Read Zeme Naga 2 KRONIKIL 3 Bible Online

2 KRONIKIL 3 - Zeme Naga bible

2 KRONIKIL 3

¹Chidadege â Jebus’mpeu Ornanbe gu helu kechaîpung, Dabidbe ne peipatkaibe, Tingwang ne pe peu Dabidbe je liabe bâm Jerusalem ge Morialoa peireige Solomonbe ne Tingwang ki tewchu de lei.

²Pa ne kaheguangbe pamedaibe kum gu pakenabe kêu ge pa heki ze tewchu de lei.

³Airamme ze Hera ki tew ra Solomonbe ne ’ndeugaibe tak te lei: Tingtie gu mâ-ka’ndeube desau riâ gene petâ sâu riakseruk, zai pedit ge sâu ’ngkai lei.

⁴Heki ge kûngduaki hela namsûng gu petâ ze sâu ’ngkai lei, chize heki dit lang lei; zai pehut ge sâu haî kat ze ’ngkai lei. Heki ge pelung ge gechâk ’nchichiakbe dui ne pa ne zuâlik kai de lei.

⁵Chingkeleuching pakpi ne heki dibe sûngngangkelî ze liabing gai de lei, zai chige gechâk ka’nchibe dui ne zuâlik kai lu mêupi bang benai mâ-guaria luî ramme tew gai lei.

⁶Pa ne heki ze tingchu pemîhungbe ne tau ze bepuâ teleuheratset kai de lei. Gechâk ze Parbaim (gechâk kiebe bâm) gu gechâk lei.

⁷Chigum ze heki ze gechâk ne liatui gai de lei—hekidappai ramme, gechia ramme, ’mbie ramme, zai ’ngkam ramme ge zeu; zai pa ne ’mbie ramme ge kerubme luî ’nrit kai de lei.

⁸Zai pa ne ’nchilangbe bâm teleu gai de lei; chipau ki gu petâ ze pedit gu sâu ’ngkai riâ lei, zai pedit sâu ’ngkai lei; gechâk keyibe talent haî seruk ne ’nnuklik kai de lei.

⁹Gechâk ne tewbe hegeîkeriak gu perît ze shekel rengeu lei. Zai ’nreibe kisîam gechâk ne keniak kai lei.

¹⁰’Nchilangbe bâm pa ne teleugaibe ge, kerubme hangna luî hang heching ne teleulube ge gechâk dui zuâlik kai lei.

¹¹Kerub kena kan liâmpat kai dege sâu ’ngkai lei: hangkat gu kan kat lîampatkaibe ge sâu mengeu lei, chize ’mbe deîtauchang lei, zai katlam ’mbia gu kan kat sâu mengeu lîampatbe ze kêdabe kerub kan deîtauchang lei;

¹²zai aipau kerub kan kat sâu mengeu liâmpatbe ze heki gu ’mbe deîtauchang lei, zai kerub kêdapeu kan ze du sâu mengeu lei, chize kerub keraipeu kan helakchang lei.

¹³Ai kerub kena kan ze sâu ’ngkai liâmpat lei; kerub kena ze heki lung ’mbe ’nrik lu ze penai pî ne sap lei.

¹⁴Zai lîmnambe paî hang ka’nzaibe, gie’nzaibe, zai tik’nzaibe zai betachiâmbe paî ne tewbe peireige kerub kena tâtewbe luî hang pa ne tew gai lei.

¹⁵Gechia’ndi kena peireige ruasuabe sâu mengeu je rang gai ze chi gechia’ndi kena pa tewgaibe ze pehut sâu himreu ze mengeu lei.

¹⁶Pa ne heteuria gumbe mâ-gua ramme teleu lu gechia kena peî’nning ge kai lei; zai turiechî pum haî kat luî hang pa ne teleu lu ze mâ-gua ramme peireige kai lei.

¹⁷Gechia’ndi kena kellumki suage sumgaibe ze kat ze tingpî ’mbia bam zai kêdabe ze tingpeî ’mbia bam lei; tingpî ’mbia bambe je pa ne, Jakin, ze ku lei, zai tingpeî ’mbia bambe je, Boaz, ze ku lei.