Read Zeme Naga 1 KRONIKIL 22 Bible Online

1 KRONIKIL 22 - Zeme Naga bible

1 KRONIKIL 22

¹Chidadege â Dabidbe ne, “Aige Tingwang Hera gu heki bam gu de lei, zai aige Israelme hangge rûkambe-râtewbe gu herâtewbe-kaira bam ra de lei,” ze kacheu de lei.

²Israelme ram ge miramme zat hesangme bamme je nguawang’ndui kam gai ra Dabidbe ne samdie gai de lei, zai tingchu giachime je pa ne Hera ki tew ra hangge tingchu teleu ra kai de lei.

³Dabidbe ne du hegeîkeriak, zai keriekemui benai kechia ge hegeî ’nsiprabe hegeî hang hegeî misongga pei gai de lei, hetageî du perît ’nchukamlakbe riâ pei gai de lei;

⁴zai kedarching du seikamlaktibe riâ pei gai bei de lei; Sidonme benai Tirame ne Dabidbe dage kedarching misongga teiwang gai bei dadegeu.

⁵Dabidbe ne, “A na Solomonbe â hena ze mâ-tâ tewchi-gesang merei da, zai Tingwang hangge heki tewrabe ze â heram ramme leine ge pe ji benai pe ngêu ze di-desang gu de lei; chipauziegene chipau ki tewrabe hangge I ne kedâ gai ra de lei,” ze kacheu de lei. Chigum ze Dabidbe pa chai makge, kerua ramme misongga pei gai diak te lei.

⁶Chidadege â pa ne pe na Solomonbe je kû lu ze Tingwang Israelme Rapeu hang heki tew ra pechu rang gai diak te lei.

⁷Dabidbe ne Solomonbe je, “A na gau, I ne Tingwang a Rapeu ji hangge heki tew gai ra a lung ge ’nning ze bam de lei.

⁸Kane Tingwang sam a dage wangkeu ze, ‘Nang ne hejai misongga tewpat ze herei’nggi’ngkie di de lei; a masuage nang ne kedei ge hejai misongga tewpatkai’ndibe ziegene a ji hangge nang ne heki tew gai ra mak lei.

⁹Pie le lau, ’mpeumi napoine ning dage piakeu gu lei; pa desieyibe ziemmena chang gu lei, pehuâzie ge peteu-pereime dage hungka’ntipbe I ne pechu pei gai gu lei; pe ji hangge Solomonbe je kû gu lei, zai pa ringbe ting ge lungkatemibe desieyibe Israelme je I ne pei gai gu lei.

¹⁰A ji hangge pa ne heki tew gai gu lei. Pa ze a na chang gu zai I ne pe peu chang gu lei, zai betingbeta Israelme ram ge pe gu heguang bâm ze I ne tew’ntip kai gu lei,’ ze kacheu de lei.

¹¹A na gau, chunage Tingwang ne peize ning dage bam bam lau, chidezai ning tedeu ge Tingwang ning Rapeu ne sagai’ndibe luigum ze pe ki hang nang ne tewbe ge tewtuichi le ra hangge zeu.

¹²Ningchu runne peize Tingwang ne mâ-’nningchibe benai mâ-gechîbe pei gai be lau, chidezai Israelme peireige tâtew ra ningchu pa ne rezie pei gai dezai Tingwang ning Rapeu gu hingde nang teichi le ra hangge zeu.

¹³Israelme hangge Mosabe ne hingde tewgaibe benai hingde rawdiakkaibe ramme nang ne teichi dizai â, nang pung-ze-sa bam gu lei. Ning ranchi ze kuugiereu ze bam lau. Hing se lau; ning lung chei ze bam se lau.

¹⁴I ne hereu ze a laîkai ze Tingwang ki hang gechâk talent haî kat, gepût lâk kereu zai hetageî benai hegeî perît ’nchuchilakbe riâ pei gai bei de lei, chiramme misongga bamkuâdibe ziegeneu; heching benai tingchu I pei bei de lei. Aipau ramme peireige nang ne kaisuâ gai sing ra lei.

¹⁵Ning dage tâtewme misongga la de lei: Tingchugiame, tingchu tâ tewme, heching tâ tewme, zai mâ-chîam ramme leine tewchime seikamlakbe riâ,

¹⁶gechâk, gepût, hetageî, zai hegeî ge tâtewchime ramme zeu. Chu lu tew du lau, Hera ning dage bam gu lei,” ze kacheu de lei.

¹⁷Zai Israelme kanguame besuitewme leine je du Dabidbe ne pe na Solomonbe je tâ ’ngngâ ra samdie gai ze,

¹⁸“Tingwang ningnui Rapeu ningnui dage ’ngga mei? Pebâm leine ge ningnui je pa ne desieyibe katemibe pei gai mak mei? Heram lungge bamme leine je pa ne a ba ge pei gai de lei; zai Tingwang benai pe gu ziemmename masua gene heram ze duî’ndibe kau de lei.

¹⁹Chunage â ningnui ka’nningbe benai ningnui lung zene Tingwang ningnui Rapeu je peu zu lau, Tingwang ji hanggene tewgaibe heki ge Tingwang gu samhatkaibebung benai Hera gu ka’nchibe hepiak, hekuak ramme teiwang gai le ra hang chu lu Tingwang Hera hangge pebâm ka’nchibeki ze tew du lau,” ze kacheu de lei.