Read Zeme Naga 2 KRONIKIL 32 Bible Online

2 KRONIKIL 32 - Zeme Naga bible

2 KRONIKIL 32

¹Airamme benai aipau lungsangtewbe tâ ramme chângge Assiria heguang Sennakeribbe ne wang ze Judaram guatua nan ze namdi ramme pa ne pe hangge lu duî le ra ’nnum gai lu ze namdi ze ’nggi ra tejeîki pa tew de lei.

²Zai Sennakeribbe ne wang ze Jerusalem je ’nggi ra tewbe Hezekiabe ngau lu dege,

³pa ne pe gu ziemmena besuitewme benai pe gu ziemmena peranchime je ngua lu namdi hela ge heduitering luabe tew’nsau ne ra chiam de lei; zai penui ne pechu ’ngngâ gai bei de lei.

⁴Ziemmena misonggame wang’ndui gai de lei, zai penui ne, “’Ndaitewbeibe ziegene Assiria heguangme ne wang ze hedui misongga bambe ngau ra lau?” acheu ze heduitering ramme benai ’nggeuki dui kedei ge luabe ramme ze dangnam de lei.

⁵Pa ne lungsangsing ne tâ ze tewchu gai de lei, zai kerie tewba’ndibe ramme tewchu gai ze chiramme peireige heki kehube ramme tew gai de lei, zai hela ge pa ne kêdabe kerie tew gai de lei; zai Dabidbe gu namdi ge Millo bambe ze pa ne teleu’ntip kai bei de lei. Pa ne hereikerua ramme benai hinggei ramme misongga teleu gai bei de lei.

⁶Zai ziemmena ramme peireige hereimuiteime je kai lu namdi gu kemui hiage keloaning ge pe dage pa ne penui je nguawang’ndui gai lu pa ne penui je gecheu gai ze,

⁷“Ningnui ranchi zai kuugiereu ze bam lau, Assiria heguang benai pe dage hereikangme bamme suage hing se lau, zai ningnui duângga ze bam se lau; pe dage bambe sua â anui dage â dibipeu la daseu.

⁸Pe dage â ziemmena ba ranchi bam lei, kane anui dage â anui je ’ngngâ ze anui je hereinguatew ra Tingwang anui Rapeu lamui lei,” ze kacheu de lei. Chidadege â Judaram heguang Hezekiabe gu sam ramme ge baudime ne ’nnumtew ze bam de lei.

⁹Aipau chângge laksaibe benai pe gu hereikangme ramme je tuaguabe, Assiria heguang, Sennakeribbe ne Judaram heguang Hezekiabe benai Jerusalem ge Judaram ziemmena bamme leine dage pe guâ ka’ngguame je lang gai ze,

¹⁰“Assiria heguang Sennakeribbe ne aigum ze rang lei, ‘Ningnui ’ndaikau je ’nnumtew ze Jerusalem je ’nggi ra tuaguâ ze bam lau?

¹¹Hezekiabe ne ningnui je, “Tingwang anui Rapeu ne Assiria heguang ba gene anui je ’nripat kai gu lei” ze ningnui je saliabe luage herakûm benai ’njei-kahereibe gene ningnui je chai ra pei gai ra choabe mak mei?

¹²Ai Hezekiabe gîmsing ne pe gu pebâm hube ramme lutua ze Jerusalem benai Judaram dage, “Herâtewbe-kaira kat bambe suage ningnui kellum ze chige ningnui gu herâtewbe gu mâ-mâ ’ntau ra lei,” ze samdiegaibe mak mei?

¹³I benai a peume bau ne kêdabe heram ramme gu ziemmena ramme dage ’ndaikau tâ tew gai mei be ningnui chî mak mei? A ba gene chipau heram ramme gu heramzatme rapeu ramme ne penui ram ’nripatchi lu mei?

¹⁴Ningnui Rapeu ne ningnui je â ba gene ’nripatchi le ra chi heramzatme a peume bau ne tewchat-’nzâugaibeime gu hera ramme leine ruage châu a ba gene pe gu ziemmena ramme je ’nripatchiduibe kau la lau?

¹⁵Chipauziegene chunage peize Hezekiabe ne ningnui je aigum duai ze ngua’mmie ze bam se lau, zai pechu ’nnumtew se lau, heramzatme gu zai heguangram gu hera zene pe gu ziemmena ramme je a ba gene benai a peume ba gene ’nripatkaichiduibe la mak daseu. Ningnui Rapeu ne ningnui je a ba gene ’nripatrabe nung â mâdau du mak te lei!’ acheu zeu” ze kacheu de lei.

¹⁶Zai pe gu tâka’ngguame ne Tingwang Hera je benai pe guâ ka’ngguapeu Hezekiabe je sa’nsia gai sua de lei.

