Read Zeme Naga 2 KRONIKIL 1 Bible Online

2 KRONIKIL 1 - Zeme Naga bible

2 KRONIKIL 1

¹Dabidbe na Solomonbe pe gu heguangram ge pe runne pechu tew’ntip kai de lei, zai Tingwang pe Rapeu ne pe dage bam ze pechu tew’ndi-desang gai bei de lei.

²Solomonbe ne Israelme leine, changme benai haîme peireige kanguame, samramme, Israelme leine ruage kanguame besuitewme, penui kiduîme ruage gechîngme ramme je sam salia de lei.

³Dadege â Solomonbe benai pe dage baudime bamme ’nteumena Gibeon pebâm hube bâm ’mbe tat ti de lei; hênamkang ge Tingwang guâ ka’ngguapeu, Mosabe ne Hera je hedaurabe bâm hang hetiampaîki tewgaibe chige bam de lei.

⁴(Jerusalem ge Hera gu hingdebung kairabe bâm hang Dabidbe ne teleugailube ziegene Kiriath-jearim gene Hera gu hingdebung teiwang ze pa ne kedâgailube bâm ge kai de lei)

⁵Chipau peireige du Hurbe chapeu Uribe na Bezalelbe ne hetageî ne tewbe herâtewbe-kaira ze chige Hera gu ka’nchibe paîki ge bam lei. Dadege Solomonbe benai baudime bau ze Tingwang je peu de lei.

⁶Zai Hera je kahedaube hetiampaîki ge bambe hetageî ne tewbe herâtewbe-kaira Tingwang masuage bambe bâm ’mbe Solomonbe hang di de lei, zai chipau peireige rûkambe-râtewbe chang kat tew gai de lei.

⁷Chipau mai tingmuîzeu ge Hera ne Solomonbe je liâ ze, zai pechu, “I ne ningchu peirabe ze kie du lau,” kacheu de lei.

⁸Dadege Solomonbe ne Hera je, “A peu Dabidbe je nang ne heji dibe benai hungka’ntipbe pei gai bei de lei, zai pa kelei ge nang ne achu heguang hang sum gai bei de lei.

⁹Hei Tingwang Hera gau, kedeirei ge kedeiniamoîne kie ze ziemmena bambe peireige nang ne achu heguang hang sumgaibeibe ziegene A peu Dabidbe peireige nang samhatkaibe ze peize chunage wangchang de zu lau.

¹⁰Aime baudime masua gene I tatpat tatgut ze bam ra chunage achu kaningchingbe benai mâ-gechîbe pei gai zu lau, aigum ze ning gume aizeume ruage châu ne samramchi ra lau?” kacheu de lei.

¹¹Hera ne Solomonbe je kak ze, “Ning lung ge ka’nningbe nang ne mi heurâ, lungyibe, pengêudibe, makchaidu ningchu ngaugailakme kechaibe hang kie mak, zai ringtie ze bam ra kie mak, kane châu gumme hanggene I ningchu heguang hang sum gai mei, chime a gume peireige nang ne samram ze bam ra hang kaningchingbe benai mâ-gechîbe kiebeibe ziegene,

¹²kaningchingbe benai mâ-gechîbe ningchu pei gai de lei. I ne ningchu lungyibe, mi heurâ ramme, zai pengêudibe mâdau ning sua’ngka ting ge benai ning chângge heguangme mâdau ngaumakbe zat du pei gai gu lei,” kacheu de lei.

¹³Chigum ze Hera je kahedaube paîki masua gene Gibeon ge pebâm hube gene Jerusalem ’mbe Solomonbe wang de lei. Israelme peireige pa ne samram de lei.

¹⁴Solomonbe ne timriang benai hekunchingchuame je nguawang’ndui gai de lei; timriang kiebe namdi ge benai Jerusalem ge pa heguang dage bamme pe gu timriang chang kereu ze medai zai hekun chingchuame chang kereu ze kena bam lei.

¹⁵Jerusalem ge tingchu kiebe riâ gepût benai gechâk ne bam de ra, zai Shephela ge ’ndutchî kiebe riâ kedarching ne bam de ra heguang ne tew gai bei de lei.

¹⁶Zai Ijipram gene benai Kueram gene hekun ramme Solomonbe ne teiwang gai de lei, zai heguang gu helîkahedetme ne Kueram gene chiramme penui ne lui de lei.

¹⁷Ijipram gene hekun-timriang kat ge gepût shekel haî seruk hang zai hekun kat ge haî kat ze rengeu hang teiwang de lei; chipau luigum ze penui dage airamme ze Hethme gu heguangme leine benai Siriaram heguangme dage ’mputtat te lei.