Read Zeme Naga 2 KRONIKIL 35 Bible Online

2 KRONIKIL 35 - Zeme Naga bible

2 KRONIKIL 35

¹Josiabe Jerusalem ge tat’ntuahengi reibam de lei; zai raîlangbe kêu gu hezie kereu ze medai mai ge tat’ntuahengi gu melipoine penui tewchat te lei.

²Pa ne tingkume ramme je penui tâbâm ge sûm gai de lei, zai Tingwang ki tâ ka’ngguabe ge tew’mmi ra penui je gecheu gai de lei.

³Zai pa ne Israelme leine je mâ-kageteime zai Tingwang hangge ziemmena ka’nchime Israelme je, acheu sa ze, “Israelram gu heguang Dabidbe na Solomonbe ne tewgaibeki lungge hingdebung ka’nchibe kai lau; ningnui keîtoa gene chize pua bam dai ra ’nnang ta gu de lei. Chunage Tingwang ningnui Rapeu benai pe gu ziemmena Israelme guâ ’nggua zu lau.

⁴Israelram heguang Dabidbe benai pe na Solomonbe ne betak hang geteigaibe chai sui ze ningnui peume kiduîme bambe tak gene ningnui pebau-bau tew ze kedâkua zu lau.

⁵Ning puiname peuna pebau-bau bambe chai sui ze pebâm ka’nchibe ge sap kai ra lei, zai Lebime kiduîme leine dage peize penui bau bau tew ze bam lau.

⁶Zai tat’ntuahengi gu melipoine tewchat lu ningnui runne ningnui je tew’nchi le lau, zai Mosabe dagene Tingwang gu sam patbe luigum ze tew ra ningnui puiname hangge reheî gai du lau,” ze kacheu de lei.

⁷Chipau châng dege â Josiabe ne chige bamme baudime hela kau leine je penui gu tat’ntuahengi kela hangge meli poine ramme, kemei poine ramme chang himreu riâ zai getumsei chang chum riâ kauruidung ruagene lupat lu pei gai bei de lei; airamme ze heguang gu kebambe gene lupat lu ze pei gai bei de lei.

⁸Zai pe gu heguangsinme ramme ne penui suiyi ze baudime, tingkume, benai Lebime dage peipat kai de lei. Hilkiabe, Zekariabe zai Jehielbe, Hera ki gu besuitewme ramme ne tat’ntuahengi gu kelapeibe hangge meli poine ramme benai kemei poine ramme chang na ze haî seruk zai getumsei ramme haî chum tingkume dage pei gai de lei.

⁹Konaniabe zai pe kina hangna Shemaiabe benai Nethanelbe zai Lebime ruage besuitewme Hashabiabe, Je-ielbe zai Jozabadbe ne tat’ntuahengi hang meli poine ramme benai kemei poine ramme chang mengeu zai getumsei ramme haî mengeu Lebime je pei gai de lei.

¹⁰Tâ’ngguarabe hangge kedâ gai lu dege, tingkume penui bâm bâm ge sap kai zai heguang ne diegaibe luî gene Lebime penui bau-bau tew ze sap kai de lei.

¹¹Zai tat’ntuahengi gu melipoine penui ne tewchat kai de lei, dadedge penui dadegene tingkume ne lulube hejai ze tingkume ne kezin gai de lei, chipau kakge Lebime ne melipoine gei lapat kai de lei.

¹²Zai Mosabe gu leisikuak ge rawgaibe gum ze, Tingwang dage pei gai ra baudime ruage peuna ramme bambe tak gene chiramme penui ’nzi gai le ra hangge kerube-râtewbe ramme penui ne lupatchâm gai de lei. Chigum ze getumsei ramme ze du tew gai de lei.

¹³Zai hingde tewgaibe luigum ze tat’ntuahengi gu melipoine ji ze penui hemi gene rûteu de lei, zai ka’nchibe herâtewbe mei ji ramme penui heli ramme, heli kedibe ramme, zai mâkuak ramme gene penui ne lang ze baudime hela kau leine dage kelua ze teimie gai de lei.

