Read Zeme Naga 1 KRONIKIL 29 Bible Online

1 KRONIKIL 29 - Zeme Naga bible

1 KRONIKIL 29

¹Dadege baudime wangka’nduime leine je heguang Dabidbe ne salia ze “A na Solomonbe pechu runne Hera ne kelânggaipeu â hena ze tâ tewchi merei da, zai tâ ze â hung-desang de lei; Heguang bâmra ze â ziemmena hang mak ze Hera hang daseu.

²Chigum ze I ne tewduibe riâ a Rapeu ki hangge gechâk ne tewbe hang gechâk, gepût ne tewbe hang gepût, hetageî ne tewbe hang hetageî, hegeî ne tewbe hang hegeî, heching ne tewbe hang heching, chipau peireige tingchu pemîhungbe ramme benai tingchu kairabe ramme pegeî gechâm-châmbe ramme, tingchu pemîhungbe ramme benai tingchugeu zat leine I ne peipat kai ’nde lei.

³Chipau peireige ka’nchibeki hang I peipatkaibe peireige a gu I ne kahekâmbe gechâk benai gepût lamui lei, zai a Rapeu ki hangge I ’nningkahekuîbe ziegene aize a Rapeu ki hangge I pei de lei.

⁴Heki ’mbie ramme keniak ra, Ophir gene teleupatbe gechâk talent chang chum zai gepût teleu’nchilube talent chang sena,

⁵zai mâ-chîam tewchime ne tâ leine tewrabe hang gechâk ne tewbe hangge gechâk, gepût ne tewbe hangge gepût, I pei de lei. Châu ne nemai pesuiyi ze pe runne pechu tew’nchi lu ze Tingwang hangge mâ-peipat ra lau?” ze kacheu de lei.

⁶Israelme zat ruage besuitewme changme benai haîme peireige hereikang muiteime zai heguang gu tâtewbe peireige rezieteime ramme ne du tew gum ze penui kiduîme ruage gechîngme ramme ne penui suiyi ze kela ramme peipat te lei.

⁷Hera ki lungge tâka’ngguabe hang penui ne gechâk talent chang mengeu zai gechâk gu rangkângpum chang kereu zai gepût talent chang kereu pei de lei.

⁸Zai mi-mige pe dage tingchu pemîhungbe bam-bamme â Gershon’mpeu Jehielbe ne katinggeube kanggene Tingwang ki gu keruaki ge pei gai de lei.

⁹Chidadege â airamme ze Tingwang dage keneibe gene penui lung leine ne ’ntane peipat ze bambeibe ziegene baudime ne penui suiyigaihâ ze bam de lei; Heguang Dabidbe du pe suiyi-desang ze bam de lei.

¹⁰Chipauziegene baudime ’nteumena bambe gene Dabidbe Tingwang je kakellum de lei; zai Dabidbe ne acheu sa ze, “Hei Tingwang, Israelme Rapeu anui Rapeu, ning ji â peize betingbeta toa bam lau.

¹¹Hei Tingwang gau, kedibe, reziechibe, pengêudibe, keduîbe zai kaheguangbe ze â ning gu kam de lei; Hei Tingwang gau, heguangram ze ning gu de lei, zai ningchu â getaleine peireige teichu’ngngu gai ’nde lei.

¹²Keheube benai pengêudibe ning dagene pat lei, zai nang ne getaleine peireige samram de lei. Ning ba ge reziechibe benai tâtewchibe la lei; ’nteumena hangge tâtewchi ze, zai reziechi ze bam ra tew gai ra ning ba ge rezie la lei.

¹³Anui Rapeu gau, chunage anui suiyi ze anui ne ning ji ngeudibe je toa lei.

¹⁴“Kane I ze châu zai a gu ziemmename ze ’ndaigumbe kau ramme lau, aigum ze anui ne peinei ze peipatchilerabe nung zeu? Mâgetaleine ning dagene pat te lei, zai ning gu ze anui ne ningchu pei kadai de lei.

¹⁵Anui pau-paime gum ze anui du ning masuage hesangme tebeîtewme gum ze bam lei; kedeirei ge anui ting ze kezui gum lei, bam bam mak lei.

