Read Zeme Naga 2 KRONIKIL 28 Bible Online

2 KRONIKIL 28 - Zeme Naga bible

2 KRONIKIL 28

¹Ahazbe ze pa heguang chube ting ze pe kum ’ngkai chang di de lei, zai pa ne Jerusalem ge kum kereu ze seruk heguang gai de lei. Zai pe peu Dabidbe gum ze â Tingwang mikngau ge pa ka’nzeibe tâ tew gai mak lei,

²kane Israelram gu heguangme tatbe ’mpuî ge tat kai di de lei. Baal râ luî ramme hang ’nsangdu pa ne ’ndam gai bei de lei;

³pa ne Hinnombe na kâm ge mâ-perîmyibe ’ntau gai ze, Israelme masua gene Tingwang ne gechaîtua’ndibe heramzatme gu mi katenetbe tâ tewbe ramme gum ze pe name je herâtewbe ge rû gai de lei.

⁴Zai pa ne herâtew ze pebâm hube ramme ge benai peloa ramme, zai hingbang ’ndiakribe bang kang leine ge mâ-perîmyibe ’ntau gai de lei.

⁵Chipauziegene Tingwang pe Rapeu ne pechu, Siriaram heguang, pechu tewkaupeu zai pe gu ziemmena baudime misonggame je kebang hang tîm lu penui je Damaska ’mbe nguagaipeu ba ge pei gai bei de lei. Pechu tewkaugaipeu Israelram heguangpeu ba ge du pechu pei gai ’ndi de lei.

⁶Penui peume Rapeu Tingwang je penui ne putkai’ndibe ziegene Judaram ge mai kat ne Remaliabe na Pekabe ne penui ’nteumena, peranchime ramme chang-haîkat-ze-’ngkaime je bichat ’ndi de lei.

⁷Ziemmena peranchipeu Zikribe Ephraim’mpeu ne heguang na Ma-aseiabe zai heguang ki ge pemuitewpeu Azrikambe zai heguang sin ge rezieteipeu Elkanabe je bichat’ndi de lei.

⁸Israelme ne penui kiduîme ’mpuimi ramme, penui na ’mpeumi, ’mpuimi ramme ziemmena chang haîme je kebang tîmtat ti de lei; penui ne hereichâ misonggabe penui dagene lu lu ze Samaria ’mbe teiwang gai de lei.

⁹Kane Tingwang gu kemeu’mpeu, Obedbe, kacheupeu chige bam lei; dadege Samaria je ’nggi ra wangme hereikangme bau je hedau gai ra pat lu penui je, “Pie le lau, ningnui peume Rapeu Tingwang ne Juda peireige pe râtadibe ziegene pa ne penui je ningnui ba ge pei gai bei de lei, kane ningnui ne penui je ningnui lumpum ze bichat kai ’ndi de lei, chize tinggîm riâ chîchang di de lei.

¹⁰Zai chunage nang ne Juda ge bamme benai Jerusalem ge bamme, ’mpeumi, ’mpuimi ramme je ning gu kebang gum ze ning ba kangge kai ra ka’nning de lei. Tingwang dagene nang ning gu hemui ’ngga semei?

¹¹Chunage a kuâ ’ngking gai lau, Tingwang lumpum kechibe ning peireige bam di daze nang ne ning kiduîme dagene lu’ndime kebang ramme je lang gai dai du lau,” ze acheu bei de lei.

¹²Ephraimram gu ziemmena besuitewme hanggesame, Johananbe na Azariabe, Meshillemothbe na Berekiabe, Shallumbe na Jehizkiabe zai Hadlaibe na Amasabe, aime ne du herei gene wangme je geikangpat ze

¹³penui je, “Chuna bambe anui gu hemui ramme benai tewmaube ramme bamdibe peireige du Hera dagene anui mâu ze bam ra ningnui ne anui peireige teiwang gai ra ’nningpat kai ze bambe ziegene kebang hang tîmlume je aige ningnui nguawang gai mak ra lei, Anui kahemuibe di-desang zai Israelme peireige pe râta-desang laleu daseu,” ze kacheu de lei.

