Read Zeme Naga 1 KRONIKIL 21 Bible Online

1 KRONIKIL 21 - Zeme Naga bible

1 KRONIKIL 21

¹Satan ne Israelme peireige ’nggi ze zuachu de lei, dadege â Israelme riak raw ra gecheulum gai bei de lei.

²Chidadege â Dabidbe ne Joabbe benai hereikangme besuitewme je, “Tat chu lau, Beer-sheba gene Dan riâ Israelme riak sei le lau, zai penui riak I chî ra a dage sam chîchang gai lau,” ze acheu bei de lei.

³Kane Joabbe ne, “Tingwang ne peize pe gu ziemmename riak ge dêt haî suadu kie ze kaisî gai be lau! A pau heguang gau, penui ’nteumena ze a pau guâ ka’ngguame kam mak mei? ’Ndaitew a pau ne aipau tâ tew ra ka’nnang lau? ’Ndaitew Israelme peireige aigumbe kesiabe teiwang gai ra rei se lau?” ze acheu bei de lei.

⁴Kane Heguang kuâ kangge Joabbe je â kai ’ndi de lei. Chidadege â Joabbe tat ti de lei, zai Israelme ram ruatui lu Jerusalem ge wang gai kadai de lei.

⁵Dadege â Joabbe ne ziemmena riak misongga seipatlube Dabidbe je pei gai bei de lei. Israelme ram leine ge ziemmena hekie teichime, lâk kereu ze chang haî kat lei, zai Judaram ge hekie teichime chang haî medai ze riaksena lei.

⁶Kane heguang gu hûkum ge Joabbe ne pa ’nningmakbe ziegene pa seibe ge Lebime benai Benjaminme je â riamgut kai mak lei.

⁷Kane Dabidbe ne aipau tâ tewbe peireige Hera ne pe suiyi mak lei, chidadege â Hera ne Israelme je tewsâ de lei.

⁸Zai Dabidbe ne Hera je, “Aize I tewgaibe gene I hemui’ndi-desang de lei. Kane chunage ning guâ ka’ngguapeu gu hemui-helut ze nang ne lutua gai ra I kiam de lei, I a miêra ne tâtew gai ’ndi daseu,” ze kacheu de lei.

⁹Dadege Tingwang ne, Dabidbe gu kemeu’mpeu Gadbe je ’mpau ze,

¹⁰“Tat ze Dabidbe je, ‘Tingwang ne aigum ze rang lei, mâ-mâ zat chum ningchu pei gai lei; chige kat kelâng le lau, chigene ning hang I tâtew gai ra hangge zeu,’ ze rang gai be lau,” acheu bei lei.

¹¹Chidadege â Gadbe Dabidbe dage wang lu pechu, “Tingwang ne aigum ze rang lei, ‘Nang ne lunei-neibe lu le lau:

¹²Herakûm kum chum hang mei, nune ning teureime gu hiazutkie ne ningchu gua’nchumiebe luage ning teureime ne kêu chum guatua zîng gai be ra mei, nune heram ge herarît wang ze Tingwang gu hiazutkie ne ningnui je hezie kechum ’nggi ra mei, nune Tingwang gu angel’mpeu ne Israelram leine tew’nsia ne ra mei be zeu,’ ze acheu zeu. Chunage achu langgaipeu tailam I ’ndaikau sam pungwang dai ra mei be hangge nang ne rang’nchi gai du lau,” ze acheu bei de lei.

¹³Chidadege â Dabidbe ne Gadbe je, “I a duângga-desang de lei; Tingwang ka’nggiabe â di-kadesang daze a peireige peize pa ne tew ra yi-yibe tak tew ra I pe ba ge achu peipat kai be che lei; ziemmename ba ge â pei gai mak zeu,” ze kacheu de lei.

¹⁴Chidadege â Tingwang ne Israelme peireige herarît lang gai de lei; zai Israelme ziemmena chang riaksena kâu di de lei.

¹⁵Dadege â Jerusalem tew’nsia ra angel’mpeu je lang gai de lei; kane chize pa tew’nsia ra tew gai dege, Tingwang ne ngau di de lei, zai kesiabe (tewrabe) gene pa pe lung keli dai di de lei; dadege â pa ne tewka’nsiapeu angel’mpeu je, “Bui de lei, ning ba sau de zu lau,” acheu bei de lei. Zai Tingwang gu angel’mpeu Jebus’mpeu Ornanbe gu kechaîpung ge sapbam di de lei.

