Read Zeme Naga 2 KRONIKIL 10 Bible Online

2 KRONIKIL 10 - Zeme Naga bible

2 KRONIKIL 10

¹Rehoboambe je heguang hang sum gai ra Israelme ’nteumena Shekem ’mbe tattibe ziegene Shekem ’mbe Rehoboambe du tat ti de lei.

²Zai Nebatbe na Jeroboambe chize seu lu dege (heguang Solomonbe dagene pa pakpat ze bamgaidibe bâm Ijip ge pa bam dadegeu) Ijipram gene Jeroboambe helatwang kadai de lei.

³Dadege â pechu kû ra penui ne lang gai de lei; zai Jeroboambe benai Israelme ’nteumena wang lu Rehoboambe je,

⁴“Ningnui peu ne anui put tewrit kai bei de lei. Chidaze chunage ning peu gu tâ keritbe benai anui peireige ning peu gu guangkam keritbe bambe ze tew’ncha gai zu lau, chidezai ning guâ anui ’nggua gu lei,” ze kacheu de lei.

⁵Pa ne penui je, “Hezie kechum lungge a dage wang dai lau,” ze acheu bei de lei. Chidadege â baudime tat ti de lei.

⁶Chidadege â Heguang Rehoboambe ne, pe peu Solomonbe ringbe ting ge gechîngme pe peu taige bamme bau dage mâ-’nneu gai ze, “Ai baudime kuâ kakrabe tak hangge ’ndaigum ze ningnui ne achu rang gai ra lau?” kacheu de lei.

⁷Dadege penui ne pechu, “Nang ne penui je hung ze penui suigut tew zai sam keyibe ne penui je ’mpau gai bei zai â, betingbeta penui ne ning guâ ka’ngguame chang ze bam gu lei,” ze acheu bei de lei.

⁸Kane gechîngme bau ne pechu mâ-geteigaibe sam tuâ nan ze rehangme pe dagene bamchîngchume pe dage bamme dagene mâ-’mmêt kadai de lei.

⁹Zai pa ne penui je, “Aime baudime ne, ‘Ning peu ne anui peireige guangkam tuagaibe ze tew’ncha gai zu lau,’ ze achu kacheume je I kakrabe tak hangge ningnui ne ’ndaikau tew lei, kacheu lau,” ze acheu bei de lei.

¹⁰Dadege rehangme pe dagene bamchîngchume bau ne pechu, “Baudime ne ningchu, ‘Ning peu ne anui put tewrit kai bei de lei, kane nang ne anui hang tew’ncha gai lau,’ kacheume je nang ne, ‘A bakêrang kelentîne â a peu kia sua â heseu bi lei,

¹¹zai chunage a peu ne ningnui peireige guangkam keritbe tuagaibe ge I ne ningnui gu guangkam ge kaisuâ gai gu lei. A peu â ningnui je kakegitbe ria ne tewsâ bei lei, kane I â ningnui je heruîmegapui ramme ne tewsâ gu lei,’ acheu ze penui je salia ra lei,” acheu bei de lei.

¹²Chigum ze heguang ne, “Pakechumbe mai ge a tailam wang dai lau,” ze ranggaibeibe luigum ze pakechumbe mai ge Rehoboambe tailam Jeroboambe benai pe gu ziemmena ’nteumena wang de lei.

¹³Dadege â heguang ne gechîngme bau mâ-geteiliabe ’ngking mak ze penui je sam ’ntangchi ze kak kai bei de lei,

¹⁴rehangme bau ne mâ-geteiliabe luigum ze heguang Rehoboambe ne penui je, “A peu ne ningnui gu guangkam daprit kai bei de lei, kane chize I ne kaisuâ gai gu lei; a peu â ningnui je kakegitbe ria tei lu tewsâ lei, kane I â ningnui je heruîmegapui ramme ne tewsâ gu lei,” ze penui je acheu bei de lei.

¹⁵Chigum ze baudime kuâ heguang ne ’ngking gai mak tai de lei; Tingwang ne Nebatbe na Jeroboambe dage Shilo’mpeu Ahijabe dagene pe sam sagai’ndibe tewpui gai le ra hangge Hera ne tâ wangchang ra tew gai bei daseu.

¹⁶Zai heguang ne penui kuâ ’ngking mak lei be Israelme ’nteumena ne ngau lu dadege heguang je baudime ne, “Dabidbe dagene anui dam hang ngaurabe ’ndaikau la lau? Jessibe na dagene anui nguaheurabe mâ de ga lei. Hei, Israelme nung gau, ningnui ’nteumena ningnui gu paîki ’mbe tatchu lau! Dabidbe gau, chunage ning ki deu hangge pie le lau,” ze kacheu de lei. Chigum ze Israelme ’nteumena penui gu paîki ’mbe tat kam di de lei.

¹⁷Kane Judaram gu namdi ramme ge bamme Israelme peireige Rehoboambe ne samram ze bam de lei.

¹⁸Chidadege â tâtewhiteume peireige kereîpeu Hadorambe je heguang peu Rehoboambe ne lang gai bei ze Israelme ne pechu tingchu ne tuâchat ’ndi de lei. Dadege heguang Rehoboambe ze Jerusalem ’mbe pak kai de ra hangge kelua ze pe gu timriang ge keuchu gai de lei.

¹⁹Chigum ze nemai riâ Israelme Dabid ki peireige ’nggi ze bam lei.