu namdi ramme hangge lungsangsing ze tew gai nî kei lei; pe hangge yirabe ze Tingwang ne peize tew gai be lau,” kacheu lei.

¹⁴Chigum ze Joabbe benai ziemmena ramme pe dage bamme Siriame suage herei ra zuawang’nna gai de lei; zai pe suagene penui pak ti de lei.

¹⁵Zai Siriame paktibe Ammonme ngau lu dege penui du chigum ze Joabbe kinapeu Abishaibe suagene paktat lu namdi ge gut ti de lei. Chidadege â Jerusalem ’mbe Joabbe wang de lei.

¹⁶Kane Siriame ze Israelme ne penui je duî ’ndi de lei be ngau lu dege penui ne hepâupaume je lang gai bei ze Euphrates giam ge bamme Siriame dage Hadadezerbe gu hereikangme gu besuitewpeu Shophakbe je ngua lu wang de lei.

¹⁷Zai chize Dabidbe je pau gai bei dege pa ne Israelme leine je kû’ndui lu Jordan kapat ze penui dage wang lu penui peireige pe gu hereikangme je gecheu gai bei de lei. Zai Siriame peireige herei ra Dabidbe ne pezeu hang peu gai bei dadege pechu penui ne hereigaihâ de lei.

¹⁸Dadege â Israelme suagene Siriame pak ti de lei; zai Siriame timriang chang sena ge bamme ziemmena ramme benai kedei gene bam lu kahereime ziemmena chang hedai je Dabidbe ne bichat ’ndi de lei, zai penui gu hereikangme ruage pemuitewpeu, Shophakbe je du tewchat ’ndi de lei.

¹⁹Hadadezerbe lâng tewme ramme ze Israelme ne penui je duî ’ndi de lei be ngau lu dadege Dabidbe dage penui desieyibe tew ze pe ba kangge wang gai kam di de lei. Chidadege â Siriame ze Ammonme je ’ngngâgailak ti de lei.