¹⁶Hei, Tingwang anui Rapeu gau, ning ji gene ning hangge heki tew ra hang kegeugabe gene anui ne mâ-mâ peipatbe ze ning ba gene pat te lei, zai pelane ze ning gu kam de lei.

¹⁷A Rapeu gau, nang ne ziemmena lung kakedak lei, zai lungsangtewme peireige ning suiyi lei, kacheube I chî lei; a lung ge lungsangtewbe gene airamme leine ’ntane I peipat kai lei, zai aige bamme ning gume bau ne ’ntane penui suiyi ze peipatkaibe ze I ngau de lei.

¹⁸Hei Tingwang, Abrahambe, Isaakbe, zai Israelbe Rapeu, anui pau-paime Rapeu gau, aigumbe tâ ramme benai aigumbe lungningtak ramme ning gu ziemmename lung ge kai bam lau, zai penui lung ze ning lam’mbe tei gai lau.

¹⁹Ning gu samhatkaibe ramme, ning gu hingde ramme, zai ning gu hingde rawdiakkaibe ramme ze a na Solomonbe ne pe lung leine ne tei’mmi lu ze tâtew ra, zai I ne peipatkaibeibe gene heguang ki hang tewchi le ra nang ne pechu pei gai lau,” ze kacheu de lei.

²⁰Chidadege â Dabidbe ne baudime wangka’nduime leine je, “Tingwang ningnui Rapeu je suang gai lau,” kacheu de lei. Dadege â baudime wangka’nduime leine ne Tingwang penui pau-paime Rapeu je suang de lei, zai penui peî’ngkumkeu ze Tingwang je toa ze heguang je hengêutewbe pei gai de lei.

²¹Dadege â penui ne Tingwang hang herâtewbe peipat kai de lei, zai bechai mai ge Tingwang dage rûkambe-râtew ze getumsei ramme chang kat, melisei ramme chang kat, meli poine ramme chang kat peipat te lei, zai sakbe-râtewbe du tew’mpam ze tew gai de lei, zai kêdabe herâtewbe du Israelme leine hanggene kegeuga ze tew gai de lei;

²²zai chipau mai ge â penui suigut ne Tingwang masuage penui teu ze sak ze bam de lei. Zai Dabidbe na Solomonbe je heguang hang pakenabe penui ne sum gai de lei, zai penui ne pechu Tingwang hang heguangsinpeu hangge sum gai, zai Zadokbe je tingku hangge sum gai de lei.

²³Chidadege â Solomonbe ne pe peu Dabidbe kelei ge heguang chang ze Tingwang gu heguang-bamrak ge ka’ntau de lei; zai pa lung’ntuabi-bi ze bam lei, zai Israelme leine ne pe kuâ pheu ze bam de lei.

²⁴Besuitewme ramme benai peranchime ramme, zai ’nteumena ne heguang Dabidbe na heguang Solomonbe dage puinakattew ze bam ra samhat te lei.

²⁵Zai Solomonbe je Tingwang ne Israelme leine mikngau gene heji dibe pei gai bei de lei, zai besua’ngka ge Israelme ruage heguangme mi-mige peireige du tewgaimakbe heguang ji kedibe pechu pei gai bei de lei.

²⁶Aigum ze Israelme leine ruage Jessibe na Dabidbe ne heguang chang bam de lei.

²⁷Pa ne Israelme peireige kaheguangbe tingkak ze tingkum hedai lei; pa ne Hebron ge kum sena heguangsap kai lei, zai Jerusalem ge kum himreu ze kechum heguangsap kai lei.

²⁸Chidadege â pa chîngbuika di, pe tingkum misongga hang di, zai pe heurâ puigit zai pengêudi-desang bam ze pa chai di de lei, zai pe na Solomonbe ne pa kelei ge kaheguang de lei.

²⁹Zai heguang Dabidbe tâtewbe rasam ze bepîbang gene chu ze betun riâ gu ze, kemeu’mpeu Samuelbe benai Kemeu’mpeu Nathanbe rasam rawgaibe leisikuak, zai kemeu’mpeu Gadbe rasam rawgaibe leisikuak ge raw gai de lei,

³⁰chige pa samrambe benai pa tâtewchibe rasam zai pe dage benai Israelme peireige, zai heram ge heguangram leine ge mâ-wangchangbe rasam pelane raw gai de lei.