Read Zeme Naga 2 KRONIKIL 25 Bible Online

2 KRONIKIL 25 - Zeme Naga bible

2 KRONIKIL 25

¹Amaziabe heguangchube ting ge pe kum ’ngkai ze mengeu di de lei, zai pa ne Jerusalem ge kum ’ngkai ze sekui heguangsap kai de lei, pe pui ji â Jeho-addanle lei, pa ze Jerusalem’mpui lei.

²Zai pa ne Tingwang mikngau ge ka’nzeibe tew gai de lei; sede pe suiyi ze â tew mak lei.

³Zai pe ba ge heguang gu rezie bam’nchichiak kai gap dadege pe peu heguang je tewchatme, pe tâ ka’ngguame ramme je pa ne tewchat ’ndi de lei.

⁴Kane penui name je â Mosabe gu leisikuak, hingde leisikuak ge Tingwang ne diegaibe ge, “Bepeu changme ramme je penui name tâ-kesiabe tewbe ziegene tewchat kai mak ra lei, zai napoine ramme je penui peu tâ-kesiabe tewbe ziegene tewchat kai mak ra lei, kane ziemmena leine pe run-runne pe gu hemui ziegene chai ra lei,” ze rawgai’ndibe luigum ze pa ne penui name je tewchat kai mak tai de lei.

⁵Chidadege â Amaziabe ne Judaram ziemmena ramme je nguawang’ndui gai de lei, zai penui kiria-ria chai sui ze Judaram benai Benjaminram leine hangge changme benai haîme peireige rezieteime kangge penui je kai bei de lei. Pa ne tingkum ’ngkai gene bepeirei tattime je nguawang’ndui gai de lei, zai herei’nggi ra kebuime, hengeu benai hinggei teichime, ziemmena kelângpatlume chang haî chum ngau de lei.

⁶Pa ne Israelram gene ziemmena gekuume, peranchime chang haî-katme je du gepût talent haî kat hangge puîwang gai de lei.

⁷Kane Hera gu ziemmena pe dage wang lu, “Hei heguang gau, Israelram hereikangme je nang nguatat se lau, Tingwang â Israelme benai aime Ephraimme leine dage ’ngga lei.

⁸Kane aigene herei hangge nang ne ning ranchi ra ’nnum gai dizai â Hera ne ningchu heteu-hereime masua gene tuâkeu gai gu lei; Hera dage ’ngngâ ra du zai tuâkeu gai ra du rezie la daseu,” ze kacheu de lei.

⁹Dadege Amaziabe ne Hera gu ziemmena je, “Kane I ne Israelram hereikangme je talent haî kat peigai’ndibe ze ’ndaikau tew ra lau?” kacheu de lei. Hera gu ziemmena ne kak ze, “Tingwang â ningchu ai suadu kie’ntierie ze pei duî lei,” acheu bei de lei.

¹⁰Chidadege â hereikangme pe dage Ephraim gene wangme je penui ki lam’mbe tat dai ra pa ne ’mpat kai de lei. Dadege â Juda peireige penui ne penui râta-desang di ze penui ki lam’mbe penui lumpum ne ’nret ze helatwang dai di de lei.

¹¹Kane Amaziabe ne kuugiereu ze pe gu ziemmename ramme je nguapat te lei, zai ’Nchaîkâm ’mbe tat lu Seirme ziemmena chang kereume je tewchat ’ndi de lei.

¹²Juda gu ziemmename ne kêdabe ziemmena chang kereume ze ’nringtuî lu de lei, zai tingchukâng peirei ’mbe penui je nguachu lu dege tingchukâng peirei ’mbene penui je tuâkeu gai bei de lei; zai penui ’nteumena je getauhitruai gai bei de lei.

¹³Kane hereikangme Amaziabe ne herei ’mbe nguatat mak ze langtuadai’ndime ne Juda gu namdi ramme Samaria gene Beth-horon riâ chang ze Juda gu namdi leine penui ne ka’nggi de lei, zai penui ruage ziemmena chang chum je tewchat kai nan ze hereichâ misongga lu ’ndi de lei.

¹⁴Edomme je tewchatkailube châng dege Amaziabe wang dege Seirram ge bamme gu heraluî ramme teiwang lu chiramme je kellum ze herâtew de lei.

