Read Zeme Naga 2 KRONIKIL 19 Bible Online

2 KRONIKIL 19 - Zeme Naga bible

2 KRONIKIL 19

¹Jehoshaphatbe, Israelram heguang je Jerusalem ge pe ki lam’mbe yi ze helatwang kadai de lei.

²Kane Hananibe na kemeu’mpeu Jehube pechu hedau gai ra pat ti de lei, dadege heguang Jehoshaphatbe je, “Nang â ziemmena kesiame je ’ngngâ ze Tingwang je ngaugailakme je hung ra mei? Aipau ziegene Tingwang dagene pe lumpum ze ning dage tat kai di de lei.

³Acheuleusede nang ne heram gene Asherah ramme je tew’nsia gai bei, zai ning lung kai ze Tingwang je nang peubeibe ziegene ning dage mâ-keyibe kecheîne ngau de lei,” ze kacheu de lei.

⁴Jehoshaphatbe Jerusalem ge lung ze bam lei; zai Beer-sheba gene peloaram Ephraim ’mbe ziemmena ramme ruage tatpat dai lu ze penui peume Rapeu Tingwang dage penui je nguawang gai dai bei de lei.

⁵Heram ge Judaram gu pe ranchibe namdi ramme leine ge pa ne samramme je sum gai bei de lei.

⁶Zai pa ne samramme bau je, “Ningnui tâtewbe ze ’nningchi le lau, ningnui â ziemmena hangge samrambe mak, kane Tingwang hangge samrambe kau de lei; ningnui samrambe ge pa la lei.

⁷Chidaze chunage Tingwang je kehingbe ningnui dage peize bam lau; ningnui tâtewbe ge ’ntîngchi lau, anui Rapeu Tingwang dage â kapelingbe teika’nsiabe du ga, zai kehung-ka’nrietewbe zai henimluteube tak du ’ngga lei,” ze kacheu de lei.

⁸Chipau peireige du Jerusalem ge Tingwang hangge samrambe tâ tew ra, zai hetû-herâ deu ramme samram ra Jehoshaphatbe ne Lebime benai tingkume hanggesame zai Israelme kiria ge besuitewme ramme je sum gai bei de lei. Jerusalem ge penui bâm ramme la lei.

⁹Zai pa ne penui je die gai ze: “Aigum ze ningnui Tingwang je kehingbe gene, lungsang gene zai ningnui lung leine gene tâtew ra de lei:

¹⁰Ningnui puiname penui gu namdi ge bamme dagene ziemmena peireige hejai tewpatbe hingde mei nune samdiegaibe hingde rawdiakkaibe ramme mei nune hingde tewgaibe ramme deu lam gene mei ze ningnui dage hetû wang tânege, Tingwang masuage penui tâtewmaube chang mak ra, zai pe lumpum ze ningnui peireige benai ningnui puiname peireige ge peize wangchang gai mak ra penui je ningnui ’mmigeteigai ra lei. Aigum ze ningnui tew ra de lei, dezai ningnui tâ tewmau ra mak lei.

¹¹Zai pie le lau, Tingwang deu tewrabe leine ge tingku chînglangpeu, Amariabe ningnui peireige lamui lei; zai heguang gu deu tewrabe leine ge Juda ki gu laksaibe Ishmaelbe na Zebadiabe lamui lei; zai Lebime ne tâmuipuame chang ze ningnui je nguatatew ra lei. Kuugiereu ze tâtew ra lei, zai Tingwang ne tâtew-ka’nzeime dage peize bam lau!” ze kacheu de lei.