Read Zeme Naga 2 KRONIKIL 20 Bible Online

2 KRONIKIL 20 - Zeme Naga bible

2 KRONIKIL 20

¹Aipau chângge Jehoshaphatbe je herei’nggi ra Moabme benai Ammonme, zai penui dage nguabamme Meunme wang de lei.

²Ziemmena hanggesame ne wang lu, Jehoshaphatbe je rang gai ze, “Ziemmena baudime sungkling gene hela giam Edomram ’mbene ningchu ’nggi ra wang la de lei; zai pie le lau, penui (En-gedi kacheube) Hazazon-tamar ge la de lei,” kacheu de lei.

³Chidadege â Jehoshaphatbe hing di ze Tingwang je peuchu di de lei, zai Judaram lung leine ge teseureibe bam ra rangba gai de lei.

⁴Dadege Judaram ze Tingwang dagene ka’ngngâbe peu ra wangka’ndui de lei; Judaram namdi leine gene Tingwang je peu ra wangka’ndui de lei.

⁵Zai Hera ki sîam karchibe masuage Tingwang ki ge Juda benai Jerusalemme bau wangka’nduibe ge Jehoshaphatbe sap lu ze,

⁶“Hei Tingwang anui peume Rapeu gau, nang ze tinggîm ge Hera mak mei? Heramzatme gu heguangram leine peireige nang ne samram mak semei? Mî ne de ning dage saptingkangchi lak ra hang ning ba ge reziechibe benai tâtewchibe la lei.

⁷Hei anui Rapeu gau, nang ne aipau heramdeiname je Israelme masua gene kumtua gai lu ze ning kangpeu Abrahambe chaname dage betingbeta hangge pei gai ’ndi de mak mei?

⁸Zai penui ne chige bam lu ze ning hang kakellumbeki ning ji hanggene tew gai ze,

⁹‘Anui peireige hiazutkie, samrambe, herarît, nune herakûm kesiabe wang lêuzai â, ning ji â aipau ki ge bam daze aipau ki masuage benai ning masuage anui sap kai ze anui kahereube gene ningchu kû gu lei, zai nang ne seu lu tew’nring gai gu lei,’ ze sa de lei.

¹⁰Zai chunage pie le lau, Israelme Ijipram gene patbe ting ge, Ammonme, Moabme zai Seir loa’ntûm ge bamme, penui Israelme ne ’nggi ra hang nang ne peimaktaime, zai penui Israelme ne ’mbia di ze tew’nsiamaktaime—

¹¹pie gai ni lau, anui teilung ra nang ne heram peigaibeibe gene anui je kelitua ra wangbe ziegene anui je peiruîkadaibe tak zeu.

¹²Hei anui Rapeu gau, nang ne penui peireige samram gai mak ta ra mei? Anui je ’nggi ra wangme aime ziemmena baudime peireige anui â mâ de tewchi lak te lei. Anui â ’ndaikau tew ra mei be chî ta de lei, kane ningchu runne piekua de lei,” ze kacheu de lei.

¹³Chipau ting ge Judaram ’nteumena ne penui na ’ngngiêne ramme, penui nâu ramme, zai penui na ramme je ngua lu ze Tingwang suage sap te lei.

¹⁴Zai baudime wangka’nduibe ruagene Asapbe chaname, Lebi’mpeu, Je-ielbe na Benaiabe chapeu Zekariabe na Jahazielbe dage Tingwang gu Herui wangkeu gai de lei.

¹⁵Dadege pa ne, “Judaram leine benai Jerusalem ge bamme leine zai heguang Jehoshaphatbe gau, ’ngking le lau: Aigum ze Tingwang ne ningnui je rang lei, ‘Ai ziemmena baudime dagene hing se lau, zai ningnui duângga ze bam se lau; herei ze ningnui gu mak lei, kane Tingwang gu lei.

¹⁶’Nchuamai dezai penui je ’nggi ra wangkeu zu lau; pie le lau, Ziz ’mbe hangbe rehi gene penui hang gu lei; Jeruelram gu hênamkang gene tingbia ’mbia, peningkâm tattud kai dezai pekunghia ge penui je ningnui ngau gu lei.

¹⁷Ai kahereibe ge ningnui tingkang ra ’nnang me lei; ningnui bâm hang pezeu peu lu sapsip bam de lau, dezai Hei Juda benai Jerusalemme gau, ningnui hangge Tingwang ne duîgaibe je pie ze bam lau,’ acheu zeu. Hing se lau, zai ningnui duângga ze bam se lau; ’nchuamai dezai penui je ’nggi ra zuapat chu lau, zai Tingwang ne ningnui dage bam gu lei,” ze kacheu de lei.

¹⁸Chidadege â Jehoshaphatbe kedei ge pe peî ’ngkumkeu gai di de lei, zai Judaram leine ge benai Jerusalem ge bamme ne Tingwang je kellum ze Tingwang suage kâukeu gai de lei.

¹⁹Dadege â Lebime, Kohathme zai Korame ne hekuâ kechibe ne Israelme Rapeu Tingwang je toa ra sapchu gai de lei.