¹⁷Dadege Pa ne Israelme Rapeu Tingwang luî tewla gai ra, zai pechu sa’nsia gai ra samkela raw gai ze, “Heram ramme gu heramzatme rapeu ramme ne a ba gene penui gu ziemmename je ’nripatmaktaime gum ze Hezekiabe Rapeu du a ba gene pe gu ziemmename je ’nripat ra mak lei,” ze kacheu de lei.

¹⁸Namdi ze penui ne lurabe hanggene Jerusalem kerie kedibe ge bamme ziemmena ramme je tew’ngnging ze tewhingrim gai ra Judaram lad gene penui ’nrungkeleulia gai de lei.

¹⁹Ziemmename ba ne tewgaibe kedeirei ge ziemmename gu hera ramme rasam penui sa gum ze Jerusalem gu Hera peireige penui sa gai de lei.

²⁰Chidadege â aipauziegene heguang Hezekiabe benai Amozbe na kemeu’mpeu Isaiabe ne tinggîm ’ngngangpie ze kellum ze hap te lei.

²¹Zai Assiria heguang gu tejeîki gene herei ge peranchime, hereikang gu haîmuiteime, zai saibe ramme ’nteumena je bichatkam’ndipeu angel’mpeu je Tingwang ne lang gai bei de lei. Chidadege â ’ngngam ze pe ram ’mbe helatwang dai di de lei. Zai pe rapeu ki ge pa gut dege pe name hanggesame ne pechu hiazutkie ne sukâu gai bei de lei.

²²Chigum ze Tingwang ne Hezekiabe benai Jerusalem ge bamme je Assiria heguang Sennakeribbe benai pe teureime ba gene tew’nring gai bei de lei; zai pa ne penui je pebâm’nsangne ge gesaube katemibe pei gai bei de lei.

²³Chipau mai gene seu ze heramzatme leine masua gene pechu suang’ndi gai ra hanggene ziemmena misonggame bau ne Jerusalem ge Tingwang dage kela ramme teiwang gai de lei, zai Judaram heguang Hezekiabe dage pemîhungbe zat ramme teiwang gai de lei.

²⁴Chipau ting ge Hezekiabe ’nrâ ze chai ra tew di de lei, dadege Hera dage pa kakellum de lei; zai pa ne pe kuâ kak kai ze pechu, ka’nchetbe teilia bei de lei.

²⁵Kane Hezekiabe â pe hangge keyibe tewgaibeibe luigum ze mâ de pe suiyibe sam pau gai dai mak tai lei, gechîrattewdibe ziegeneu. Chipauziegene Hera lumpum pe peireige zai Juda benai Jerusalem peireige wangkeu de lei.

²⁶Kane Hezekiabe pe lung ge gechîrattewgai’ndibe ze pa benai Jerusalem ge bamme hang ziegene pe runne kecheiluîtewkeu kadai de lei, chidezai Hezekiabe ting ge Tingwang rata ze penui dage wangkeu gai mak ra hangge zeu.

²⁷Zai Hezekiabe dage keheube benai pengêudibe misongga ze bam de lei; zai pa ne pe hangge gepût, gechâk, tingchu pemîhungbe, periîmyibe reheumoîne, hinggei ramme hang, zai helikerua ramme pemîhungbe zat leine kaigekuagairabeki ramme hang tew gai de lei;

²⁸chêu, grepchî dui zai mâ-châdui hang ’nseuki ramme tew gai de lei; zai kaurui zat leine benai melidung hangge pa ne penui ki hang tew gai de lei.

²⁹Zai pa ne namdi ramme, meli dung, zai kaurui misonggabe du pei gai de lei; Hera ne pe heurâ hang misongga pei gai bei dadegeu.

³⁰Gihon geuki dui peruak gene Hezekiabe ne dangnam lu Dabidbe gu namdi ’mbia ’mbene luakeu ra tew gai bei de lei. Zai Hezekiabe ze pa tâtewbe leine ge ’nggim ze bam lei.

³¹Zai chigum ze heram lungge ka’nchetbe tewgaibe rasam ’mmêt ra pe dage langgaime Babilon heguangsinme bau deu geze â Hera ne pechu â pe lung kedak ra, zai pe lung ka’nningbe tak chî ra hanggene sâu gai bei de lei.

³²Chunage pie le lau, Hezekiabe tâtewbe rasam kêdadabe ramme, zai pa tatew keyibe rasam ramme ze Amozbe na kemeu’mpeu Isaiabe gu keliâbe ngaube leisikuak ge benai Juda benai Israelram heguangme gu leisikuak ge raw gai de lei.

³³Zai Hezekiabe pe peume dage jeikeu gai di de lei, zai Dabidbe name gu heraw ’nreibe ge penui ne pechu bai gai bei de lei; dadege Juda benai Jerusalem ge lungme ’nteumena ne pe gu kechai-ngeutew gai de lei. Zai pe na Manassebe ne pa kelei ge kaheguang de lei.