¹⁴Chidadege â hereichâ benai kebang hang tîmlume bau je hereikangme ne heguangsinme benai baudime wangka’nduime masua gene peipat kai dai bei de lei.

¹⁵Dadege â aige penui ji ranggailiame bau ne zuachu ze kebang tîm’ndime je ngua lu zai hereichâ du tei lu ze penui ruage pumlângbamme dage paîni ramme tap kai bei de lei; penui ne penui je paî tap kai, kêrum rua gai, mâ-teu ra, sak ra pei gai zai taudui ’nnuk kai bei de lei; zai penui ruage peran-game je hekunmerângne ramme ching ge kai lu mêupi bang gu namdi, Jeriko ge penui kiduîme bamme tailam nguawang gai bei de lei. Chipau châng dege â Samaria ’mbe penui helatwang dai di de lei.

¹⁶Chipau ting ge heguang Ahazbe ne Assiria heguang dage ’ngngâ gai ra sam lang gai de lei.

¹⁷Edomme ne Juda je ’nggi dai ze duî lu kebang hang tîmtat ti dadegeu.

¹⁸Zai Philistinme ne Shephela ge benai Juda gu Negeb ge hereiguagut te lei, zai penui ne Beth-shemes, Aijalon, Gederoth, Soko benai pe gu keloa ramme Timnah, benai pe gu keloa ramme, zai Gimzo benai pe gu keloa ramme lutat ti de lei; zai chige penui lung de lei.

¹⁹Israelram gu heguang Ahazbe ne Juda ge tewnei-neibe tak tew ze, zai Tingwang dage pa lungsang gabeibe ziegene Tingwang ne Juda je tewhelêu gai bei de lei.

²⁰Chidadege â Assiria heguang Tilgath-pilneser ne pe dage wang ze pechu peran tew’nchigairabe kelei ge pechu tewhereu gai bei de lei.

²¹Ahazbe ne Tingwang ki gene zai heguang ki benai heguangsinme ki ramme gene kerua ramme gêsa lu lu ze Assiria heguang dage ’mpuâ hang pei gai ’ndi dadegeu; kane chigene pe hangge mâ de ka’ngngâbe ngau mak tai lei.

²²Acheusede pe duânggabe luage Tingwang dage pa lungsang ga’nteu-teu di de lei—heguang Ahazbe zeu.

²³Pa ne pechu tewkaume, Damaska gu hera ramme dage herâtew gai bei, zai pa ne, “Siriaram gu heguangme râ ramme ne penui je ’ngngâ bei daze I du penui ne achu ’ngngâ ra penui je I herâtew gai gu lei,” ze acheu sa gai bei dadegeu. Kane chiramme ne pa benai Israelme leine hangge tewka’nsiabe chang de lei.

²⁴Zai Ahazbe ne Hera ki gu heli kerua ramme getai’ndui lu ze Hera ki gu helikerua ramme ze dimdesuirui gai lu Tingwang ki gu ’ngkam pa ne kainam gai ’ndi de lei; zai pa ne Jerusalem pemik ’nsangne ge herâtewbe-kaira ramme teleu gai bei de lei,

²⁵pe peume Rapeu Tingwang lumpum tew ze kêdabe hera ramme hangge mâ-perîmyibe ramme ’ntau gai ra Judame gu namdi leine ge pa ne pebâm kehube ramme teleu gai bei de lei.

²⁶Zai pa tâtewbe rasam kêdadabe ramme benai pa kebambe tak rasam pelane raîlangbe gene chu ze nâlangbe riâ ze, pie le lau, chiramme ze Israelram benai Judaram gu heguangme gu leisikuak ge raw gai de lei.

²⁷Zai Ahazbe ze pe peume dage jeikeu gai di de lei, zai penui ne pechu Israelram gu heguangme gu heraw ge teiwanggaimakbeibe ziegene Jerusalem ge namdi ge pechu penui ne bai gai de lei. Zai pe na Hezekiabe ne pa kelei ge kaheguang de lei.