²⁰Zai hechuasûn ge penui chu lu Tekoaram hênamkang ’mbe tatpatwak ti de lei; zai penui tatpatbe luage, Jehoshaphatbe ne sap lu sa ze, “A kuâ ’ngking le lau, Judaram ge benai Jerusalem ge bamme gau! Ningnui Rapeu Tingwang je ’nnum’mmi lau, ningnui je tew’ntip kai bu lei; pe gu kemeume ramme je ’nnum ’mmi lau, ningnui duîtat bam gu lei,” ze kacheu de lei.

²¹Zai pa ne baudime dage mâ-nguagetei gai lu dege Tingwang dage heleutewrame benai hereikangme suage tatbe luage paîni kai lu, “Tingwang dage ningnui suiyi lau, pa hungka’ntipbe ze â betingbeta bam bam daseu,” acheu ze pechu toarame hangge pa ne sum gai de lei.

²²Zai penui leutew ze kellum lage Judaram je ’nggi ra wangme, Ammonme, Moabme zai Seir loa’ntûm ge bamme je peize hû’mpak kai be ra hangge Tingwang ne penui je lîmkuarabe hangge tew gai bei de lei.

²³Chige Ammonme benai Moabme Seir loa’ntûm ge lungme je hereipat ze penui je tew’ngga kam gai ’ndi de lei, zai Seir ge lungme je penui ne tew’ngga’nzâuchiak kai lu dege, penui karai kat-kat je tewchatkahelei dadegeu.

²⁴Hênamkang ge hereirikbe-kaira bambe ge Judame wangchang dadege baudime tailam penui pie’nrik kai de lei; zai pie le lau, kedei ge kechaipum ramme tuâtiam bam de lei; mî de (kechai) ’nreipat mak lei.

²⁵Jehoshaphatbe benai pe gume bau chime dagene hereichâ lu ra wang dadege, kauruidung dungdi, kerua ramme, paîni ramme, zai kerua pemîhungbe ramme penui ngaudau de lei, chiramme penui ne penui hang pungduî-duîbe riâ pung de lei. Hereichâ misonggabe ramme hezie kechum penui ne rui de lei.

²⁶Pamedaibe mai dege Beraka kâm gene penui wangka’ndui lei, chigene penui Tingwang je toa ze bam lei; chipauziegene chipau bâm ji ze nemai riâ chang ze Beraka kâm acheu ze kû bam de lei.

²⁷Chipau châng dege â Judaram ge bamme benai Jerusalem ge bamme penui ’nteumena helatwang kadai de lei, zai Jehoshaphatbe ne penui ruage besuiteupeu chang ze, Tingwang ne penui je penui teureime peireige penui suiyi’nta ze bam ra tewgaibeibe ziegene Jerusalem ’mbe penui suiyi-desang ze helatwang dai di de lei.

²⁸Penui ne ’nrabung kedibe, kecheibe, zai hegeîluîkie ramme tei lu Jerusalem ’mbe Tingwang ki ’mbe wang de lei.

²⁹Israelme teureime je Tingwang ne ka’nggi de lei be rasam penui seu dadege â heram ramme gu heguangram pelane ge Hera je hing kam di de lei.

³⁰Chidadege Jehoshaphatbe gu heguangram ge desieyi ze zîng bam di de lei, pe Rapeu ne mâ-leine ge temichai bam ra hang pei bei dadegeu.

³¹Aigum ze Jehoshaphatbe ne Judaram peireige heguang chang ze bam de lei. Pa heguangchube ting ge pe tingkum himreu ze mengeu chang di de lei, zai pa ne Jerusalem ge kum ’ngkai ze mengeu heguangsap kai de lei. Pe pui ji â Azubale de lei, zai chize Shilhibe na lei.

³²Pe peu Asabe tatbe ’mpuî ge pa tat ze bam lei, zai chigene pa hela ’mbe ’nriktat kai mak lei; Tingwang mikngau ge ka’nzeibe pa tew gai de lei.

³³Acheuleusede pebâm hube ramme â pa ne lutua gai mak tai de lei; baudime ne penui peume Rapeu dage penui lung peipat kai mak bam gerei lei.

³⁴Zai Jehoshaphatbe gu tâtewbe rasam ramme kêdadabe bepîbang gene betun changbe ze Hananibe na Jehube rasam rawgaibe leisikuak ge raw gai de lei, chiramme ze Israelram gu Heguangme gu leisikuak ge rawgut kai de lei.

³⁵Aipau chângge Israelram gu heguang helungriaksiabe ne tâtewpeu, Ahaziabe dage Judaram heguang Jehoshaphatbe ze herua gai di de lei.

³⁶Tarshis tatrabe gu dui’nneikuak ramme kateleube ge pechu pa herua gai di de lei. Zai penai ne Ezion-geber ge dui’nneikuak ramme teleupat kai de lei.

³⁷Chidadege â Jehoshaphatbe peireige Maresha ge bampeu, Dodabahube na Eliezerbe ne pe gu kemeusam pau gai ze, “Nang ne Ahaziabe dage heruagaidibe ziegene nang ne chiampatkaibe ze Tingwang ne tew’nsia gai gu lei,” ze kacheu de lei. Dadege â ’nneikuak ramme hedui ne chuinup’nsia kam nan ze Tarshis tatchi ta di de lei.