Read Zeme Naga 1 KRONIKIL 5 Bible Online

1 KRONIKIL 5 - Zeme Naga bible

1 KRONIKIL 5

¹Israelbe (Jakobbe) name ruage merailangpeu Reubenbe chaname, (Pa ne merailangpeu dadegeu; kane pa ne pe peu jeî tewhebâgai’ndibe ziegene pa gechîngbe ze â Israelbe na Josepbe name dage pei gai ’ndi de lei, chidadege â rehei ka’ntibe leisikuak ge pe ji â raw gai mak te lei.

²Judabe ne pe sikina ’mpeumi ruage peranchipeu chang zai heguang na hangkat pe dagene pat leusede gechîngbe dam ze â Josepbe hang chang di de lei);

³Israelbe na merailangbe peu Reubenbe name: Hanokbe, Pallube, Hezronbe, zai Karmibe lei.

⁴Joelbe name: Pe na Shemaiabe, pe na Gogbe, pe na Shime-ibe,

⁵pe na Mikabe, pe na Re-aiabe, pe na Baal,

⁶zai Assiria heguang, Tilgath-pilneserbe ne kebang hang nîmtattipeu Be-erahbe name bau de lei, Reubenbe zatme ruage pa â besuitewpeu lei.

⁷Penui kiria rehei ’ntikeu gai dege, penui pau-pai dagene penui kiduîme patbe: Chînglangpeu, Je-ielbe, zai Zekariabe,

⁸zai Nebo benai Baal-meon riâ chang ze Aroer ge lungpeu Joelbe na Shemabe chana Azasbe na Belabe lei.

⁹Penui gu kauruidung Gileadram ge hingpat-desang bambeibe ziegene Euphrates geuki ’mbia ge hênamchangbe tatgutbe ’mpuî riâ chang ze pa du chige lung de lei.

¹⁰Zai Saulbe ting ge Hagarme peireige penui kaherei de lei, chime ze penui ba gene kâu di de lei; zai Gileadram ge tingnaimikpat ’mbia heram pelane ge penui hetiamki ge bam de lei.

¹¹Gadbe name bau Saleka riâ chang ze Bashanram ge penui lungme bau:

¹²Besuitewpeu Joelbe, Shaphambe pesinbe peu, Janaibe, zai Bashan ge Shaphatbe lei.

¹³Zai penui peume kiria luigum ze penui kiduîme: Mikaelbe, Meshullambe, Shebabe, Joraibe, Jakanbe, Ziabe zai Eberbe, hangsena lei.

¹⁴Aime bau ze Huribe na Abihailbe name lei, penui paume ramme ze, Jaroabe, Gileadbe, Mikaelbe, Jeshishaibe, Jahdobe, Buzbe;

¹⁵Gunibe chapeu Abdielbe na Ahibe zene penui peume ki ramme peireige besuitewbe peu de lei.

¹⁶Zai penui Gilead ge, Bashan ge, zai chiramme gu namdi ramme ge zai Sharonram gu melitaning bâm ramme leine ge penui lung bam de lei.

¹⁷Airamme leine Judaram heguang Jothambe benai Israelram heguang Jeroboambe bambe ting ge rehei ka’ntibe rasam ge teigut kai ’ndi de lei.

¹⁸Reuben zatme, Gath zatme, zai Manassebe zatme pa’mpi riâ penui dage ziemmena gekuube kau ramme hinggei benai hiazutkie teichibe kau zai bai’mpi kapchibe kau, hereitewbe tak chibe kau ramme, ziemmena chang hedai ze medai ze haî sena ze riakseruk je tâtew ra hangge kedâ’ntua gai lu ze bam de lei.

¹⁹Hagarme, Jeturme, Naphisme zai Nodabme, je herei’nggi ra penui kateleu de lei.

²⁰Zai penui je ’nggi ra ka’ngngâbe penui ngau lu dadege herei ge penui ne Hera je kûbeibe ziegene Hagarme benai penui dage bamme leine je penui ba ge pei gai ’ndi de lei, zai pa ne penui ne pechu ’nnumtew bei dadege penui ne kiebe ze lun gai bei de lei.

²¹Penui gu kauruidung penui ne teitat’ndibe: Penui gu put-hu ramme chang rengeu, meli chang haî na ze rengeu, hekunmerângne chang na, zai ziemmena keringme lâk kat lei.

²²Misonggame je Hera gu herei changdibe ziegene bikau kam ’ndi de lei. Penui kebangtewtatbe ting riâ chang ze penui bâm ge lung bam de lei.

²³Manassebe zatme pa’mpi riâ â heram ge bam lei; penui misongga pung-ze-sa ze Bashan gene Baal-hermon, Senir zai Harmon loa chang ze puigit bam de lei.

²⁴Aime ze penui peume kelak ramme ge gechîngme bau de lei: Epherbe, Ishibe, Elielbe, Azri-elbe, Jeremiabe Hodabiabe, zai Jahdi-elbe, penui â herei ge gekuube kau ramme. Penui ji teisuang ze bamme zai penui peume kelak ramme ge gechîngme bau de lei.

²⁵Kane penui ne penui peume Rapeu je ’nggi ze hede’ngka ze, penui masua gene Hera ne tew’nsiagaibeibe ramme, heramme gu hera ramme peireige penui pum zuateube tâ ramme tew ze bam de lei.

²⁶Chidadege â Israelme Rapeu ne Assiriaram heguang Pulbe benai Assiria heguang Tilgath-pilnesserbe lung gecheu gai bei ze, pa ne Reuben zatme, Gad zatme zai Manassebe gu hezatme pa’mpi riâ je Hala ge, Habor ge, Halah ge zai Gozan geuki ge nemai riâ nguawang gai bei ze la lei.