Read Zeme Naga 2 KRONIKIL 18 Bible Online

2 KRONIKIL 18 - Zeme Naga bible

2 KRONIKIL 18

¹Zai Jehoshaphatbe dage keheube benai pengêudibe ne pui ze bam de lei; zai pa Ahabbe dage (kelaktewbe lam gene) ’nguahegai ze bam lei.

²Patingkum riak pelane hangdibe châng dege Samaria ge Ahabbe tailam pa wangkeu de lei. Zai Ahabbe ne meli ramme benai getumsei ramme misongga pe hangge benai pe dage bamme baudime hangge tewchat kai bei de lei, zai Romoth-gilead je ’nggi ra hang ra pechu karehi de lei.

³Israelram heguang Ahabbe ne Judaram heguang Jehoshaphatbe je, “Romoth-gilead ’mbe anai tat ra mei?” kacheu de lei. Pa ne pechu, “I ze nang riâ da, zai a gu ziemmena ramme ze ning gu ziemmena ramme riâ de lei, ning dage anui nguaherei’nggi gu lei,” ze kak lei.

⁴Dadege Jehoshaphatbe ne Israelram heguang je, “Tingwang dage mâ-’mmêt kai raî le lau,” ze kacheu de lei.

⁵Chidadege â Israelram heguang ne kemeume ramme ziemmena haî medaime bau je nguawang’ndui gai lu, penui je, “Anui Romoth-gilead peireige herei’nggi ra tat ra mei nune I ne gesut kai be ra lau,” ze kacheu de lei. Dadege penui ne, “Hang du lau; chize Hera ne heguang ba ge pei gai gu lei,” ze acheu bei de lei.

⁶Kane Jehoshaphatbe ne “Anui ’mmêt ra Tingwang gu kemeu kêdabe kau aige ’ngga di de mei?” ze kacheu de lei.

⁷Dadege Israelram heguang ne Jehoshaphatbe je, “Ziemmena hangkat pe dagene anui Tingwang dage ’mmêtrapeu hang Imlabe na Mikaiabe lamui rei lei; kane pa â a deu hangge kesiabe runne ranggaichi zangno, mâdau du mâ-keyibe rangliamakbe ziegene I pechu ngaugailak lei,” ze acheu bei de lei. Zai Jehoshaphatbe ne, “Heguang ne peize aigumbe sam sa se lau,” kacheu de lei.

⁸Chidadege â Israelme gu heguang ne saibe hangkatpeu je kû lu pechu, “Imlabe na Mikaiabe je nguawang kelua lau,” acheu bei de lei.

⁹Zai Israelram heguang benai Judaram heguang Jehoshaphatbe penai gu heguang-bamrâ ge penai puâ kai lu ’ntau bam de lei; zai penai hangna ze Samaria gu keriekemui gutbe ge chêuneibe kechaîpung ge ’ntau bam lei; zai penai suagene kemeume ramme kemeu sam sa ze bam lei.

¹⁰Dadege Kenaanabe na Zedekiabe pa ne pe hang hegeî’ngkia ramme hang teleu lu ze, acheu sa ze, “Tingwang ne aigum ze rang lei, ‘Ai mâ-kie ramme tei ze Siriame ’ngga kam mak tâne penui je ningnui tewchat kam ne ra lei,’ acheu zeu,” ze kacheu lei.

¹¹Zai kemeume ’nteumena ne chipau luigum ze kemeu sam sa de lei, acheu ze sa ze. “Romoth-gilead ’mbe hang lu ze ngam le lau; Tingwang ne chize heguang ba ge pei gai gu lei,” ze kacheu de lei.

¹²Dadege Mikaiabe je kû ra tattipeu hepâupaupeu ne pechu, “Pie le lau, kemeume gu sam ramme kat gum ’nzuâsiakbe ze bambe gene heguang hangge keyibe sa gai la de lei; ning sam du peize penui ruage hangkat gu sam gum ze sahezuâ gai be lau,” ze kacheu de lei.

¹³Kane Mikaiabe ne, “Tingwang ringbambe luigum ze a Rapeu ne rangbe ze I sa gu lei,” ze kacheu de lei.

¹⁴Zai pa heguang dage wang dege, heguang ne pechu, “Mikaiabe gau, Romoth-gilead je herei’nggi ra anui tat ra mei nune I ne gesut kai be ra lau?” ze kacheu de lei. Dadege pa ne kak ze, “Hang ze duî le lau; penui je ning ba ge pei gai bu lei,” acheu bei de lei.

¹⁵Kane heguang ne pechu, “A dage nang mâdu sa mak ra, kane Tingwang ji gene samsang runne sa ra lei be lua’ndaikie ning dage I rangkenuî gai bam ra lau?” acheu bei de lei.

¹⁶Dadege pa ne, “Meli ramme hangge melireîpeu ’nggabe gum ze Israelme ’nteumena peloa ramme ge rarip bambe (penui je) I ngau de lei; zai Tingwang ne, ‘Aime â penui dage kereîpeu ’ngga lei, pe run runne peize pe ki lam’mbe temichai ze tat kam zu lau,’ kacheu lei,” ze acheu bei de lei.

