Read Zeme Naga 1 KRONIKIL 26 Bible Online

1 KRONIKIL 26 - Zeme Naga bible

1 KRONIKIL 26

¹Kemuireîme hangge pebau ’nzigaibe: Korabe kiria gene Asapbe name ruagene hangkat Korebe na Meshelemiabe lei.

²Meshelemiabe name bau bam lei: Meraipeu, Zekariabe, pakenapeu Jedia-elbe, pakechumpeu Jebadiahbe, pamedaipeu Jathni-elbe,

³pamengeupeu Elambe, paserukpeu Jehohananbe, pasenapeu Eli-e-ho-enaibe lei.

⁴Zai Obededombe name bau bam lei: meraipeu Shemaiabe, pakenapeu Jehozabadbe, pakechumpeu Joabe, pamedaipeu Sakarbe, pamengeupeu Nethanelbe,

⁵paserukpeu Ammielbe, pasenapeu Issakarbe, padesatpeu Peullethaibe de lei; Hera ne Obededombe je ’nnam gai bei de lei.

⁶Pe na Shemaiabe du pe name la lei, penui â penui pumchime ramme dadege penui peume ki ge besuitewme chang ze bam de lei.

⁷Shemaiabe name bau ze Othnibe, Repha-elbe, Obedbe, zai Elzabadbe de lei; pe kiduî’mpeu Elihube benai Semakiabe ze penai ranchibe kau kena de lei.

⁸Aime bau pelane ze Obededombe name, pe name zai pe kiduîme kam lei. Penui â mâ-tâtewrabe hangge chî’nsanglume bau de lei; penui Obededombe chaname pelane riakseruk ze kena lei.

⁹Zai Meshelemiabe name benai pe kiduîme ramme la lei, penui pumranchibe kau ramme lei, penui pelane hangkereu ze desat lei.

¹⁰Zai Meraribe kiria gene Hosabe name bam lei: Meraipeu mak sedu pe peu ne pechu meraipeu hang tewgaibeipeu Shimribe,

¹¹pakenabe ge Hilkiabe, pakechumbe ge Tebaliabe, pamedaibe ge Zekariabe de lei: Hosabe name benai pe kiduîme ’nteumena pelane hangkereu ze kechum lei.

¹²Kemuireîme ze pebau gechâm-châmme ze penui puinakattewbe luigum ze Tingwang ki ge tâka’ngguabe ge penui gu besuitewpeu dage mâ-’nneu ze tâtew ra chang lei.

¹³Penui kiduîme ruage kedi-kechei kemui kuârabe hangge hedachak te lei,

¹⁴tingbia ’mbia hangge hedachakbe ze, Shelemiabe peireige kêu gai de lei. Pe na mâ-’nsapchipeu Zekariabe hangge du penui ne hedachak kai dege, pe hangge tingpeî ’mbia bam ra chakpat lei.

¹⁵Tingpî ’mbia ze Obededombe hangge chakpat lei, zai pe name ramme je keruakaibeki pei gai lei.

¹⁶Tingrun ’mbia ’mpuîki hangdibe ge Shalleketh kemui hangge Shuppimbe benai Hosabe je chakpat lei. Reî zun ze reî de lei.

¹⁷Tingbia ’mbia gu kemui ge mai kat ge hangseruk bam lei, tingpeî ’mbia gu kemui ge mai kat ge hangmedai bam lei, tingpî ’mbia gu kemui ge mai kat ge hangmedai bam lei, zai keruaki ge du hangna-na bam lei;

¹⁸tingrun ’mbia ge hekisiâm ge hangmedai ne kuâ zai hekisiâm gutbe ’mpuîki ge hangna ne kuâ lei.

¹⁹Korame benai Merarime ruage kemuireîrame hang aize ’nzichâmgaime bau de lei.

²⁰Lebibe zat gene Ahijabe ne Hera ki gu kerua pemîhungbe ramme peireige benai kerua pemîhungbe ramme kela hang peipatkaibe peireige rezietei ze bam lei.

²¹Ladanbe chaname, Ladanbe dagene Gershonme zat chang ze bamme zai Gershon’mpeu Ladanbe kiria ge besuitewpeu ze Jehielibe lei.

²²Jehielibe na hangna ze Zethambe benai pe kinapeu Joelbe lei, penai ne Tingwang ki gu kerua ramme peireige rezietei ze bam lei.

²³Amramme, Izharme, Hebronme zai Uzzielme zat peireige tâtew ra peigaibe:

²⁴Mosabe na Gershombe kiduî’mpeu Shebuelbe zene kerua peireige dilangpeu chang de lei.

²⁵Pe kiduîme ramme: Eliezerbe na Rehabiabe, Rahabiabe na Jeshaiabe, Jeshaiabe na Jorambe, Jorambe na Zikribe, zai Zikribe na Shelomothbe de lei.

²⁶Shelomothbe benai pe kiduîme ne kerua ramme, Heguang Dabidbe, zai pe kiduîme ruage besuitewme, zai changme benai haime gu tâ-muipuame zai hereikangme kanguame besuitewme ramme ne kela hang peipatkaibe ramme peireige rezietei ze bam lei.

²⁷Kahereibe gene hereichâ ngaube ramme Tingwang ki tewbe hangge penui ne kela hang peipat kai ze bam lei.

²⁸Zai kemeu’mpeu Samuelbe, zai Kisbe na Saulbe, zai Nerbe na Abnerbe, zai Zeruiale na Joabbe ne du diepat’nchi gai lei— diepat’nchigaibe ramme leine ge Shelomothbe benai pe kiduîme ne tinggeu ze bam lei.

²⁹Izharbe chaname ruagene Kenaniabe benai pe name je Israelme hang hela gu tâ ramme hangge tâmui pua ze samramme chang ze bam ra sum gai bei de lei.

³⁰Hebronbe chaname ruagene Hashabiabe benai pe kiduîme ziemmena penui ranchime chang kat ze haî sename ne Tingwang gu tâ leine benai heguang guâ ka’ngguabe ge Israelme Jordan gene tingrun ’mbia bamme je peize penui ma pie ze reî ra pei gai lei.

³¹Rehei ’ntitatbe ge Hebronbe chaname ruage Jerijabe ne chînglangbe chang lei. (Dabidbe ne kaheguangbe pahedaibe kum ge ziemmena peranchibe kau ramme je peu de lei, zai penui je Gilead ge Jazer gene ngaudau de lei.)

³²Reubenme, Gadme, zai Manassebe zat pa’mpime Hera lam hangge tâtewbe leine benai heguang tâudeu ka’ngguabe leine ge reî ze bam ra heguang Dabidbe ne Jeriabe benai pe kiduîme penui ranchime zai gekuume penui kiria ge besuitewme ramme ziemmena chang na ze haî sena je sum gai bei de lei.