Read Zeme Naga 2 KRONIKIL 21 Bible Online

2 KRONIKIL 21 - Zeme Naga bible

2 KRONIKIL 21

¹Jehoshaphatbe pe peume dage nguajeikeu gai di de lei, zai Dabidbe gu namdi ge pe peume taige pechu bai gai de lei; pe na Jehorambe ne pa kelei ge heguangsap te lei.

²Pe sikiname ’mpeumi ramme, Jehoshaphatbe name bau bambe ze: Azariabe, Jehielbe, Zekariabe, Azariabe, Mikaelbe zai Shephatiabe lei; aime ’nteumena ze Judaram heguang Jehoshaphatbe name bau de lei.

³Penui peu ne penui je kela kedibe ramme, gepût, gechâk, zai kerua pemîhungbe ramme chige Juda ge peranchibe namdi ramme ze chak’mpam gai lu ze pei gai de lei; kane heguangram ze â Jehorambe je pa pei gai lei, pa ne meraipeu changbe ziegeneu.

⁴Jehorambe ne pe peu gu heguang-bâm ge chu’ntau gai ze pechu tew’ntip lu dadege pa ne pe kiname bau je, zai Israelram gu heguangsinme hanggesame je hiazutkie ne bichat kam gai ’ndi de lei.

⁵Jehorambe pa heguangchube ting ge pe kum ze himreu ze kena chang di de lei, zai Jerusalem ge pa ne kum desat heguang gai lei.

⁶Zai Ahab ki ne tew gum ze Israelram gu heguangme ’mpuî ge pa tat te lei; Ahabbe na je pa pe nâu lu dadegeu. Zai Tingwang mikngau ge pa tâsiabe tew gai de lei.

⁷Sede Tingwang ne Dabid ki je tew’nsia gai mak tai de lei, Dabidbe dage pa samhatkailube bambe benai betingbeta hangge pechu benai pe name dage hemibung pei gai ra pa samhatkai’ndibe ziegeneu.

⁸Pa bambe ting ge Edomram ze Judaram samrambe sie gene châmtat ti de lei, zai penui runne penui gu heguang tei’nsap lu bam de lei.

⁹Chidadege â Jehorambe ne pe gu sipai ge kanguame je ngua lu zai pe gu timriang ramme tei lu zuatat ti de lei, zai pa tingmuîzeu ge chu lu pechu benai pe gu timriang ge besuitewme je tuaguâ’ndime Edomme je pa ne lak bei de lei.

¹⁰Chipauziegene nemai riâ Edom ze Judaram samrambe-sie gene hekailak ze châmtat ti de lei. Chipau ting ge Libna ze du pe gu samrambe-sie gene châmtat ti de lei, pa ne pe peume Rapeu Tingwang je sâugai’ndibe ziegeneu.

¹¹Chipau peireige du Judaram ge peloaram ge pa ne pebâm hube ramme tew gai ze Jerusalem ge bamme je lungsangmakbe ’mpuî ge ngua gai ze Judaram je ngualietat kai ’ndi de lei.

¹²Dadege kemeu’mpeu Elijabe dagene samkela pe dage wang ze, “Ning peu Dabidbe Rapeu Tingwang ne aigum ze rang lei, ‘Nang ne ning peu Jehoshaphatbe tatbe ’mpuî ramme ge tat mak, zai Judaram heguangpeu Asabe tatbe ’mpuî ramme ge tat mak ze,

¹³kane Israelram gu heguangme ’mpuî ge tat ze Judaram benai Jerusalem ge bamme je, Ahab ki ne Israelme je lungsangmakbe ’mpuî ge ngua gai gum ze penui je lungsangmakbe ’mpuî ge nguagaibeibe ziegene, zai ning peu ki ge bamme ning sikiname, nang suadu yime je nang ne tewchat’ndibe ziegene,

¹⁴pie le lau, Tingwang ne, ning zatme peireige, ning name peireige, ning nâu ramme peireige, zai ning heurâ, mâ-keringbe zat leine peireige herarît kesiabe teiwang gai gu lei,

¹⁵zai nang ze du patingnai’nsangne ge, chi herarît zene ning rai luapatbi-bi ze hela ’ngkiâpat mak tâne ning railoa ge herarît bambe zene nang kum ze hereu-desang gai gu lei,’ acheu zeu” ze kacheu de lei.

¹⁶Dadege â Philistinme benai Arabme Ethiopiame taihia ge lungme ne Jehorambe peireige peize penui lumpumpatrabe hangge Tingwang ne tewkeleu gai bei de lei;

¹⁷dadege â penui ne Juda ze ’nggi ra hang lu, chize penui ne naî ’ndi de lei; zai heguang ki heurâ penui ngaudaube leine zai pe name ramme benai pe nâu ramme je teitat kam di de lei, pe na henalangbe peu, Jehoahazbe je runne ’nsak kai zangno pe name mî je du ’nsak kai ta di de lei.

¹⁸Aipau ramme leine chângge Tingwang ne pe railoa ge tew’mmichilaktibe rarît pat ra tew gai bei de lei.

¹⁹Nâlangbe ge â tingkum kena kam gai dege herarît ziegene pe railoa hela ’ngkiâpat ti de lei, zai pa huaipun ze chai gai di de lei. Pe peume hangge hengêutewliabe hemitewgaibe gum ze â pe gu ziemmename ne pengêutewbe hangge hemitew gai mak te lei.

²⁰Pa ne heguangchube ting ze pe kum himreu ze kena chang di de lei; zai pa ne Jerusalem ge kum desat heguang gai de lei; pa kechaibe peireige mî de pe suisia pe lunggailakbe tew mak ze pa chai di de lei. Pechu penui ne Dabidbe gu namdi ge bai gai bei de lei, kane heguangme gu heraw ramme ge â mak zeu.