Read Zeme Naga 1 KRONIKIL 23 Bible Online

1 KRONIKIL 23 - Zeme Naga bible

1 KRONIKIL 23

¹Dabidbe chîng di pe tingkum misongga hang di dadege pa ne pe na Solomonbe je Israelme peireige heguang hang sum gai de lei.

²Dabidbe ne Israelme kanguame besuitewme, tingkume zai Lebime leine je kûwang’ndui gai de lei.

³Lebime tingkum himreu changdime benai bepeirei tattime je sei gai de lei, zai pelane chang himreu ze desat lei.

⁴“Aime ziemmena chang ’ngkai ze medaime bau ne Tingwang ki tâ tewbe ge reî ra ziemmena chang serukme bau ne tâ-muipuame benai samramme chang ra,

⁵ziemmena chang medaime bau ne keriekemui kua ra, zai Tingwang je toarabe merua hang I ne tewgaibe tei ze Tingwang je toa ra ziemmena chang medaime bau ne chang ra lei,” ze Dabidbe ne kacheu de lei.

⁶Dadege Dabidbe ne Lebibe name bau je pebau-bau bam ra pei gai de lei: Gershom, Kohath zai Merari acheu zeu.

⁷Gershombe name kena ze Ladanbe benai Shime-ibe lei.

⁸Ladanbe name hangchum ze: gechîngpeu Jehielbe, zai Zethambe, zai Joelbe de lei.

⁹Shime-ibe name hangchum ze: Shelomothbe, Hazi-elbe, zai Haranbe de lei. Aime bau zene Ladanbe kichîngme ruage bepeî changme bau de lei.

¹⁰Shime-ibe name bau ze: Jahathbe, Zinabe, zai Jeube zai Beriabe lei. Aime hangmedai ze Shime-ibe name bau de lei.

¹¹Jahathbe ne besuitewpeu zai Zizabe ne pesinpeu de lei; kane Jeube benai Beriabe â penai name mâkie du mak lei, chipauziegene penui â peu kat name hang chang gai di de lei.

¹²Kohathbe name hangmedai ze: Amrambe, Izharbe, Hebronbe, zai Uzzielbe de lei.

¹³Amrambe name ze: Aaronbe benai Mosabe de lei. Aaronbe ze â tâ ’nchilangbe ’nggua ra, zai pa benai pe name ne Tingwang suage betingbeta mâ-perîmyibe ’ntau ze, zai Tingwang je ’nggua ze pe ji gene ’nnamgaibe peipat bam ra luchâmpat kai de lei.

¹⁴Kane Hera gu ziemmena Mosabe name bau ze â Lebibe zat ruage teigut kai de lei.

¹⁵Mosabe name ze Gershombe benai Eliezerbe lei.

¹⁶Gershombe na ze gechîngpeu Shebuelbe lei.

¹⁷Eliezerbe na ze gechîngpeu Rehabiabe lei; Eliezerbe name kêdabe ’ngga lei, kane Rehabiabe name â misongga bam lei.

¹⁸Izharbe na ze gechîngpeu Shelomithbe lei.

¹⁹Hebronbe name ze besuitewpeu Jeriabe, pakenabe ge Amariabe, pakechumbe ge Jahazielbe zai pamedaibe ge Jekameambe de lei.

²⁰Uzzielbe name ze Mikabe besuitewpeu benai Isshiabe pechaikerêupeu lei.

²¹Meraribe na kena ze Mahlibe benai Mushibe lei, Mahlibe na kena ze Eleazerbe benai Kisbe lei.

²²Eleazarbe â pe na ’mpeumi ga ze chai di le, kane pe na ’mpuimi ramme runne lei; penui kiduîme Kisbe name ne penui je nguakelaktew lei.

²³Mushibe name hangchum ze: Mahlibe, Ederbe zai Jeremothbe lei.

²⁴Aime bau ze Lebibe chaname penui paume dagene wangkeube ge kum ’ngkai peirei changdime ji riak rawteibe luî gene Tingwang ki guâ ’nggua ze bamrame bau de lei.

²⁵Dabidbe ne sa ze, “Tingwang Israelme Rapeu ne Israelme je desieyibe lungkatemibe pei gai bei de lei; zai pa ne betingbeta Jerusalem ge bam bam lei.

²⁶Zai chigum ze Lebime ka’nchibe paîki mei nune pe lung ge tâka’ngguabe kerua ramme mei ze mâ de pua dai ra ’nnang ta de lei,”— ze kacheu de lei.

²⁷Dabidbe ne nâlangbe ge ranggaidiakbe luigumbe gene airamme ze Lebime penui tingkum ’ngkai gene bepeirei changdibe kau ramme riak te lei—

²⁸“kane penui ne tewrabe deu ze kellumki lung hekisiâm ramme reî ze ka’nchibe kerua leine teleu’nchi ze, zai Hera ki tâ leine ’nggua ze Hera ki tâka’ngguabe ge Aaronbe name je tâ tew’ngngârabe de lei;

²⁹zai pualiabe tingku, mâ-himlei-râtewbe hangge dekuîmoîne ’nduihîkaimakbe tingkuliâp herâtewbe tingku, dekuî, mâ-châdui kebutlube, airamme ge du tâ’nggua ra lei.

³⁰Zai hechua ’nsangne sap lu Tingwang je penui suiyi ze toa ra zai hegî dezai du chigum tew ra lei,

³¹zai ’ntakbambe mai, keuhâ mai, zai kahengîbe mai ramme ge penui ziemmena hang daikie ka’nnang mei be riâ gene sau mak ze Tingwang masuage chigum penui tew bam ra lei.

³²Chigum ze penui ne ka’nduibe-paîki benai ka’nchibe bâm reî ze Aaronbe name bau zai penui kiduîme je Tingwang ki guâ ka’ngguabe ge penui je tinggeugaihâ ze bam ra lei,” ze kacheu de lei.