Read Zeme Naga 2 KRONIKIL 14 Bible Online

2 KRONIKIL 14 - Zeme Naga bible

2 KRONIKIL 14

¹Chigum ze Abijabe pe peume dage jeikeu gai di de lei, zai penui ne pechu Dabidbe gu namdi ge bai gai bei de lei; zai pe na Asabe ne pa kelei ge heguangsap te lei. Asabe ne kaheguangbe ting â heram ge tingkum kereu heteu-herei bam mak lei.

²Zai Asabe ne Tingwang pe Rapeu mikngau ge keyibe benai ka’nzeibe tew ze bam lei.

³Pa ne hesangzatme gu herâtewbe-kaira ramme benai pebâm hube ramme lutat ’ndi lei, zai Asherah rapui luî ramme benai bechia kedibe ramme tewkau gai,

⁴zai Judame je Tingwang penui pau-pai Rapeu je peu ze hingde benai samdiegaibe ramme tei’mmi ze bam ra samdie gai bei de lei.

⁵Pa ne Juda gu namdi ramme ge pebâm hube ramme benai mâ-perîmyibe rube-kaira ramme du lupat kam ’ndi de lei. Zai pa samrambe kang gene heguangram ze temichai ze bam de lei.

⁶Pa ne Juda ge namdi peranchibe ramme tew gai bei de lei, heram ge lungkatemibe bam dadegeu. Tingwang ne pechu desieyibe peigaibeibe ziegene chipau tingkum ramme ge pe hangge herei bam mak lei.

⁷Dadege pa ne Juda je, “Anui ne aipau namdi ramme tew gai lu chige kerie ramme, heki kehube ramme, keriekemui ramme, zai kerie’ngkamcha ramme tew gai kei lei; anui ne Tingwang anui Rapeu je peubeibe ziegene heram ze anui gu chang larei lei; anui ne pechu peu bei ze pa ne anui je mâ-mâ bâm leine ge desieyibe pei gai bei de lei,” ze kacheu de lei. Chigum ze penui tewchu lu ze lung’ntua ze bam de lei.

⁸Zai Asabe dage hereikangme bau hinggei kedibe benai hengeu ramme puame ziemmena chang haî chum, zai Benjamin gene hinggei kecheibe ramme benai bai’mpi puame ziemmena chang haî na ze riakdesat bam lei; aime ’nteumena ze gekuume, peranchime de lei.

⁹Ethiopia’mpeu Zerabe hereikangme bau million kat zai timriang haî chum tei lu penui je ’nggi ra pat ze Maresha riâ wangchang gai de lei.

¹⁰Zai pechu hedau ra Asabe pat te lei, dadege Maresha ge Zephatha kâm ge penui hang lu herei ra pa’nria saptap kai de lei.

¹¹Dadege Asabe ne Tingwang pe Rapeu je kû gai ze, “Hei Tingwang, peranchime benai peran-game kakge ’ngngâ ra nang gumbe kau mî de ’ngga de lei, Hei Tingwang anui Rapeu gau, anui je ’ngngâ gai lau, ningchu anui ’nnumtew ze lamui lei, zai ning ji gene aime baudime je ’nggi ra anui zuawang de lei. Hei, Tingwang nang ne anui Rapeu de lei; peize ningchu ziemmena ne duî se lau,” ze kacheu de lei.

¹²Chigum ze Asabe benai Juda masua gene Ethiopiame je Tingwang ne duî gai bei ze Ethiopiame pak ti de lei.

¹³Asabe benai baudime pe dage bamme ne penui je Gerar riâ gua’nsachang de lei, zai Ethiopiame â kâukeu ze chai’nzâu gai di de lei; Tingwang benai pe gu hereikangme masua gene penui je â tew’nsia kam gai bei dadegeu. Judaram ziemmena ramme ne hereichâ misongga lutat ti de lei.

¹⁴Tingwang je kehingbe penui peireige bambe ziegene Gerar huâzie ge namdi ramme bambe leine penui ne tew’nsia gai bei de lei. Penui ne namdi pelane tew’nsia ’ndi de lei. Chiramme ge hereichâ ramme misongga bam bei dadegeu.

¹⁵Zai penui ne kaurui ramme bambe hetiampaîki ze tew’nsia gai lu meli benai put-hu ramme misongga teitat ti de lei. Chipau chângge penui Jerusalem ’mbe helatwang dai di de lei.