¹⁴Zai chipau châng dege â tingkume, Aaronbe name bau â rûkambe-râtewbe peipatbe tâ ge benai pechâ yibe ramme peipatbe tâ hangge tingmuîzeu riâ ’nchuak’nsui ze bam di dadege penui â penui runne penui hang benai tingkume hangge teleu lu bam de lei; chigum ze Lebime benai Aaronbe name tingkume bau â penui runne penui hangge teleu lu bam de lei.

¹⁵Asapbe name heleutewme bau, Asapbe, Dabidbe, Hemanbe zai heguang gu kemeu’mpeu Jeduthunbe aime ne diegaibeibe luigum ze penui bâm bâm ge sap kai de lei; zai kemuireîme kemui ’nsangne ge bam lei; penui puiname Lebime ne penui hangge ’ngguazun-gaibeibe ziegene penui â penui gu tâguâ-ka’ngguabe gene hela tat ra ’nnang ta di de lei.

¹⁶Chigum ze heguang Josiabe ne diegaibe luigumbe gene tat’ntuahengi reibamrabe benai rûkambe-râtewrabe hang peipatrabe hang Tingwang gu tâ’ngguarabe leine hang chipau mai ge reheî gai de lei.

¹⁷Zai chige bamme Israelme ne chipau ting ge tat’ntuahengi reibam de lei, zai ’nduihîkaimakbe tingku-ngi ze hezie senane reibam de lei.

¹⁸Kemeu’mpeu Samuelbe ting gene seu ze aigumbe tat’ntuahengi ze Israelram ge hengî gai mak te lei; Josiabe benai tingkume zai Lebime zai Judame benai Israelme zai Juda benai Israelram ge bamme zai Jerusalem ge lungme ne tat’ntuahengi kahengîbe gumbe Israelram gu heguangme mî ne du hengî gai mak kerei lei.

¹⁹Josiabe ne kaheguangbe kereu ze desat kum ge aipau tat’ntuahengi ze kahengî de lei.

²⁰Aipau ramme chângge Josiabe ne kellumki teleu’mmi gai lu lage Euphrates ge Karkemis gene herei ra Ijip heguang Nekobe hang de lei, dadege Josiabe pechu ’nggi ra zuapat te lei.

²¹Kane Nekobe ze pe dage hepâusam pungka’nruime je lang gai ze, “Judaram heguang gau, anai hangna ze châu nung ze lau? Nemai ge I ne ningchu ’nggi ra wangbe mak lei; kane I hereika’nggibeki peireige ’nggi ra wang lei; zai Hera ne achu kelua ze tew ra samdie gai lei. A dage bambepeu Hera je ’nggi ta du lau, makchai â, ningchu pa ne tew’ngga gu de lei,” ze kacheu de lei.

²²Acheuleusede Josiabe pe dagene ’mbiasua mak ze pechu ’nggi ra pe runne pe luî tewchâm de lei. Hera mui gene patbe sam Nekobe kuâ pa ne ’ngking mak ze Megiddo kâm ge hereika’nggibe bâm ge pa herua gai di de lei.

²³Dadege â heguang Josiabe je hetubaimpi kapme ne kaptau bei de lei; dadege â heguang ne pe guâ ka’ngguame je, “I hejam de daze achu teitat kai zu lau,” ze kacheu de lei.

²⁴Chidadege â pe guâ ka’ngguame ne pechu timriang gene teipat kai lu pe gu pakenabe timriang gene pechu Jerusalem ’mbe nguawang gai bei de lei. Dadege â pa chai di de lei, zai pe peume raw ge pechu bai gai bei de lei. Judaram benai Jerusalem leine ne pechu desui gai de lei.

²⁵Jeremiabe ne du Josiabe peireige pa kadesuibe sam sa gai de lei; zai nemai riâ chang ze heleutewchime ’mpeumi ramme benai ’mpuimi ramme ne Josiabe peireige penui ne desui ze pe rasam sa lamui lei. Israelram ge penui ne airamme ze hingde hang tew gai bei de lei; pie le lau, chiramme ze kadesuibe leisikuak ge raw gai de lei.

²⁶Zai Josiabe ne tâtewbe rasam kêdadabe ramme, zai Tingwang gu hingde ge rawgaibeibe luigumbe gene pa tâ-yibe tewbe rasam,

²⁷zai pe tatew ramme rasam raîlangbe gene chu ze nâlangbe riâ gu ze Israelram benai Judaram gu heguangme rasam rawgaibe leisikuak ge raw gai de lei.