Read Zeme Naga 2 KRONIKIL 36 Bible Online

2 KRONIKIL 36 - Zeme Naga bible

2 KRONIKIL 36

¹Heramdeiname ramme ne Josiabe na Joahazbe je ngua lu ze Jerusalem ge pe peu kelei ge pechu heguang hang sum gai bei de lei.

²Jehoahazbe pa heguangchube ting ge pe kum ’ngkai ze kechum chang di de lei; zai Jerusalem ge pa ne kum chum heguang gai de lei.

³Chidadege â Ijip heguang ne pechu bangnam gai bei de lei, zai pa ne heram deiname peireige ’mpuâ hang gepût talent haî kat zai gechâk talent kat pei ra rang gai bei de lei.

⁴Zai Ijip heguang ne Jehoahazbe kinapeu Eliakimbe je Jerusalem benai Judaram ge heguang hang sum gai lu dege pe ji Jehoiakimbe ze ’ntak kai bei de lei; kane pe kinapeu Jehoahazbe je â Nekobe ne Ijip ’mbe nguatat kai bei de lei.

⁵Jehoiakimbe pa heguangchube ting ge pe kum ze ’ngkai ze mengeu di de lei, zai Jerusalem ge pa ne kum kereu ze kat kaheguang de lei; pa ne Tingwang pe Rapeu mikngau ge tâ-kesiabe tew gai de lei.

⁶Pechu ’nggi ze Babilon heguang Nebukadnezzarbe ne pe dage wang de lei. Zai pechu Babilon ’mbe teitat ra hegeîria ne pechu pi ’ndi de lei.

⁷Nebukadnezzarbe ne Tingwang ki gu heli kerua ramme ze du Babilon ’mbe teitat lu Babilon ge pe gu heguang ki ge kai ’ndi de lei.

⁸Zai Jehoiakimbe gu tâtewbe rasam kêdadabe ramme benai pa ne katenetbe tâ tewbe ramme, zai pe peireige kesiabe ngaupatbe ramme ze pie le lau, chiramme ze Israel benai Juda ram gu heguangme gu leisikuak ge raw gai la lei; zai pe na Jehoiakinbe ne pa kelei ge kaheguang de lei.

⁹Jehoiakinbe pa heguangchube ting ge pe kum ze desat chang di de lei, zai Jerusalem ge pa ne kêu chum ze hezie kereu heguang gai de lei. Tingwang mikngau ge pa tâsiabe tew gai de lei.

¹⁰Patingkum gu keriakting ge heguang Nebukadnezzarbe ne lang gai bei ze Babilon ge Jehoiakinbe je nguawang de lei, zai Tingwang ki gu helikerua pemîhungbe ramme teiwang’mpam gai de lei, zai pe kinapeu Zedekiabe je Juda benai Jerusalem peireige heguang hang sum gai de lei.

¹¹Zedekiabe pa heguangchube ting ge pe kum ze ’ngkai ze kat chang di de lei, zai Jerusalem ge pa ne kum kereu ze kat heguang gai lei.

¹²Pa ne Tingwang pe Rapeu mikngau ge tâsiabe tew gai de lei. Kemeu’mpeu Jeremiabe, Tingwang mui gene patbe sam paupeu masuage pa kecheiluîtewkeu gai mak tai lei.

¹³Heguang Nebukadnezzarbe, pechu Hera ji gene deseu ra langpeu je du pa â ka’nggi de lei; pa â Tingwang Israelme Rapeu dage ’nreiwang ra hang pe kunrachi ze nei mak tai de lei.

¹⁴Tingkume kanguame besuitewme leine benai baudime du heramzatme ne mi katenetbe tâ tewbe chai sui ze lungsang ga luisui ze bam di de lei; zai pa ne Jerusalem ge tew’nchigai’ndibe Tingwang ki ze penui ne tewhebâ gai bei de lei.

¹⁵Tingwang penui peume Rapeu ne penui peireige benai pa bambe bâm peireige ka’nggiabe ziegene penui dage pe gu hepâupaume dagene sam lang gai ’nsui bam lei.

¹⁶Kane penui peireige Tingwang ne pe râtapat ze tew’mmidailakrabe riâ chang ze penui ne Tingwang gu hepâupaume ramme je teikeliang, pe sam ramme peireige naîlatew, zai pe gu kemeume je teihenuitew’nsui ze bam lei.

¹⁷Chipauziegene rehang-heleume, gechîngme benai chipau-paime peireige ngauka’nggiabe ga ze penui gu ka’nchibeki ge hiazutkie ne penui gu rehangme je tewchatme Kaldiame gu heguang ne penui je ’nggi ra pa ne teichu gai bei de lei; zai pa ne penui ’nteumena je pe ba ge pei gai bei de lei.

¹⁸Zai Hera ki ge helikerua kedibe benai kecheibe ramme, zai Tingwang ki heurâ ramme, heguang benai pe gu heguangsinme heurâ ramme, airamme leine pa ne Babilon ’mbe teiwang gai ’ndi de lei.

¹⁹Zai Hera ki ze penui ne rû ’ndi de lei, zai Jerusalem kerie ramme tewkau gai ze hemi ne pe gu heguang ki ramme rû ze helikerua pemîhungbe zat ramme tew’nsia ’ndi de lei.

²⁰Hiazutkie gene ’mbiapatme je pa ne Babilon ge kebang hang nguatat kai ’ndi de lei, zai Persia heguangram tei’nsapchugaibe riâ chang mak tâne pa benai pe name guâ penui ’nggua ze bam de lei,

²¹heramme ne ’ntakbambe mai ramme hengîlumteugaibe riâ chang ze Jeremiabe dagene Tingwang ne sam ranggaibe tewpui gai ra hangge zeu. ’Ntakbambe mai reibammakbe tewpui gai ra hang heram ze kum riaksena put-hâmmuî gai lei.

²²Zai Persiaram heguang Sirabe gu raîlangbe kum ge Jeremiabe dagene Tingwang sam ranggaibe tewpui gai ra hangge Persiaram heguang Sirabe je peize pe gu heguangram pelane ge pauruatui gai ra, zai chize raw du rawkeu gai ra Tingwang ne pe lung tew’ngnguplai gai bei de lei,

²³“Persiaram heguang Sirabe ne aigum ze salia ze, ‘Tingwang tinggîm Rapeu ne kedeirei ge heguangram pelane achu pei gai ’nde lei, zai Juda ge bambe Jerusalem ge heki I ne pe hang tew gai ra achu lang gai ’nde lei. Ningnui, pe gu ’nteumena ruage mi-mige bambe kau dage pe Rapeu Tingwang ne peize nguabam bam lau,’ kacheu de lei” ze acheu zeu.