Read Zeme Naga 2 KRONIKIL 2 Bible Online

2 KRONIKIL 2 - Zeme Naga bible

2 KRONIKIL 2

¹Chuna Solomonbe ne Tingwang ji hangge kellumki tew ra, zai pe hangge heguang ki hang teleu ra pe lung ge ’nning gai de lei.

²Dadege â heput keritbe pung ra ziemmena chang riaksena zai peloaram gene tingchu gia ra ziemmena chang riakdesat zai penui je reî ra ziemmena chang chum ze haî seruk aime je kai de lei.

³Zai Tira heguang Hurambe dage Solomonbe ne sam lang gai ze: “A peu Dabidbe je pa bam ra heki tew ra hang nang ne kedarching kelâng gai ze, pechu nang ne ka’ngngâ gum ze achu du ’ngngâ lau.

⁴Pie le lau, Israelme hangge betingbeta hang tew’nchigai’ndibe luigum ze ’ntakbambe mai ramme ge zai hekêu karchibe mai ramme ge zai Tingwang anui Rapeu gu kahengîbe mai hang diegaibe ramme ge pe suage mâ-perîmyibe ramme rû ra, zai pualiabe tingku peipat kai bam ra, zai hechua hegî rûkambe-râtewbe tew bam ra Tingwang anui Rapeu ji hangge heki I tew lu pe hangge diepat’nchi gai zi gu de lei.

⁵Anui Rapeu â hera ramme leine suadu dika’ngkeube ziegene heki I ne tewrabe ze â pe ji di-desang gu de lei.

⁶Kane Tinggîm zai tinggîm hulangbe ’nsangnedu pechu ruichim kam lak bam ze châu ne pe hangge heki tewgaichi ra lau? Pe masuage mâ-perîmyibe ’ntaurabe hang runne I â teleu ra yi zangno, I nung ze ’ndaikau lau, pe hang heki tew ra hangge zeu?

⁷Chidaze châu gumme a peu Dabidbe ne peigaime Juda ge benai Jerusalem ge bamme, tâtewchime dage nguatatew ra, gechâk, gepût, hetageî, zai hegeî tâ ge tewchime, zai gie’nzaibe, kegiebe, zai ka’nzaibe hangge teleu ze, zai chiramme tewchime je a dage lang gai lau.

⁸Lebanon ge ning guâ ka’ngguame heching-kuîbe tak chî lei be I chî daze kedarching, Sipres ching zai algumching ze Lebanon gene a dage lang gai lau, a guâ ka’ngguame ramme ne ning guâ ka’ngguame ramme dage,

⁹a hangge heching misongga ’ngngâ ze kedâ gai ra, heki I tewrabeki ze â pe ji di-kadesangbe zai mi ningdaulakbeki tew gu daseu.

¹⁰Ning tâtewme heching-kuîme hang I ne dekuîmoîne metrik ton chang na, barlimoîne metrik ton chang na, grepchî zau litar lâk medai zai olib taudui litar lâk medai pei gu lei,” kacheu de lei.

¹¹Chidadege â Tira heguang Hurambe ze pe samkela langgaibe gene Solomonbe je kak ze, “Tingwang ne pe gume je hungbe ziegene penui ruage heguang hang ningchu pa ne tew gai bei de lei,” ze kacheu de lei.

¹²Zai Hurambe ne du sa ze, “Tingwang Israelme Rapeu, tinggîm benai kedei tewgaipeu ne heguang Dabidbe je, Tingwang hangge kellumki benai pe runne pe hang heguang ki tew ra mâ-’nsapchibe benai mâ-gechîbe bambe kaningchingbe ’mpeumi napoine je pei gai bei de lei.

¹³“Chunage mâ-tewchibe ziemmena mâ-gechîbe bambe kau,

¹⁴Dan ge ’mpuimi ne lungkeube na Huramabibe je I ne lang gai ’nde lei, zai pe peu â Tira’mpeu de lei. Ning peu Dabidbe a pau gu ziemmena hechiâm tâ tewchime benai ning gu ziemmena hechiâm tâ tewchime dage gechâk, gepût, hetageî, hegeî, tingchu zai heching tâ ge nguatew ra, zai gie’nzaibe, ka’nzaibe, zai helabe paî gietikbe benai betachiâmbe paî ge tâ nguatew ra, zai pechu tâtew ra peibe leine ge tewchi ra pa â geteilube kau de lei.

¹⁵Chipauziegene chunage a pau ne sagai’ndibe dekuîmeu, barli, taudui, zai grepchî zau ze peize pa ne pe tâ ka’ngguame dage lang gai du lau;

¹⁶zai nang ne ka’nnangbe riâ anui ne Lebanon gene heching kuîlube ze liâm gene Joppa keloa ’mbe hedui gene teiwang ra de lei, chidezai nang ne chiramme Jerusalem ’mbe teihang ra hangge zeu,” ze kacheu de lei.

¹⁷Chidadege â Solomonbe ze pe peu ne hepiaurawlube chângge Israelme ram ge hesangme leine dage hepiau raw de lei; zai chige ziemmena chang haî kat ze rengeu ze kechum ze haî seruk ngau de lei.

¹⁸Pa ne penui ziemmena chang riaksename je heputkeritbe pungrabe ge kai, ziemmena chang desatme je peloaram gene tingchu kelat ra kai zai ziemmena chang chum ze haî serukme je tâtewme je reî ra kai de lei.