Read Zeme Naga 2 KRONIKIL 30 Bible Online

2 KRONIKIL 30 - Zeme Naga bible

2 KRONIKIL 30

¹Hezekiabe Israelme leine benai Judame leine hangge sam lang gai de lei, zai Israelme Rapeu Tingwang dage tat’ntuahengi hengî ra hangge Tingwang ki ge wang gai ra Ephraimme benai Manasseme hangge du samkela raw gai de lei.

²Pakenabe kêu ge tat’ntuahengi bamrabe hang Jerusalem heguang benai pe gu heguangsinme ramme, zai ziemmena wangka’nduime ’nteumena hedei gai de lei—

³tingkume penui ruage ziemmena buikabe riâ penui runne penui je tew’nchi gai mak, zai Jerusalem ge ziemmena ramme wang’nduigaimabe ziegene pehîtit ge tat’ntuahengi penui bamchi lak tai de lei—

⁴zai tâtew ra ’nninggaibe tak ze heguang benai baudime wangka’nduime ne penui suîhezuâ kam gai de lei.

⁵Jerusalem ge Israelme Rapeu Tingwang dage tat’ntuahengi hengî ra hang Beer-sheba gene Dan riâ chang ze Israelram pelane ge ziemmena je wang ra sam rangba gai ra penui sam hekî’nchi gai de lei; hengî ra kûgaibe luigum ze ziemmena wang’ngkie mak dadegeu.

⁶Chidadege â heguang ne samdie gai ze, “Hei, Israelme gau, Abrahambe, Isaakbe zai Jakobbe Rapeu Tingwang dage heliwang lau, dezai Assiria heguangme ba gene ’mbiapatme ring’nsakpatme dage peize pa wang dai ra hangge zeu.

⁷Ningnui peume benai ningnui kiduîme ne penui peu Hera, Tingwang dage lungsangtew mak bamme gum ze â ningnui â bam se lau, ningnui ne ngaube gum ze pa ne penui je â putzîng gai ’ndi de lei.

⁸Chunage ningnui peume gum ze ningnui lungchi ze bam se lau, kane Tingwang dage ningnui runne ningnui je peipat kai lu ze pa ne betingbeta hang tew’nchigai’ndibe pe ki ka’nchibe ge zuawang ze Tingwang ningnui Rapeu guâ ’nggua lau, dezai pe lumpum kechibe peize ningnui dagene ’mbia de ra hangge zeu.

⁹Ningnui ne Tingwang dage helatwang dai bei zai â, ningnui puiname benai ningnui name je kebang hang tîmme ne penui je ngau’nggia gai bei ze aipau ram ge penui helatwang dai gu lei. Ningnui Rapeu Tingwang â kehungpeu zai ka’nggiapeu lei, zai ningnui ne pe lam’mbia ’nreiwang dai dizai â ningnui dagene pe ju ’nreitat ra mak lei,” ze acheubeibe luigum ze hepâupaume ramme ne heguang benai pe gu heguangsinme dagene samkela ngaube tei lu ze Israel benai Juda leine ge tatrua de lei.

¹⁰Chidadege â hepâupaume ramme ze namdi ’nsangne ge Ephraimram benai Manasseram tatpela ze, zai Zebulun riâ changbe tatruatat ti de lei; kane chime ne penui je teikeliang ze kakehi de lei.

¹¹Asher, Manassebe, zai Zebulun ge bamme bau pebau gechâmne runne kecheiluilung pung ze Jerusalem ’mbe wang de lei.

¹²Tingwang gu sam gene heguang benai heguangsinme ramme ne samdiegaibe ge sui ze tew ra helung ka’nsambe hang Judaram peireige Hera ba ne du penui je nguatatew de lei.

¹³Zai ziemmena baudime ne pakenabe kêu ge ’nduihîkaimakbe tingku-ngi reibam ra Jerusalem ge zuawang de lei.