¹⁶Dadege Dabidbe pe ma ’ngngangrakchu de lei, zai Tingwang gu angel’mpeu kedei benai tinggîm kakge sap lu, pe ba ge hiazutkie lupatlube ze Jerusalem peireige getuapat kai bambe pa ngau de lei. Chidadege â Dabidbe benai gechîngme ramme miseigiriapaî bâ lu kedei ge penui ju ’ngkumkeu gai di de lei.

¹⁷Zai Dabidbe ne Hera je, “Ziemmena riak sei ra samdiegaipeu ze I mak mei? Hemui tâ tew ze tâ-kesiabe tewpeu ze I de lei. Kane aipau meli ramme peireige penui ne ’ndaikau tew gai bei lau? Hei Tingwang a Rapeu gau, a peireige benai a peume ki peireige tewsâ gai ra I kie lei; kane herarît kesiabe ze â ning gume peireige peize wangchang se lau,” ze kacheu de lei.

¹⁸Chidadege â Dabidbe ne hang ze Jebus’mpeu Ornanbe gu kechaîpung ge Tingwang gu herâtewbe-kaira teleu gai ra lei be ze Dabidbe je salia gai ra Tingwang gu angel’mpeu ne Gadbe je samdie gai bei de lei.

¹⁹Dadege â Tingwang ji gene Gadbe ne samdiegaibeibe gene Dabidbe hang di de lei.

²⁰Zai Ornanbe â dekuîmeu nei bam lei; pa ’nreiwang lu angel’mpeu je ngau de lei, zai pe name hangmedai pe dage bamme â ’mbai di de lei.

²¹Zai Dabidbe Ornanbe tailam wang dege, Ornanbe heguapie gai ze Dabidbe je ngau lu ze, kechaîpung gene tatpat lu, Dabidbe je hengêutew ze kedei ge ’ngkum’ntatui gai de lei.

²²Zai Dabidbe ne Ornanbe je, “Tingwang hangge herâtewbe-kaira I ne ning gu kechaîpung ge tewchu gai ra ning gu kechaîpung bâm achu pei lau—pemî pelane hangge achu pei lau—dezai ziemmename dagene herarît kesiabe peize liau de ra hangge zeu,” ze kacheu de lei.

²³Chidadege â Dabidbe je Ornanbe ne, “Tei le lau; zai a pau heguang ne peize pe hang yira-rabe tew du lau, pie le lau, rûkambe-râtewbe hangge I getumsei ramme, zai dikrabe heching hangge I hingbuak ramme, zai mâ-himlei gu herâtewbe hangge dekuîmeu I pei gai de lei, chiramme I pei kam gai de lei,” ze kacheu de lei.

²⁴Kane Heguang Dabidbe ne Ornanbe je, “Mak te lei, pemî pelane peize I ne lui kam ra de lei; ning gu ramme ze Tingwang hangge I tei ra mak lei, zai ’ntane ngaube ramme zene rûkambe-râtewbe hangge du pei gai ra mak lei,” ze kacheu de lei.

²⁵Chidadege â kedei bâm hangge Dabidbe ne Ornanbe je gechâk perît shekel haî seruk pei gai de lei.

²⁶Zai chige Dabidbe ne Tingwang hangge herâtewbe-kaira hang teleu gai lu rûkambe-râtewbe benai desieyibe-râtewbe hang peipat kai lu ze Tingwang je kû gai de lei, zai rûkambe-râtewbe gu herâtewbe-kaira peireige tinggîm ’mbene hemi gene pe samkak kai de lei.

²⁷Chidadege â Tingwang ne angel’mpeu je samdie gai bei de lei; dadege â pe gu hiazutkie ze pechûp lungge tiam gai dai ’ndi de lei.

²⁸Chipau luage Jebus’mpeu Ornanbe gu kechaîpung gene Tingwang ne pe kuâ kakkaibe Dabidbe ngau lu dege, chige pa ne pe gu herâtew gai de lei.

²⁹Hênamkang ge Mosabe ne Tingwang gu paîki tewgaibe benai rûkambe-râtewgaibe gu herâtewbe-kaira ze chipau ting ge Gibeon ge peloa hube bâm ge bam de lei;

³⁰kane Dabidbe Tingwang gu angel’mpeu gu hiazutkie je pa hingdibe ziegene chipau bâm suage Tingwang je peu ra Dabidbe â tatchi lak ze bam lei.