Read Zeme Naga 1 KRONIKIL 20 Bible Online

1 KRONIKIL 20 - Zeme Naga bible

1 KRONIKIL 20

¹Patingkum lungge keriakting ge heguangme herei ra zuapatbe hî ge, Joabbe ne hereikangme je ngua lu pat ze Ammonme gu heram ze tewka’nsia de lei, zai wang ze Rabba ze tuaguâ ’ndi de lei. Kane Dabidbe â Jerusalem ge bam bam lei. Dadege Rabba ze Joabbe ne tew’nsia ze tewkau ’ndi de lei.

²Zai Dabidbe ne penui gu heguang peî gene heguangpeichûp lu’ndi de lei; pa ne chize perît ’nchu gai dege gechâk gu talent kat pat lei, zai chipau lungge tingchu pemîhungbe bam lei; dadege chize Dabidbe peî ge luak kai bei de lei. Zai pa ne namdi gu hereichâ misongga ze teipat kai bei de lei.

³Zai Rabba ge bamme ziemmename je pa ne nguapat lu penui je hechingrumbekie, hegeî gepeu, zai ’nrei tei ze tâtew ra kai bei de lei; zai chipau luigum ze Ammonme gu namdi ge bamme leine peireige Dabidbe ne tatew de lei. Chidadege â Dabidbe benai baudime leine Jerusalem ’mbe helatwang dai di de lei.

⁴Zai aipau châng dege Gezer ge Philistinme dage herei putchu de lei; chidadege â Hushath’mpeu Sibbekaibe ne bekiapeu ramme chaname ruage hangkat Sippaibe je tewchat ’ndi de lei; zai Philistinme je â duî ’ndi de lei.

⁵Dadege Philistinme dage hereichu kadai de lei; dadege â Jairbe na Elhananbe ne Gath’mpeu Goliathbe kinapeu, Lahmibe pe gu hengeu’nta du paîdakbe tekiam gumbe teipeu je bichat ’ndi de lei.

⁶Zai ziemmena hangkat pe pumsak yi-kadesangpeu pe ba kat lam’mbia bakêrang seruk-ruk zai pe pî kat lam’mbia pîkêrang seruk-ruk, pelane kêrang ’ngkai ze medai pungpeu bambe bâm Gath ge herei putchu kadai de lei; zai pa du ziemmena bekiapeu changme dagene piakeupeu de lei.

⁷Zai pa ne Israelme je kakehibe luage, Dabidbe kinapeu Shime-ibe na Jonathanbe ne pechu bichat ’ndi de lei.

⁸Aime ze Gath ge ziemmena peranchime bekiapeu ramme dagene piakeume bau de lei; zai penui â Dabidbe benai pe guâ ka’ngguame ba gene kau di de lei.