Read Zeme Naga 2 KRONIKIL 16 Bible Online

2 KRONIKIL 16 - Zeme Naga bible

2 KRONIKIL 16

¹Asabe ne kaheguangbe tingkum himreu ze seruk chang dege Israelram heguang Baashabe ne Judaram ’nggihang de lei, zai peize mî de Judaram heguang Asabe tailam ’ngkiâwang, zai ’ngkiâtat mak ra Rama namdi tew gai de lei.

²Chidadege â Asabe ne Tingwang ki benai heguang ki gu kerua kahekâmbe gene gepût benai gechâk lu lu Damaska ge bambepeu, Siria heguang Ben-hadadbe tailam lang gai ze,

³“A peu benai ning peu kakge gum ze peize anai kakge du puinakattew ze bam lau; pie le lau, ning dage I ne gepût benai gechâk lang gai lei; tat ze Israelram gu heguang Baashabe dage nang nguapuinakattewbe sau du lau, chidezai peize pa a dagene ’mbia de ra hangge zeu,” kacheu de lei.

⁴Dadege â Ben-hadadbe ne heguang Asabe sam pheu gai ze pe gu sipai haîmuiteime ramme je Israelram gu namdi ramme ’nggi ra lang gai bei de lei, zai penui ne, Ijon, Dan, Abel-maim zai Naphtaliram gu kerua hekâmgaibe namdi ramme lu ’ndi de lei.

⁵Zai chize Baashabe seu lu dege pa Rama tewbe ze tew ta di ze tewsau gai di de lei.

⁶Chidadege â Heguang Asabe ne Judaram pelane lu ’ndi de lei, zai Baashabe ne Ramaki tewbe tingchu benai heching ramme penui ne tei kam lu de lei, zai chiramme zene pa ne Geba benai Mizpa tew gai de lei.

⁷Chipau ting ge kemeu’mpeu Hananibe Judaram heguang Asabe tailam wang de lei, zai pechu, “Nang ne Siria heguang peireige ’nnumtew di ze Tingwang ning Rapeu peireige ’nnumtewtadibe ziegene Siria heguang gu hereikangme ning ba gene ’mbiapat tu de lei.

⁸Ethiopiame benai Libiame â hereikangme penui bau kiebe kau, zai timriang benai hekun hereikang misongga bambe kau ramme mak mei? Sede Tingwang peireige nang ne ’nnumtew ze bambeibe ziegene pa ne penui je ning ba ge pei gai bei de lei.

⁹Tingwang mik â kedeirei pelane ge, ailia, ailia rakreu ze bam lei, pe hangge penui lung ge heziâkga ze lungme ran tew’nchigairabe hangge neu. Nang ne kemieliangtew ze aipau ’nchui ge tâtew gai ’ndi de lei; chuna gene nang herei’nggi gu de lei,” ze kacheu de lei.

¹⁰Chidadege â Asabe kemeu’mpeu peireige aipau sam ziegene pe lumpum-desang di ze pechu kebangki ge hekai kainam gai ’ndi de lei. Zai chipau peireige du Asabe ne ziemmena hanggesame je ’nzaîmeluisui ze tewsâchu di de lei.

¹¹Asabe tâtewbe rasam raîlangbe gene nâlangbe chang ze Judaram benai Israelram gu Heguangme gu leisikuak ge raw gai de lei.

¹²Asabe pa kaheguangbe tingkum himreu ze sekui chang dadege pe pî ge geteube rarît gut kai di de lei, zai pa geteube herarît ze chuk ti de lei; sede pe jâm ne punghereu bam sede Tingwang je pa peu mak lei, kane kedeirei ge tewka’mmime dagene tew’mmi ra peu bam lei.

¹³Dadege Asabe pa kaheguangbe tingkum hedai ze kat chang dadege pe peume dage jeikeu gai di ze pa chai di de lei.

¹⁴Pa ne pe runne pe raw hang Dabidbe gu namdi ge bûnggailube ge penui ne pechu bai gai bei de lei. Mâ-perîmyibe hang teleuchime ne mâ-perîmyibe moîne ramme (reheu ramme) teleugaibe zene puigit-bambe gechîngkuak ge penui ne pechu ’njei gai bei de lei, zai pechu hengêutewliabe hangge penui ne hemi keliêhiu gai de lei.