Read Zeme Naga 2 KRONIKIL 34 Bible Online

2 KRONIKIL 34 - Zeme Naga bible

2 KRONIKIL 34

¹Josiabe pa heguangchube ting ge pe kum ze desat chang di de lei, zai pa ne Jerusalem ge kum himreu ze kat heguang gai de lei.

²Tingwang mikngau ge pa keyibe, ka’nzeibe tew gai de lei, zai pe peu Dabidbe tatbe ’mpuî ramme ge pa tat ze bam de lei; zai heku’mbia du zai hezat’mbia du pa tatkelik kai mak lei.

³Pa henadau ge pe tingkum desat riâ ge heguang ze bambe luage gene du pe peu Dabidbe Rapeu je pa kemêtchu di de lei; zai pa kaheguangbe kum kereu ze kena chang dege Jerusalem benai Juda gene pebâm hube ramme Asherah ramme, zai mâ-luî teleulube ramme gechaîtua’nchichiak kai de lei.

⁴Zai pa bambe gene penui ne Baal ramme gu herâtewbe-kaira ramme tewkau gai bei de lei; zai chiramme peireige sapchan ze bambe mâ-perîmyibe rube herâtewbe-kaira ramme pa ne gechiakau gai bei de lei; zai pa ne Asherah ramme benai mâ-luî hekilube heruilube ramme lakpâng ze kedeînianggaibeibe ramme ze chipau hera ramme je kakellumme gu heraw ramme peireige ’nrukrarip kai bei de lei.

⁵Tingkume penui gu herâtewbe-kaira ramme ge bamme ra ramme ze du pa ne rû ’ndi de lei, zai Juda benai Jerusalem gene chiramme pa ne gechaîtua kam ’ndi de lei.

⁶Zai Manassebe, Ephraim zai Simeon zai Naphtali riâ chang ze tew’nsia’ndibe namdi benai pa’mpa ge,

⁷pa ne herâtewbe-kaira ramme tewkau gai zai Asherah râ ramme benai mâ-luîtewbe ramme lakniang gai bei de lei, zai Israelram leine ge mâ-perîmyibe ka’ntaube bâmra ramme gechiakau gai bei de lei. Chipau chângge Jerusalem ’mbe pa helatwang kadai de lei.

⁸Zai pa kaheguangbe tingkum kereu ze desat ge heram benai heki pa ne tew’nchi gai lu dege, pe Rapeu Tingwang ki teleu’mmi gai ra, Azaliabe na Shaphanbe, zai namdi gu laksaibe Ma-aseiabe, zai Joahazbe na (leisi ge) rawka’nduipeu Joabe je pa lang gai de lei.

⁹Tingku dilangpeu Hilkiabe dage penui wang lu Lebime chêuneibe kechaîpung bâm reîme ne Manasseme benai Ephraimme zai Israelme ring’nsakpatme leine benai Juda zai Benjamin pelane gene zai Jerusalem ge bamme leine dagene rangkâng tei’nduilube Hera ki ge teiwanggaibe ze pei gai bei de lei.

¹⁰Tingwang ki kereîbe tâtewme dage penui ne chize pei gai bei de lei; zai Tingwang ki tewbe ge tâtewme ne chize heki tâ tewme hangge pei gai de lei.

¹¹Judaram gu heguangme ne teleumakbeibe ziegene siadibeki teleu dai ra hangge penui ne chipau rangkâng ze tingchu gialube ramme, heki’ngra ramme, zai padappai ramme hang lui ra heching-tâtewme benai hekitewme ba ge pei gai bei de lei.

¹²Zai ziemmena ramme ne lungsang kai ze tâtew de lei. Penui tâtewbe peireige Lebi’mpeu Mararibe chana’mpeu hangna, Jahathbe benai Obadiabe zai Kohathbe chana’mpeu Zekariabe benai Meshullambe hangna ne penai suitew ze bam de lei. Lebime leutewbe kerua ramme ’nrachime leine

¹³ne mâ-mâ kerit-ritbe pungme peireige reî ze, tâ zat leine tewme je nguakagetei de lei; zai Lebime ruage hanggesame ne saibe ramme chang zai hanggesame ne leisikuak kerawme chang zai hanggesame ne kemuireîme chang ze bam lei.

¹⁴Tingwang ki ge rangkâng teiwanggaibe penui ne teipatbe luage Mosabe dagene Tingwang ne hingde leisikuak peigaibe ze tingkupeu Hilkiabe ne ngaudau de lei.

¹⁵Chidadege â Hilkiabe ne rawsuipeu Shaphanbe je, “Tingwang ki gene hingde leisikuak I ne ngaudau lu de lei,” ze kacheu de lei; zai Hilkiabe ne leisikuak ze Shaphanbe je pei gai bei de lei.

¹⁶Shaphanbe ne leisikuak ze heguang suage teiwang gai lu dege heguangpeu je pau gai dai ze, “Ning guâ ka’ngguame je peigaibeibe leine ze penui ne tew ze la de lei.

