Read Zeme Naga 2 KRONIKIL 29 Bible Online

2 KRONIKIL 29 - Zeme Naga bible

2 KRONIKIL 29

¹Hezekiabe pe kum ’ngkai ze mengeu chang dege pa heguangchu de lei, zai Jerusalem ge pa ne kum ’ngkai ze sekui heguang gai de lei. Pe pui ji â Abijale lei, pa ze Zekariabe na lei.

²Zai pe peu Dabidbe ne tâ leine tew gai gum ze Tingwang mikngau ge ka’nzeibe pa tew gai de lei.

³Pa kaheguangbe raîlangbe kum gu raîlangbe kêu ge pa ne Tingwang ki gu ’ngkam ramme lat kai ze chiramme teleu’mmiwang gai kadai de lei.

⁴Tingbia ’mbia teririe lungge pa ne tingkume benai Lebime je nguagut kai lu ze penui je nguaherua gai bei de lei,

⁵zai penui je, “Lebime gau, a kuâ ’ngking le lau! Chunage ningnui runne ningnui je tew’nchi le zu lau, zai ningnui peume Rapeu Tingwang ki tew’nchi gai lau, zai pebâm ka’nchibe gene mâ-kahebâbe lutua ne lau.

⁶Anui peume â lungsangtewbe ga ze anui Rapeu Tingwang mikngau ge kesiabe tew ze bam de lei; penui ne pechu put kai ’ndi lei, zai Tingwang bambe bâm gene penui ju ’nnuktat lu penui chai ’nnukkailia bei lei.

⁷Penui ne heki-namsûng ’ngkam ramme du kainam nan, zai hemibung ramme tew’mmit zai pebâm ka’nchibe ge Israelme Rapeu dage mâ-perîmyibe ’ntau gai mak lei.

⁸Chipauziegene Tingwang lumpum ze Juda benai Jerusalem peireige wangkeu de lei, zai ningnui mik ne chiramme ningnui ngaube luage mi ngauhingrabe, mi ningdaulakrabe zai mi ka’nseîbe zat ramme hangge pa ne tew gai bei de lei.

⁹Chipauziegene pie le lau, anui peume â hiazutkie mui gene kâu kam de lei, zai anui na ’mpeumi ramme benai ’mpuimi ramme, zai anui nâu ramme â kebang ge la de lei.

¹⁰Chunage pa pe râta-kadesangbe peize anui dagene ’mbia de ra Israelme Rapeu Tingwang dage puinakattew’ntiprabe ze a lung sing de lei.

¹¹A name nung gau, ’nningtelam ze bam se lau, nang ne pa bambe bâm ge sap ra, pe guâ ’nggua ra, zai pe tâ ka’ngguame chang ra, zai pe hangge mâ-perîmyibe ’ntau ra ningchu Tingwang ne kelâng gai de lei,” ze kacheu de lei.

¹²Chidadege â Lebime, Amasaibe na Mahathbe, zai Azariabe na Joelbe Kohathbe chaname aibe kena zuachu de lei; zai Meraribe chaname ruagene, Abdibe na Kisbe benai Jehallelelbe na Azariabe aibe kena zuachu de lei; zai Gershonbe chaname ruagene Zimmabe na Joabe benai Joabe na Edenbe aibe kena zuachu de lei;

¹³zai Eli-zaphanbe chaname ruagene Shimribe benai Jeuelbe aibe kena zuachu de lei; zai Asapbe chaname ruagene Zekariabe benai Mattaniabe, aibe kena zuachu de lei;

¹⁴zai Hemanbe chaname ruagene Jehuelbe benai Shime-ibe aibe kena zuachu de lei; zai Jeduthunbe chaname ruagene Shemaiabe benai Uzzielbe aibe kena zuachu de lei.

¹⁵Penui ne penui puiname je nguawang’ndui lu penui runne penui je tewka’nchibe bam de lei, zai Tingwang gu sam gene heguang ne diegaibeibe luigum ze Tingwang ki tew’nchi ra penui gut te lei.

¹⁶Tingkume ne Tingwang ki helunglangbe sîam ’mbe chize tew’nchi ra zuagut te lei, zai Tingwang gu kellumki lungge penui ne mâ-kahebâbe ngaudaube leine penui ne hela ’mbe Tingwang ki gu teririe lungge teipat kai bei de lei; dadege â chize Lebime ne tei lu Kidron geuki ’mbe teipat kai bei de lei.

¹⁷Railangbe kêu gu raîlangbe tingnaimikpui ge penui tew’nchi ra tewchu de lei, zai bekêu gu hezie padesatbe mai ge Tingwang ki kegeu ge penui wang gai de lei; chidadege â penui hezie desat Tingwang ki tew’nchi ze bam de lei, zai raîlangbe kêu gu hezie pakereu ze serukbe mai ge penui tâ tew kam gai de lei.

¹⁸Chidadege â penui heguang Hezekiabe tailam wang lu ze, “Pualiabe tingku benai chi helikerua ramme pelane kaibe mâ-kaira Tingwang gu heki lung leine, rûkambe-râtewbe gu herâtewbe-kaira zai chiramme gu helikerua ramme pelane anui ne tew’nchi gai de lei.

¹⁹Heguang Ahazbe pa kaheguangbe ge lungsang ga ze lungbe ting ge pa ne helikerua ramme teisâugai’ndibe ramme tei dai ra anui ne kedâ gai ze tew’nchi gai ’nde lei, zai pie le lau, chiramme ze Tingwang gu herâtewbe-kaira suage la de lei,” ze kacheu de lei.

