Read Zeme Naga 2 KRONIKIL 26 Bible Online

2 KRONIKIL 26 - Zeme Naga bible

2 KRONIKIL 26

¹Zai Judame leine ne kum kereu ze seruk changdipeu Uzziabe je ngua lu pechu pe peu Amaziabe kelei ge heguang hangge sum gai bei de lei.

²Pa ne Eloth namdi tew gai de lei, zai heguang ze pe peume dage nguajeikeugaidibe châng dege chize Juda je pei gai bei de lei.

³Uzziabe pa heguangchube ting ge pe kum ze kereu ze seruk ti de lei, zai Jerusalem ge pa ne kum rengeu ze kena kaheguang de lei. Pe pui ji â Jekoliale de lei, pa ze Jerusalem’mpui lei.

⁴Pe peu Amaziabe ne tâ leine tewgaibeibe luigum ze pa Tingwang mikngau ge ka’nzeibe tew gai de lei.

⁵Hera je hingchi ra pechu geteigaipeu Zekariabe ting ge pa pe laîkai ze Hera je peu ze bam lei; pa Tingwang je peu tânege lung’ntua ze bam ra Hera ne pechu tew gai bei de lei.

⁶Pa zuapat lu Philistinme peireige herei ka’nggi de lei, zai Gath, Jabne zai Ashdod gu kerie ramme tewkau gai bei de lei; zai Ashdod namdi ramme hiage benai Philistinme ram pebâm gechâm-châmbe ge pa ne namdi ramme tew gai bei de lei.

⁷Philistinme zai Gurbaal ge lungme Arabme zai Meunme je herei ka’nggibe ge Hera ne pechu ’ngngâ bei de lei.

⁸Ammonme ne Uzziabe dage ’mpuâ mei gai ze bam lei, zai pa pe ranchi-desangpattibe ziegene pe ji dibe ze Ijipram-rai riâ chang di de lei.

⁹Chipau peireige du Jerusalem ge Uzziabe ne Pemik Keriekemui benai Bekâm Kemui ge zai Pa’ndip ge heki kehube ramme tew gai de lei, zai chiramme tew’ntip ze peran tew’nchi gai bei de lei.

¹⁰Pe gu kauruidung ramme Shephela benai bekâm ge misongga bam, zai pe gu merie tâtewme benai grepchî merie kateleume peloa ramme ge zai mâ-hîmra yibe dei ge bam dadege pa ne heki kehube ramme hênamkang ge tew gai, zai dekuaki ramme kui gai de lei, pa â merie tâ tewbe ka’nchâ dadegeu.

¹¹Chipau peireige du heguang gu hereikangme muiteime ruage hangkat Hananiabe ne kanguabe kangge leisirawpeu Je-ielbe benai saibe Ma-aseiabe ne pebau-bautew ze gesangpatkaime, herei’nggi ra kebuime, Uzziabe gu hereikangme baudi bam lei.

¹²Penui kiria bambe tak gene peranchime gekuume peireige besuitewme riak pelane ze chang na ze haî seruk lei.

¹³Penui ne rezieteibe kangge, heteureime je heguang ka’nggibe ge ’ngngâ ra peranchi ze herei’nggichiduime, hereikangme chang haî chum ze sena ze haî mengeu bam lei.

¹⁴Dadege Uzziabe ne hereikangme bau ’nteumena hangge hinggei, hengeu, peichûp, hereimechua, bai’mpi zai keliamrabe chukâng ramme kedâ gai de lei.

¹⁵Bai’mpitu ramme benai tingchu kedibe ramme kap ra, heki kehube ramme benai keriemik ramme ge bamrabe hangge mâ-chiamchime ne chiamgaibe kerua ramme Jerusalem ge pa ne tew gai de lei. Pechu ’ngngâ-’mmihâmbeibe ziegene pa peranchi ze bam tânege pe jidibe kedeu ’mbe ratat ze bam de lei.

¹⁶Kane pa peranchibe ting ge pechu tew’nsiarabe riâ pa gechîrettewbi-bi ze bam lei. Tingwang pe Rapeu dage kemaube chang ze mâ-perîmyibe-kaira ge mâ-perîmyibe ’ntau ra Tingwang gu kellumki ge pa gut daseu.

¹⁷Kane tingkupeu Azariabe ne ziemmena peranchime, gekuume bau Tingwang gu tingkume ziemmena riakdesatme je ngua lu, pe chai suigut ti de lei;

¹⁸dadege penui ne heguang Uzziabe je geikang ze pechu, “Uzziabe gau, Tingwang dage nang ne mâ-perîmyibe ’ntaurabe ze ning deu mak lei, kane tew’nchilube kau, tingkume ramme Aaronbe name ne ra lei. Pebâm ka’nchibe gene pat te lau; nang tâtewmaugaibe ziegene Tingwang Hera dagene hengêutewbe ngau dai ra mak lei,” acheu bei de lei.

¹⁹Chidadege â Uzziabe pe râta di de lei, zai mâ-perîmyibe ’ntau ra pe ba ge mâ-perîmyibe ka’ntaubekuak bam de lei, dadege Tingwangki lungge mâ-perîmyibe ka’ntaube bâmra hiage tingkume ramme bambe ge tingkume ramme peireige pa ne pe râta gai bei dadege pa telie ge ka’mpabe rarît pat ti de lei.

²⁰Zai tingku chînglangpeu Azariabe benai tingkume ’nteumena ne pechu pie gai de lei, dadege, pie le lau, pa telie ge ka’mpabe rarît laleu de lei! Dadege kelua ze penui ne pechu chuipat ’ndi de lei, zai Tingwang ne pechu tewhereugaibeibe ziegene kelua ze pe runne tatpat ti de lei.

²¹Zai Uzziabe â pa kechaibe mai riâ ka’mpapeu ji pungchang di de lei, zai Tingwang ki gene pechu â lupatkai’ndibe ziegene kaperiepeu chang ze heki châmcheîbe ge pe runne bam de lei. Dadege â pe na Jothambe ne heram ge ziemmena ramme je reî ze heguang ki peireige rezietei ze bam de lei.

²²Zai Uzziabe tâtewbe rasam kêdadabe ramme raîlangbe gene chu ze nâlangbe changbe gu ze Amozbe na kemeu’mpeu Isaiabe ne raw gai de lei.

²³Zai Uzziabe pe peume dage jeikeu gai di de lei, zai penui ne, “Pa â ka’mpabe peu lei,” acheubeibe ziegene heguangme je baigaibe bâm ge pe peume dage pechu â penui ne bai gai bei de lei. Zai pe na Jothambe ne pe kelei ge kaheguang de lei.