¹⁵Chipauziegene Tingwang ne Amaziabe peireige pe râta di de lei, zai pechu, “’Ndaitew ze nang miramme gu hera ramme ning ba gene penui gu ziemmena ramme je ’nripatchilakbe kau ramme je nang kahelak lau?” kacheupeu dage pa ne pechu lang gai bei de lei.

¹⁶Kane pa samsa bambe lua sing ge heguang ne pechu, “Dam ta lau! Ningchu heguangme je mâ-geteirapeu hang anui ne sum gai bei semei? ’Ndaitewbeibe ziegene ningchu tewchat kai ra lau?” kacheu de lei. Chidadege â kemeu’mpeu ze damsau gai lu, “Nang ne aipau tâ tew ze I mâ-kerangbe nang ’ngking mak taibe ziegene Hera ne ningchu tewchat kai gu de lei be I chî de lei,” ze acheu bei de lei.

¹⁷Chidadege â Juda gu heguang Amaziabe mâ’mmêt’mmi zun lu ze Jehube chapeu, Jehoahazbe na Joasbe, Israelram heguang dage, “Kei lei, anai kat-kat je hedau sing gai kei lei,” kacheube sam ze lang gai de lei.

¹⁸Dadege Israelram heguang Joasbe ne Judaram heguang Amaziabe dage sam kelâ gai ze, “Lebanon ge heturiebang ne Lebanon ge kedarching bang dage, ‘A na nâu hangge ning na je kai lau,’ acheu ze sam lang gai lei; dadege Lebanon gu mârekaune tatpat ze heturiebang kutkâu ’ndi de lei.

¹⁹Nang ne, ‘Pie gai ni lau, I ne Edom ze duî ’nde lei,’ ze kacheu lei, zai ning lung ge gechîrattewbung ze la lei. Kane chuna â kilûng ge bam du lau; ’ndaitew ze nang benai Judame ning dage bamme kâurabe hangge tewkebuak kai ra lau?” ze kacheu de lei.

²⁰Kane Amaziabe ze ’ngking mak lei; penui ne Edomram gu hera ramme je peudibe ziegene Hera ne penui je penui teureime ba ge pei gai ne ra pa ne tâtew bei dadegeu.

²¹Chidadege â Israelram heguang Joasbe hang di de lei; zai Judaram gu Beth-shemes gene kahereibe bâm ge pa benai Judaram heguang Amaziabe kat-kat je hedautâu sing gai de lei.

²²Zai Judame je Israelme ne duî ’ndi de lei. Chidadege â ziemmena leine penui ki lam’mbe paktat kam di de lei.

²³Zai Beth-shemes ge Joasbe, Israelram gu heguang ne Joasbe na, Ahaziabe chapeu Amaziabe je nîm lu pechu Jerusalem ’mbe nguahang gai de lei, zai Jerusalem kerie ze Ephraim kemui gene Helabe Kemui riâ ge sâu haî medai riâ penui ne tewkaupatchang gai bei de lei.

²⁴Zai pa ne gechâk, gepût zai helikerua ramme Hera ki ge bambe Obededombe ne reîbe ramme ze sut-tat kam ’ndi de lei; heguang ki heurâ ramme benai ziemmena je kebangki hang ’nzuapatbe ramme ze du pa ne sut lu Samariaram ’mbe helatwang dai di de lei.

²⁵Israelram gu heguang Jehoahazbe na Joasbe chaidibe chângge Judaram heguang Joasbe na Amaziabe tingkum kereu ze mengeu ring gai de lei.

²⁶Zai Amaziabe tâtewbe rasam kêdadabe ramme raîlangbe gene chu ze nâlangbe riâ gu ze Judaram benai Israelram gu heguangme gu leisikuak ge chiramme raw gai mak ti lau?

²⁷Pa Tingwang dagene lietattibe gene seu ze Jerusalem ge penui ne pe peireige ’nggi di de lei, zai Lakis ’mbe pa pak kai di lei. Kane penui ne pe chai chai ziemmena je Lakis ’mbe lang gai de lei, zai chigene pechu bichat kai bei de lei.

²⁸Zai pechu hekun gene penui ne pungwang de lei; dadege Dabidbe gu namdi ge pe peume taige pechu bai gai bei de lei.