¹⁷Zai Israelram gu heguang ne Jehoshaphatbe je, “Pa ne a deu hangge kesiabe zangno, mâ-keyibe â kemeu sam sa gai ra mak lei be I ne ningchu rang gai mak ti lau?” kacheu de lei.

¹⁸Dadege Mikaiabe ne, “Chidaze Tingwang sam ’ngking le lau: Tingwang pe gu heguang-bamrâ ge ’ntaubambe zai tinggîm baudime ’nteumena pe ba hezat’mbia benai heku’mbia ge sapbambe I ngau lei;

¹⁹dadege Tingwang ne, ‘Châu ne Israelram heguang Ahabbe je choa gai ra lau, dezai peize pa hang ze Romoth-gilead ge chai de ra hangge zeu?’ kacheu de lei. Dadege hangkat ne kat sa zai kêdapeu ne kêdabe sa de lei.

²⁰Chidadege â herui zene pe sua ’mbe wang ze Tingwang suage sap kai lu, ‘I ne pechu choa gai ra de lei,’ kacheu de lei. Dadege Tingwang ne pechu, ‘’Ndaigumbe tak gene ra lau,’ kacheu de lei.

²¹Zai pa ne, ‘I ne zuapat ze kemeume ’nteumena mui ge heleiria karasabe kau chang ze bam gai gu lei,’ kacheu de lei. Dadege pa ne, ‘Nang pechu choa gai ra lei, chidezai nang tâ tewkuak ku lei; tat ze chigum ze tew zu lau,’ kacheu de lei.

²²Zai chipauziegene pie le lau, aime ning gu kemeume ramme mui ge Tingwang ne Herui karasabe kau kai ’nde lei; ning deu hangge Tingwang ne kesiabe sa gai ’nde lei,” ze kacheu de lei.

²³Chidadege â Kenaanabe na Zedekiabe wang’nna lu ze Mikaiabe je pe biapi kepei gai lu, “’Ndaibe ’mpuî gene Tingwang gu Herui ningchu mâ-salia ra a dagene tat ti lau?” kacheu de lei.

²⁴Dadege Mikaiabe ne, “Pie le lau, helungbe kisîam ge nang ’mbai ra gut dezai chipau mai ge nang ngau gu lei,” kacheu de lei.

²⁵Zai Israelme gu heguang ne, “Mikaiabe je tuî lu ze namdi gu laksaibe Amonbe benai heguang na Joasbe tailam teitat dai du lau,

²⁶zai, ‘Heguang ne Aipau peu je kebangki ge kai be lau, zai I yi ze helatwang dai mak tâne pechu tingku benai hedui ne kecheî-cheîne ze telakuâ lau, ze rang gai lei,’ ze salia lau,” acheu bei de lei.

²⁷Zai Mikaiabe ne, “Nang ne yize helatwang dai dizai â Tingwang ne a dage ranggaibe kau mak lei,” ze acheu bei de lei. Dadege pa ne “Ningnui ziemmename leine gau, ’ngking gai ka ni lau!” kacheu de lei.

²⁸Chigum ze Israelram heguang benai Judaram heguang Jehoshaphatbe Romoth-gilead ’mbe hang di de lei.

²⁹Zai Israelram heguang ne Jehoshaphatbe je, “I ne a luî tewchâm lu ze herei ge tat ku lei, kane nang â ning puâ kai le lau,” ze kacheu de lei. Dadege Israelram heguang ze pe runne peluî tewkakeli de lei; zai penui herei ’mbe tat ti de lei.

³⁰Zai Siriaram heguang ne pe gu timriang peireige besuitewme je samdie gai ze, “Ziemmena kecheime mei nu kedime mei zai du chime dage â ’nggi mak ze kane Israelram heguang peireige runne tew lau,” ze acheu bei de lei.

³¹Zai timriang ramme peireige besuitewme Jeshoshaphatbe je ngau lu dege penui ne, “Aize Israelram heguang de lei,” acheu bei de lei. Chidadege â pechu penui ’nggichu di de lei; dadege â Jehoshaphatbe ka’nrung de lei, zai Tingwang ne pechu ’ngngâ gai bei de lei, Hera ne penui je pe dagene kumtua gai bei de lei,

³²chize Israelram gu heguang mak te lei be timriang ramme peireige besuitewme ne ngau lu dege, pechu penui guaka’nsabe gene helatwang dai di dadegeu.

³³Kane hangkat ne pe gu bai’mpi lupat lu ze ka’ntatew ze kapkaibe gene Israelram heguang je pe gakam benai pe gu herei kerua pungbe kena kakge ze kaptau bei de lei; chidadege â pe gu timriang kakereipeu je, “I hejam de lei, ’nreiwang lu ze hereibâm gene achu pung’mbia gai zu lau,” kacheu de lei.

³⁴Zai chipau mai ge kahereibe ze lumpat ti de lei. Zai Israelram naimik keu gai dege heguang ze pe gu timriang gene Siriame lam ’ngngêu’nrik lu chai gai di de lei.