²⁰Chidadege â heguang Hezekiabe chuzisi chu lu namdi gu saibe ramme je kûwang’ndui lu Tingwang ki lam’mbe hang di de lei.

²¹Zai penui ne heguangram hang, pebâm ka’nchibe kakellumbeki hang zai Juda hanggene hemui-râtewrabe hang getumsei sena, meli’nsei sena, meli poine sena teiwang gai de lei. Dadege Tingwang gu herâtewbe-kaira ge chiramme peipat kai ra hangge pa ne Aaronbe name tingkume ramme je samdie gai bei de lei.

²²Chigum ze penui ne kebuisei ramme tewchat te lei, zai tingkume ramme ne chize hejai ramme lu lu herâtewbe-kaira ge kezin gai bei de lei; dadege penui ne meli’nsei ramme tewchat lu hejai ramme ze herâtewbe-kaira ge kezin gai bei de lei; zai melipoine ramme penui ne tewchat lu hejai ramme herâtewbe-kaira ge kezin gai bei de lei.

²³Chidadege â hemui-râtewrabe gu kemei’nsei ramme ze heguang benai baudime wang’ndui ze bamme bau tailam teipat kai bei de lei, zai penui ne chiramme peireige penui ba kai de lei,

²⁴dadege â tingkume ne chiramme tewchat lu ze Israelme leine hang desieyibe tewgaibe hangge herâtewbe bâmra ge chipau jai ramme zene hemui-râtewbe hangge tew gai de lei. Heguang ne Israelme leine hang rûkambe-râtewbe benai hemui-râtewbe ze tew ra samdie gai bei dadegeu.

²⁵Dabidbe benai heguang gu kemeu’mpeu Gadbe zai kemeu’mpeu Nathanbe gu hingde luigum ze Lebime ramme je ’nsumpoine ramme, zai ’nra kedibe ramme benai ’nra kecheibe ramme tei lu Tingwang ki ge bam ra pa ne kai bei de lei; chi hingde ze â Tingwang dagene kemeume dage zene pat te lei.

²⁶Lebime ne Dabidbe gu heleutewbe kerua ramme tei lu zai tingkume ne hegeîluîkie ramme tei lu sap te lei.

²⁷Chidadege â Hezekiabe ne rûkambe-râtewbe gu herâtewbe-kaira ge peipat kai ra samdie gai de lei. Zai rûkambe-râtewbe putchu gai dege Tingwang je toabe leu du tuachu gai de lei, zai Dabidbe Israelram heguang gu heleutewbe kerua ramme zene hegeîluîkie ge nguatew de lei.

²⁸Baudime wangka’nduime ’nteumena ne kellum, zai heleutewchime ramme zene heleutew, zai hegeîluîkie ’mmutchime ne bekuâ ’mmutpat kai de lei; ai pelane ze rûkambe-râtewbe tew kam mak tâne tewkuâ bam lei.

²⁹Herâtewbe tew kam gai dege â heguang benai pe dage bamme ’nteumena keikeu ze kakellum de lei.

³⁰Dadege heguang Hezekiabe benai heguangsinme ramme zene Lebime je Dabidbe gu sam ramme benai kemeu’mpeu Asapbe gu sam ramme zene Tingwang ze toa ze bam ra samdie gai bei de lei. Zai penui suiyibe ne heleu ne suang de lei, zai penui keikeu ze kakellum de lei.

³¹Chidadege â Hezekiabe ne, “Chuna â ningnui Tingwang dage ningnui runne ningnui je tew’nchi lu de lei; wang’nna gai zu lau, herâtewbe ramme benai misuiyibe-râtewbe ramme ze Tingwang ki lam’mbe teiwang gai zu lau,” ze kacheu de lei. Dadege baudime wangka’nduime bau ne herâtewbe ramme benai mi suiyibe-râtewbe ramme teiwang gai de lei; zai penui lung gene ka’nchâme leine ne rûkambe-râtewbe ramme teiwang gai de lei.

³²Rûkambe-râtewbe hang baudime ne peiwangbe riak ze kebuisei riaksena, kemei’nsei haî kat, zai meli ramme haî na lei; airamme pelane ze Tingwang dage rûkambe-râtewbe hang lei.

³³Zai tew’nchigaibe herâtewbe zat hangge peiwangbe riak ze, kebuisei haî seruk, zai meli chang chum lei.

³⁴Kane tingkume cham’mpia di ze rûkambe-râtewbe ge pekau teibe ramme gei lapat kam lak ti de lei, chidadege â tingkume kêdame ramme penui runne penui je tew’nchi mak tâne, zai tâtewbe ze kam mak tânege penui puiname Lebime ne penui je ’ngngâgaikua de lei—penui runne penui je tewka’nchibe lam ge Lebime â tingkume suane â penui lung ’nzei ka’nteu lei.

³⁵Rûkambe-râtewbe misongga bambe peireige ge du desieyibe-râtewbe pechâ ramme ze bam lei—zai rûkambe-râtewbe hangge ruîpatkaibe tâ ramme ze du bam lei. Chigum ze Tingwang ki ge tewbe tâ ramme ze teichu kadai de lei.

³⁶Zai Hera ne ziemmena ’nteumena hang mâ tâ tewgaibeibe ziegene Hezekiabe benai baudime ’nteumena ne penui suiyi ze bam de lei; luakatne tâ ze wangchang dadegeu.