Read Zeme Naga 1 KRONIKIL 28 Bible Online

1 KRONIKIL 28 - Zeme Naga bible

1 KRONIKIL 28

¹Israelme ruage tâ-muipuame leine, pezatme gu tâ-muipuame leine, pe kiangname gu tâ-muipuame leine, heguang guâ ka’ngguame, changme gu sipai ge kanguame, haîme gu sipai ge kanguame, kerua ramme leine benai heguang zai pe name gu kauruidung zai ziemmena peranchime heguang-bâm ge penui suitewme zai tingkat gu hereime ramme je Jerusalem ge Dabidbe ne kûwang’ndui gai de lei.

²Dadege heguang Dabidbe pe pî ne sapchu lu ze, “A kuâ seu le lau, a kiduîme zai a gume gau. Tingwang gu samhatkaibe hingdebung kai ra, zai anui Rapeu gu pîchaîra hang heki tew ra I ne a lung ge ’nning gai de lei, zai heki tewrabe hangge I kedâ gai de lei.

³Kane Hera ne achu, ‘Nang â hereitewpeu chang ze hejai tewpat’ngkie’ndibe ziegene a ji hangge nang ne heki tew ra mak lei,’ kacheu de lei.

⁴Acheuleusedu Israelme peireige betingbeta heguang chang ze bam ra Tingwang Israelme Rapeu ne a kiduîme ruagene achu kelâng gai de lei; pa ne Judabe je kanguapeu hang kelâng gai da, zai a kiduîme Juda ki ge benai a peu chaname ruagene Israelme peireige heguang hang achu sum gai ra pa ne pa ’nning di de lei.

⁵A name leine ruage (Tingwang ne achu a na hang misongga peigaibeibe luigum ze) a na Solomonbe zene Israelme peireige Tingwang heguangram gu heguang-bâm ge peize ’ntau ra pa ne kelâng gai bei de lei.

⁶Pa ne achu, ‘Ning na Solomonbe ze a na hangge chang ra, zai I ze pe peu hang chang ra I ne kelânggai’ndibe luigum ze ning na Solomonbe ne a ki hang benai a gu heguang kerie hang tew ra de lei.

⁷Nemai gum ze pa ne a gu hingde ramme benai a gu hingde teleugaibe ramme tei’ntip ze bam bam bei zai â, pe gu heguangram ze betingbeta hangge I ne tew’ntip kai gu lei,’ kacheu de lei.

⁸Chidaze chunage Tingwang gu ziemmena wangka’nduibe Israelme mikngau gene benai anui Rapeu geseube gene Tingwang ning Rapeu gu hingde ramme leine ’nchet ze peu du lau; chidezai ningnui ne ai heram yibe ’nram lu ze ningnui chângge ningnui name lungleîme hangge betingbeta hang sâudiak kai ra hangge zeu.

⁹“Zai nang a na Solomonbe gau, ning peu Rapeu je chî lu ze ning lung leine benai keneibe lung ne ’nggua ze bam lau; Tingwang ne helung leine peu lei, zai mâ-tâ tew ra ka’nrangbe benai ka’nningbe leine chikâ ze bam lei. Nang ne pechu peu dizai â, nang ne pechu ngau gu lei; kane nang ne pechu put kai ’ndizai â, pa ne ningchu tuâpatzut kai gu lei.

¹⁰Chuna ’ntîng le lau, Tingwang ne ningchu, kakellumbeki hang tew ra kelâng gai la de lei; ning ranchi ze tew zu lau,” ze kacheu de lei.

¹¹Chidadege â Dabidbe ne Solomonbe je, kellumki gu kûngduaki zai chize heki ramme keruaki, ’nreibe kisîam ramme benai helungbe kisîam ramme zai ka’nggiabe bâmrak kisîam hangge tewrabe tak ramme hang pei gai bei de lei;

¹²zai Tingwang ki teririe rieguarabe hang, zai pehia-hia ge hekisiâm ramme bamrabe hang, Tingwang ki kerua bâm hang zai kerua ramme kela hang peipatkairabe bâm hang pelung gene tew ra ’nninggaibe leine tewrabe tak ramme hang,

¹³tingkume benai Lebime pe kiangna pungrabe tak hang, zai Tingwang ki ge tâ’ngguarabe tak leine hang, Tingwang ki ge heli ramme teirabe tak hang,

¹⁴Hera ki hî’nsangne ge gechâkkuak benai gepûtli ramme,

¹⁵gechâk hemibung-kaira benai penui gu hemibung ramme, zai gepût hemibung-kaira benai gepût hemibung ramme heraki hî ge hemibung-kaira teibe tak luigumbe gene,

¹⁶pualiabe tingku kairabe bâm mâ-kaira gechâk ne tewbe, gepût hang gepût ne tewbe mâ-kaira ramme,

¹⁷gechâk ’nchichiakbe terui peruangtewbe mâkuak ramme, zai hepiak ramme; gechâkkuak ramme, gepûtkuak ramme;

¹⁸mâ-perîmyibe rube herâtewbe-kaira gechâk ka’nchibe ne tewbe; Tingwang gu hingdebung ge kerubme penui kan liâmpat ze gûmnambe, gechâk ne tewbe timriang ge airamme leine ge gechâk benai gepût perît ’ndeu ze tewrabe tak hang pe lung ge pa ka’nningbe leine pei gai de lei.

¹⁹Tâ leine ’nninggailube luigum ze tew ra hang aipau deu ge Tingwang ba gene kerawbe zene airamme leine pa tew’nchichiak kai de lei.

²⁰Chidadege â Dabidbe ne pe na Solomonbe je, “Nang â ranchi ze kuugiereu ze tâtew lau. Hing se lau, ning lung chei ze bam se lau; a Rapeu Tingwang Hera ning dage la lei. Tingwang ki ge tewrabe tâ leine gu tâ tew kam gai mak tâne pa ne ningchu chî ta ra mak lei, zai put kai ra mak lei.

²¹Zai pie le lau, Tingwang ki gu tâtewrabe leine hangge tingkume benai Lebime penui kiangna pungbe, zai hechiâm zat leine chiamchime helungyime ramme ne tâ leine ge ningchu ’ngngâ gai gu lei; zai tâ-muipuame benai baudime leine du nang ne kerangbe ge bam kam gu lei,” ze kacheu de lei.