Read Zeme Naga 2 KRONIKIL 31 Bible Online

2 KRONIKIL 31 - Zeme Naga bible

2 KRONIKIL 31

¹Dadege airamme tew kam gai lu dege Israelme chige bamme ’nteumena ne Juda namdi ramme ge pat lu ze tingchusum ramme kedeîdesuirui gai, zai Asherah ramme gechiakau gai zai Juda benai Benjamin, zai Ephraim benai Manasseram pelane ge pebâm hube ramme benai herâtewbe-kaira ramme tew’ngga’nzâu mak tâne penui ne tew’nsia ze bam de lei. Chipau châng dege Israelme leine penui namdi ’mbe helatwang dai kam di de lei.

²Dadege Hezekiabe ne tingkume benai Lebime je rûkambe-râtewbe benai desieyibe-râtewbe hang, zai Tingwang gu paîki gu kemui ramme ge tâ’nggua ze (Hera je) mi suiyi ze suangrabe hangge pebau-bau tew ze ’nzi gai bei de lei.

³Rûkambe-râtewbe ramme hangge heguang ne pe heurâ gene peipatkaibe ze â Tingwang gu hingde ge rawgaibe luigum ze hechua benai hegî ge rûkambe-râtewbe ramme hang zai ’ntakbambe mai hangge rûkambe-râtewbe ramme hang, zai keuhâ mai benai beting-ting gu kahengîbe mai ge rûkambe-râtewbe ramme airamme hang de lei.

⁴Dadege heguang ne Jerusalem ge ziemmena bamme je penui ne tingkume benai Lebime dage penui damrabe pei gai ra samdie gai bei de lei, chidezai penui ne Tingwang gu hingde ge penui keringbe peipat kai ra hangge zeu.

⁵Samdiegaibe ze langrarip kai gap dege Israelme ne mâ-himlei ’nchikeuraibe ramme, grepchî taudui, ’ngkuidui zai helu gene mâ-himra patbe leine misongga ze teiwang gai de lei; zai penui ne getaleine gu kereu ge kat teigut kai de lei.

⁶Zai Israelme benai Judame namdi ge bamme ne du kaurui benai meli gu kereu ge kat benai Tingwang penui Rapeu hangge diepatkaibe tew’nchilube zat ramme teigut kai ze kaigekua gai de lei.

⁷Hekêu pakechumbe kêu gene kaigekuachudibe ze hekêu pasenabe kêu gene kam gai lei.

⁸Hezekiabe benai heguangsinme ramme ne wang ze gekuagaibe tum ze ngau lu dege Tingwang benai pe gu ziemmena Israelme je getoabe pei gai de lei.

⁹Zai Hezekiabe ne chize kuachube tak ramme ze tingkume benai Lebime ka’nneu de lei,

¹⁰Zadokbe ki gene patpeu, tingku gechîngpeu, Azariabe ne pechu kak kai ze, “Penui ne Tingwang ki ge rehâ hawang’nduigaibeibe gene seuze anui â teu kam lak ze ’nsakpat dai ze misongga bam de lei; aigum ze anui hangge misongga ’nsakpat ze bam ra Tingwang ne pe gu ziemmename je ’nnam gai bei de lei,” ze kacheu de lei.

¹¹Chidadege â Tingwang ki lungge hekisiâm ramme reheîpat kai ra Hezekiabe ne penui je samdie gai bei de lei; zai penui ne reheî gai bei de lei.

¹²Zai penui ne lungsang gene rehâ ramme, kereu ge kat zai diepat’nchigaibe zat leine teigut kai bei de lei. Chiramme ge besuitewpeu dilangpeu ze â Lebi’mpeu, Konaniabe zai pe sin ge bambepeu, pe kina Shime-ibe de lei;

¹³chige Tingwang ki ge besuitewpeu saibe, Azariabe benai heguang Hezekiabe ne sumgaibeime, Jehielbe, Azaziabe, Nahathbe, Asahelbe, Jerimothbe, Jozabadbe, Alielbe, Ismakiabe, Mahathbe, zai Benaiabe aime ne kereîme chang ze Konaniabe benai pe kinapeu Shime-ibe je ka’ngngâ de lei.

¹⁴Zai Lebi’mpeu, Imnabe na Korebe, tingbia ’mbia kemuiki kereîpeu ne Hera hangge misuiyibe-hâ peipatbe, zai ’nchilangbe herâtewbe ramme Tingwang hang peipatkaibe ramme ’nzidairabe ge pa ne besuitew de lei.

¹⁵Edenbe, Miniaminbe, Jeshuabe, Shemaiabe, Amariabe zai Shekaniabe ne tingkume gu namdi ramme ge penui kiduîme gechîng-hena, pebau gechâm-châmme dage pa ne katimzibe ge helêurau ze pechu ka’ngngâ de lei.

¹⁶Penui kiria wangkeube tak gu piebe sâu ze ’mpeumi kum chum gene bepeirei kau, penui gu pebaupungbe benai penui gu tângeu lam gene nai’nsangne ka’nnangbe tâ tew ra Tingwang ki ge gutme leine hangge du timzipat kai de lei.

¹⁷Penui kiria wangkeube tak pie ze tingkume hang tâ pei de lei. Lebime je â penui kiangnapungbe benai penui tâ-ngeu lam gene kum ’ngkai ze desat gene bepeirei kau hangge pei de lei.

¹⁸Tingkume je â penui name, penui nâu ramme, penui na ’mpeumi benai ’mpuimi ramme, baudime ’nteumena dage chakherua gai de lei; penui â penui runne penui je tewka’nchibe ge lungsangtewbe ziegeneu.

¹⁹Zai tingkume, Aaronbe name bau, penui keloa ramme gu heram loa ge helu ramme bambe ge bamme ruagene tingkume ruage ’mpeumi leine benai Lebime ruage pe ji kailume leine dage hedam ramme ’nzi ra hang ziemmena je chaupat kai de lei.

²⁰Aigum ze Judaram pelane ge Hezekiabe ne tâtew de lei; zai Tingwang pe Rapeu masua ge keyibe benai ka’nzeibe zai lungsang gene pa bam de lei.

²¹Zai pa ne Hera ki guâ ’nggua ze tâtewbe leine ge benai hingde ge zai samdiegaibe luigumbe gene pe Rapeu je pa ne peu ze bambe ge pe lung leine ne tew ze bam de lei, zai pa lung’ntua ze bam de lei.