Read Zeme Naga 2 KRONIKIL 17 Bible Online

2 KRONIKIL 17 - Zeme Naga bible

2 KRONIKIL 17

¹Pe na Jehoshaphatbe zene pa kelei ge samram de lei, zai Israelme je herei’nggi ra pe runne pe ran tew’nchi ze bam lei.

²Judame gu namdi peranchibe ramme leine ge pa ne hereikangme je kai de lei, zai Judaram ge benai pe peu Asabe ne lu’ndibe Ephraim gu namdi ramme ge pa ne hereikangme bâm kedibe ramme kai de lei.

³Keraîbe ting ge pe peu tatbe ’mpuî ge pa tat ze bambeibe ziegene Tingwang ne Jehoshaphatbe dage nguabam bei de lei; Baal ramme je pa â peu mak,

⁴kane pe Rapeu je peu ze Israelme zat gum tat mak ze, pe gu samdiegaibe ramme ge tat ze bam lei.

⁵Chipauziegene Tingwang ne heguangram ze pe ba ge tew’ntip kai bei de lei; zai Juda leine ne Jehoshaphatbe dage ’mpuâ mei gai ze bam lei; zai pa heu ze pe ngeudi-desang ze bam lei.

⁶Tingwang ’mpuî ramme ge pe lungditau ze bam lei; zai chipau peireige du Judaram gene pebâm hube ramme benai Asherah luî ramme pa ne lu kam ’ndi de lei.

⁷Pa kaheguangbe pakechumbe kum ge Judaram namdi ramme ge mâ-getei gai ra pe gu heguangsinme Ben-hailbe, Obadiabe, Zekariabe, Nethanelbe, zai Mikaiabe je pa lang gai de lei;

⁸zai Lebime, Shemaiabe, Nethaniabe, Zebadiabe Asahelbe, Shemiramothbe, Jehonathanbe, Adonijabe, Tobijabe zai Tobadonijabe je penui dage lang gai de lei; zai tingkupeu hang Elishamabe benai Jehorambe je aime Lebime dage langherua gai lei.

⁹Zai Judaram ge Tingwang gu hingde leisikuak tei lu penui ne geteilia de lei; Judaram namdi ramme leine ge ziemmena ruage penui ne tatrua ze geteilia de lei.

¹⁰Zai Judaram huâzie ge heram ramme gu heguangram leine peireige Tingwang je kehingbe lungtak wangtâu kam di de lei, zai Jehoshaphatbe peireige penui herei’nggi mak bam lei.

¹¹Philistinme hanggesame ne Jehoshaphatbe dage kela ramme benai ’mpuâ hangge gepût teiwang gai de lei; zai Arabme ne du pe dage meli’nsei ramme chang sena ze haî sena, zai meli ramme chang sena ze haî sena teiwang gai de lei.

¹²Dadege â Jehoshaphatbe ze dibi-bichu di de lei. Pa ne Judaram ge keriengdi ramme benai keruaki ramme tew gai de lei,

¹³zai pe gu kerua misongga gekuagaibe ramme Juda namdi ramme ge bam lei. Pe gu hereikangme ramme ziemmena pe ranchibe kau ramme Jerusalem ge bam de lei.

¹⁴Aize penui kiria bambe tak gene penui je riamteibe tak te lei. Juda kibau ruage changme peireige sipai ge kanguame: Hereikangme muiteipeu Adnabe, pe ranchime gekuume bau chang haî chum,

¹⁵zai pe sin ge Jehohananbe hereikang muiteipeu dage ziemmena chang haî na ze riakdesat,

¹⁶zai pe sin ge Tingwang guâ ka’ngguabe ge helêurau ze tâtewpeu Zikribe na Amasiabe dage ziemmena peranchime gekuume chang haî na bam lei.

¹⁷Benjamin kibau ruage ziemmena peranchi ze gekuupeu pe dage bai’mpi benai hinggeiteime ziemmena chang haî na,

¹⁸zai pe sin ge Jehozabadbe, pe dage hereikerua tei’nsanglume ziemmena chang haî kat ze riakdesat bam lei.

¹⁹Aime bau ze Judaram pelane ge namdi peranchibe ramme ge heguang ne (hereikang) linggaime je sâu ze heguang guâ ’nggua ze bamme bau de lei.