¹⁴Penui ne tâtew ze Jerusalem ge bambe herâtewbe-kaira ramme lutua de lei, zai mâ-perîmyibe rube herâtewbe-kaira ramme ze penui ne lu lu Kidron kâm ’mbe tuâ gai ’ndi de lei.

¹⁵Zai pakenabe kêu gu hezie kereu ze medai mai ge tat’ntuahengi gu melipoine penui ne tewchat te lei. Zai tingkume benai Lebime je tew’ngngam gai bei de lei, dadege â penui runne penui je tew’nchi lu ze Tingwang ki ge rûkambe-râtewbe teigut te lei.

¹⁶Hera gu ziemmena Mosabe gu hingde luigum ze tingtie penui tâtewbe luî tew kadai de lei; Lebime ba gene hejai lulube ze tingkume ne kezin gai de lei.

¹⁷Baudime wangka’nduime ruage ziemmena penui runne penui je tew’nchi lemakme misongga bam dadegeu; chipauziegene mi-mige ’nchimakme hangge Tingwang dage tew’nchi ra Lebime ne tat’ntuahengi gu melipoine je tewchat kai ra chang lei.

¹⁸Ziemmena misongga, Ephraim, Manasse, Issakar, zai Zebulun gene wangme ze penui runne penui je tew’nchi mak lei, sede geteiliabe luî sui mak ze penui tat’ntuahengi-kuaktak puateu de lei. Hezekiabe ne penui hangge kellum gai ze, “Tingwang keyipeu gau, ’nteumena je lun gai lau,

¹⁹kakellumbeki gu besie luigumbe gene penui ze ’nchimakme chang ze bam lêusedu penui peume Rapeu Tingwang je penui laîkai ze gepeume peireige zeu,” ze kacheu de lei.

²⁰Zai Tingwang ne Hezekiabe kuâ ’ngking gai ze, baudime je tew’mmi gai bei de lei.

²¹Zai Israelme Jerusalem ge bamme ramme ne penui suiyi-desang ze ’nduihîkaimakbe tingku-ngi hezie sena ne kahengî de lei; dadege Lebime benai tingkume nai’nsangne ge Tingwang je toa ze penui ranchi leine ne Tingwang dage heleutew de lei.

²²Zai Tingwang guâ ka’ngguabe ge Lebime tâtewchime leine dage Hezekiabe ne gecheulumbup kai bei de lei. Chigum ze baudime ne Tingwang penui peume Rapeu dage desieyibe-râtewbe benai misuiyibe-râtewbe tew gai ze hezie sena kahengîbe kuaktak ze puateu ze bam de lei.

²³Chipau châng dege baudime wangka’nduime leine ne hezie sena ne hengî suâ dai ra hezuâ gai de lei; chigum ze hezie sena ne penui suiyi ze reibam kadai de lei.

²⁴Judaram heguang Hezekiabe ne baudime wangka’nduime je getumsei chang kat zai herâtewrabe hangge meli chang sena pei gai de lei, zai heguangsinme ramme ne baudime wangka’nduime je getumsei chang kat zai meli chang kereu pei gai de lei. Zai tingkume misonggame ne penui runne penui je tewka’nchi de lei.

²⁵Judame wangka’nduime pelane zai tingkume benai Lebime zai Israelram gene wangme baudime pelane, zai hesangme tebeîtewme Israelram gene wangme, Judaram ge hesang chang ze bamme ne penui suiyigaihâ de lei.

²⁶Chigum ze Jerusalem ge lungka’ntuabe bam de lei, Israelram heguang Dabidbe na Solomonbe ting gene mâdau du Jerusalem ge aigumbe wangchang gai mak dadegeu.

²⁷Chidadege â tingkume benai Lebime zuachu lu baudime je ’nnam gai de lei, zai penui kuâ seutâu di de lei, zai penui kakellumbe kuâ ze tinggîm ge pa ka’nchibe bâm ge wangchang di de lei.