¹⁷Tingwang ki gene ngaulube rangkâng ze penui ne suk’nrua gai lu kereîme benai tâtewme ba ge pei gai ’nde lei,” ze kacheu de lei.

¹⁸Chidadege â rawsuipeu Shaphanbe ne heguang je, “Tingkupeu Hilkiabe ne achu leisikuak kat pei gai la lei,” ze ranglia gai bei de lei. Zai Shaphanbe ne chize heguang suage kiâliâ gai de lei.

¹⁹Hingde gu sam ramme heguang seu lu dege pe paîni pa hitchu di de lei.

²⁰Dadege â heguang ne Hilkiabe, Shaphanbe na Ahikambe, Mikabe na Abdonbe, rawsuipeu Shaphanbe zai heguang guâ ka’ngguapeu Asaiabe dage samdie gai ze,

²¹“Tat chu lau, leisikuak gu sam ramme ngaudaube deu ge a hangge benai Israelram zai Judaram ge sâudiakkaime hangge Tingwang dage mâ-’mmêt’mmi gai ka nî lau; Tingwang lumpum anui peireige ruîkeugai’ndibe ze chuk-desang de lei, anui peume ne aipau leisikuak ge rawgaibe luigum ze tew ra Tingwang gu sam tei’mmi mak bei dadegeu,” ze acheu bei de lei.

²²Chigum ze Hilkiabe benai heguang ne langgaime ramme ze Hasrabe chapeu, Tokhathbe na Shallumbe nâu, kemeu’mpui Huldale Jerusalem pakenabe kining ge bambepui tailam penui tat lu ze penui ne pechu tâwangchangbe rasam pau gai de lei.

²³Dadege pa ne penui je, “Israelme Rapeu Tingwang ne aigum ze rang lei: ‘Ningnui je a tailam langgaipeu je,

²⁴Tingwang ne aigum ze rang lei, pie le lau, leisikuak ge desetkaibe rasam rawgaibe Judaram heguang suage kiâliagaibe ze aipau bâm peireige benai chige kelungme peireige I ne kesiabe teiwang gai gu de lei.

²⁵Penui ba tatew ramme zene a lumpum tewpat kai ra penui ne achu put kai ze kêdabe hera ramme dage mâ-perîmyibe ’ntau ze bamdibe ziegene a lumpum ze aipau bâm peireige ruîpat kai gu lei, zai chize tew’nsau dai ra mak lei.

²⁶Kane Tingwang dage mâ-’mmêt ra a dage langgaipeu Judame gu heguang je aigum ze ningnui salia lau, Tingwang Israelme Rapeu ne aigum ze rang lei: Ningnui ne seulube sam ramme deu ge,

²⁷aipau bâm peireige benai chige kelungme peireige mâ-wangrabe Hera gu sam ramme nang seu lu dadege ning lunggailak ze Hera suage nang kecheiluîtewkeu, zai a masuage nang kecheiluîtew ze ning paîni hit ze desui ze bambeibe ziegene I du ning kuâ seu gai de lei, ze Tingwang ne kacheu de lei.

²⁸Pie le lau, I ne ningchu ning peume dage nguawang gai gu lei, zai ning gu heraw ge nang temichai ze chai gu, zai aipau bâm peireige benai aige lungme peireige mâ-kesiabe I teiwanggairabe leine ze nang â ngau ra mak lei,’ ze ranggai lau,” ze kacheu lei.

²⁹Chidadege â heguang ne Juda benai Jerusalem ge gechîngme leine je nguawang’ndui gai de lei.

³⁰Zai heguang ne Juda gu ziemmena ramme benai Jerusalem ge bamme ’nteumena zai tingkume benai Lebime, ziemmena kedi-kechei ’nteumena je ngua lu Tingwang ki lam’mbe hang de lei; zai Tingwang ki gene ngaudaube samhatkaibe leisikuak gu sam ramme pelane penui ’nteumena geseube gene pa kiâliâ gai de lei.

³¹Dadege heguang ne pe bâm ge sap lu ze, aipau leisikuak ge rawgai’ndibe samhatkaibe gu sam ramme tei ze bam ra pelung leine ne benai pa keringbe leine ne pe gu hingde ramme benai pe gu hingde rawdiakkaibe ramme tei’mmi ze Tingwang je sui ra Tingwang masua gene pa samhatkaibe tâ tew de lei,

³²chidadege â Jerusalem ge benai Benjamin ge bamme ’nteumena ne chige ’ntiprip ze bam ra pa ne penui ’nteumena je tew gai bei de lei. Zai Jerusalem ge bamme ne penui peume Rapeu Hera gu samhatkaibe luigum ze tâtew de lei.

³³Zai Josiabe ne Israelme gu heram leine gene mâ-katenetbe zat leine lutua gai ze, Israelram ge bamme leine je Tingwang penui Rapeu guâ ’nggua ze bam ra tew gai bei de lei. Pa keringbe ting ge â penui peume Rapeu Tingwang je penui sui ze bambe gene tatlietat mak ze bam de lei.