Read Zeme Naga 2 KRONIKIL 12 Bible Online

2 KRONIKIL 12 - Zeme Naga bible

2 KRONIKIL 12

¹Rehoboambe rezietei ze samrambe peranchichu gai dege Tingwang gu hingde benai Israelme pe dage bamme je sâu kam gai ’ndi de lei.

²Penui ne Tingwang dage lungsang tewtadibe ziegene heguang Rehoboambe kaheguangbe pamengeube kum ge Ijipme gu heguang Shishakbe Jerusalem peireige,

³hekun-timriang chang kat ze haî kat tei lu, zai hekun hereikangme chang riakserukme je ngua lu wang ze ka’nggi de lei. Zai Ijipram gene wangme Libiame, Sukki-ime, zai Ethiopiame sei kamlakme pe dage wang de lei.

⁴Dadege â Juda namdi peranchibe ramme pa ne lu lu Jerusalem riâ wangchang di de lei.

⁵Chidadege â Shishakbe ziegene Jerusalem ge pakwang’ndui gai ze bamme Judaram gu heguangsinme ramme benai Rehoboambe dage kemeu’mpeu Shemaiabe wang lu penui je, “Tingwang ne aigum ze rang lei, ‘Ningnui ne achu sâugai’ndibe ziegene I du ningnui je Shishakbe ba ge sâu gai de lei,’ ze kacheu de lei,” ze acheu bei de lei.

⁶Chidadege â Israelme ram ge heguangsinme benai heguang penui lung keikut kêu lu ze, “Tingwang â kapelingbe kau lei,” ze kacheu de lei.

⁷Tingwang ne penui lung keikeubeibe ngau lu dege, Tingwang gu sam Shemaiabe dage wangkeu ze, “Penui ne penui lung keikeu gai ze la de lei; I ne penui je tew’ngga ra mak lei, kane I ne penui je gêsa ’nchuige â ’nripat kai gu lei zai Shishakbe ba gene Jerusalem peireige I ne a lumpum ruîkeu gai ra mak lei.

⁸Acheuleusede penui ne a guâ ka’ngguabe ge benai heram ramme gu heguangram guâ ka’ngguabe ge gechâmbe tak peize chî ra pe guâ ka’ngguame penui chang ze bam gu lei,” ze kacheu de lei.

⁹Chigum ze Ijipme gu heguang Shishakbe Jerusalem ’nggi ra hang de lei; pa ne Tingwang ki gu heurâ ramme benai heguang ki heurâ ramme lutat ti de lei; mâgetaleine pa ne lutat ’ndi de lei. Solomonbe ne tewgaibe gechâk hinggei ramme ze du pa ne lutat ’ndi de lei;

¹⁰zai chiramme kelei ge heguang Rehoboambe ne hetageî ne hinggei ramme tew gai de lei, zai chize heguang ki ge kemuireîme, besuitewme ba ge reî ra pei gai bei de lei.

¹¹Zai heguang ne Tingwang ki ge gut tânege chiramme ze kereîpeu ne tei lu pechu nguagut kai lu dege tatpat dai ze kereîbeki ge kai gai de lei.

¹²Zai pa ne pe lung keikeu gai bei dadege, Tingwang lumpum pe dagene tat dai di de lei, tew’nsia ’nchichiak kai mak zeu; chipau peireige du Juda ze yi-sang-yi bam di de lei.

¹³Chigum ze Rehoboambe pe runne pechu teichu gai lu heguang ze bam de lei. Rehoboambe pa heguangchu gai dege pe tingkum hedai ze kat chang di de lei, zai Jerusalem ge pa ne kum kereu ze sena heguangsap kai de lei, Tingwang ne pe ji bamrabe bâm hangge Israelme zat leine ruagene namdi kelânggaibe gezeu; pe pui ji â Ammon’mpui Naamale de lei.

¹⁴Pa ne Tingwang je peu ra pe lung peipatmakbe ziegene pa tâsiabe tew gai ’ndi de lei.

¹⁵Chunage Rehoboambe ne tâtewbe raîlangbe gene chu ze nâlangbe changbe rasam ze kemeu’mpeu kena Shemaiabe benai Iddobe rasam rawgaibe leisikuak ge raw gai mak ti lau? Rehoboambe benai Jeroboambe kakge herei sau mak bam bam lei.

¹⁶Zai Rehoboambe ze pe peume dage jeikeu gai di de lei, zai pechu â Dabidbe gu namdi ge bai gai bei de lei, zai pe na Abijabe ne pa kelei ge kaheguang de lei.