Read Zeme Naga 2 KRONIKIL 15 Bible Online

2 KRONIKIL 15 - Zeme Naga bible

2 KRONIKIL 15

¹Odedbe na Azariabe peireige Hera gu Herui wangkeu gai de lei,

²zai pa Asabe je hedau gai ra pat te lei, zai pa ne pechu, “Asabe gau, zai Judame benai Benjaminme leine gau, a kuâ ’ngking gai lau: Ningnui Tingwang dage bambe luage pa ningnui dage bam lei. Ningnui pechu peu dizai â ningnui ne pechu peudau gu lei, kane ningnui ne pechu put kai ’ndizai â, pa ne ningnui je put kai gu lei.

³Beting acheutiege Israelme â Hera gesang zai mâ-geteichime, tingkume zai hingde ’ngga ze lung lei;

⁴kane penui duângga dege Tingwang Israelme Rapeu dage penui ’nreiwang ze pechu peu lei, pechu penui ne peudau de lei.

⁵Chipau ting ramme ge heram ramme gu pedeiname leine je tewkeleu ze bambe ziegene mige hela ’mbe tat, zai hela ’mbene wang ze bamme dage desieyibe lungkatemibe bam mak lei.

⁶Hera ne penui je mi duânggabe zat gechâm-châmbe ramme leine ne tewhereu ze bambeibe ziegene hezat ne hezat karai zai heram ne heram karai ’nggi ze penui je â tewhitruai gai bei de lei.

⁷Kane ningnui â kuugiereu ze bam lau! Ningnui tâtewbe hî ngau gu daze, ningnui ran-ga ze peize bam se lau,” ze kacheu de lei.

⁸Aipau sam ramme Odedbe na Azariabe gu kemeu sam ramme Asabe seu lu dege pa kuu di de lei, zai mi katenatbe heraluîtewbe ramme ze Judaram benai Benjaminram zai Ephraimram loa ge namdi ramme bambe gene lutua kam ’ndi de lei, zai Tingwang ki namsûng Tingwang gu herâtewbe-kaira bambe ze pa ne teleu gai kadai de lei.

⁹Zai Juda benai Benjaminram ’nteumena zai Asabe dage Tingwang pe Rapeu ngua lamui lei be seu lu dege Israelram gene baudime pe dage wanggaime, Ephraim, Manasse, zai Simeon zatme penui dage lung ze bamme ’nteumena je pa ne nguawang’ndui gai de lei.

¹⁰Asabe kaheguangbe tingkum kereu ze mengeu wangchangbe tingkum gu pakechumbe kêu ge Jerusalem ge pa ne penui je nguawang’ndui gai de lei.

¹¹Hereichâ ramme penui teiwangbe gene getumsei haî sena zai meli chang sena tei lu ze chipau mai ge Tingwang dage penui ne herâtew gai de lei.

¹²Zai penui lung leine benai penui keringbe leine ne Tingwang penui paume Rapeu je peu ra hang samhatbe tewbe ge penui gut te lei;

¹³zai mi-mige Tingwang Israelme Rapeu je peumakme je â hename mei nune gechîngme mei, ’mpeumi mei nune ’mpuimi mei lêuzaidu tewchat ne ra lei.

¹⁴Tingwang dage hekuâchibe ne, ka’ngkiakbe ne, zai hegeîluîkie benai mâkie ramme tei ze penui sam kadeseu de lei.

¹⁵Deseutewbe peireige Judame ’nteumena ne penui suiyigaihâ de lei; penui ne penui lung leine ne deseu ze lungsang ne nei ze pechu peubeibe ziegene pechu penui ne peudau lu de lei; dadege â Tingwang ne penui bambe bâm leine ge lungkatemibe penui je pei gai bei de lei.

¹⁶Heguang Asabe ne, pe pui Maakale je ’nsangdu pa ne mi katenetbe Asherah luî hang tewgaibeibe ziegene pa heguangpui changbambe gene pechu tei’mbiatua gai bei de lei. Asabe ne Asherah luî ze bikau lu, kedeîdesuiruilube ze Kidron geuki gene rû gai ’ndi de lei.

¹⁷Kane pebâm kehube ramme ze â Israelram gene lutua mak tai lei. Acheuleusede Asabe â pa keringbe ting tâluî ge pe lung ge mâ de kesiabe ’ngga ze lung lei.

¹⁸Zai pa benai pe peu gu pei ra hatkailube kela ramme, gepût, gechâk, zai heli kerua ramme Hera ki ge pa ne teiwang gai de lei.

¹⁹Zai Asabe heguangtewbe tingkum himreu ze mengeu kum wangchang mak tâne â herei mâ de ’ngga di de lei.