Read Zeme Naga 2 KRONIKIL 4 Bible Online

2 KRONIKIL 4 - Zeme Naga bible

2 KRONIKIL 4

¹Pa ne hetageî ne tewbe herâtewbe-kaira petâ ge sâu ’ngkai, pedit ge sâu ’ngkai zai pehut ge sâu kereu tew gai de lei.

²Chidadege â pa ne heduidua hang hetageî ne lua gai de lei; chize ’ngguareu lei, pekung-gua kena kakge sâu kereu, pehut sâu mengeu zai heria ne heduidua ’ndeuguâwang-tuisiak kai dege sâu himreu lei.

³Getumsei luî hang tewgaibe ramme heduidua sîng ze ’ndeuwang gai dege sâu himreu lei; heduidua kam hang tewgaibe ge getumsei luî ramme ’nria kena tew gai lei.

⁴Getumsei kereu ze kena ge kechum ze tingpeî ’mbia pe ju ’nrik, kechum ze tingrun ’mbia penui ju ’nrik, kechum ze tingpî ’mbia penui ju ’nrik zai kechum ze tingbia ’mbia penui ju ka’nrikbe getumsei kereu ze kena peirei gene heduidua ze teichu de lei; zai pechai ramme leine â, pelung ’mbia gut kam lei.

⁵Peseu ze bapei kat riâ lei; bekung â lilipâ pabe gumbe hepiakkung gum lei; heduidua ge hedui litar chang riakseruk gut lei.

⁶Heduipia ra hang pa ne heduikuak dibe kereu tewgaibe ze kuak mengeu ze tingpî ’mbia ge kai zai kuak mengeu ze tingpeî ’mbia kai lei. Rûkambe-râtewbe ge pekauteibe ze sûm’nchi ra ai mâkuak ramme bam lei, zai duikuak ze â duipia ra tingkume ne tei lei.

⁷Gechâk ne tewbe hemibung-kaira kereu ze tew ra ranggaibe tak luigum ze tew gai de lei, zai chiramme ze kellumki ge tingpî ’mbia mengeu, tingpeî ’mbia mengeu acheu ze kai de lei.

⁸Zai pa ne leisi-kaira kereu du tewgaibe ze kellumki ge kai de lei, tingpî ’mbia mengeu zai tingpeî ’mbia mengeu acheu ze kai de lei. Zai pa ne gechâk ne tewbe duikuak haî kat teleu gai lei.

⁹Zai pa ne tingkume gu hekisiâm zai hekisiâm kedibe zai hekisiâm gu ’ngkam ramme du tew gai lei, zai hetageî ne chipau ’ngkam ramme ze lua gai lei;

¹⁰zai chi heduikuak ze heki kemik tingpî ’mbia ge bambe ge pa ne kai bei de lei.

¹¹Hurambe ne du heli ramme kedeituakbe kuak ramme, zai heduikuak ramme tew gai de lei. Chigum ze heguang Solomonbe hangge Hurambe ne Hera ki peireige tewgaibe tâ pa ne tew kam gai de lei:

¹²gechia’ndi kena, mâkuak ramme, zai gechia’ndi kena peireige ruasuabe kena zai gechia’ndi kena peireige mâkuak tewgaibe ruichim ra hegeîrak tew gai de lei;

¹³gechia’ndi peî’nning ramme ge mâkuak ramme taugaibe ge chûmchim ra pechûp kena hang tewbe ge bepuâ hang turiechipum luî haî medai tew gai de lei, chi pechûp kat ge turiechî pum luîtewbe ’nria kena tew gai lei.

¹⁴Mâ-kuak kairabe-kaira benai mâkuak ramme kena tewherua gai lei,

¹⁵zai chipau heduidua kangge getumsei kereu ze kena bambe tew gai lei.

¹⁶Tingwang ki hangge heguang Solomonbe hang Hurambe ne heli ramme kedei tuakbekuak ramme, peruangbambe terui ramme, zai kerua ka’nnangbe zat ramme ze hetageî ne lua’nniksik kai lei.

¹⁷Jordan kâm ge Sukkoth benai Zereda kakge hegam dei bambe bâm gene chiramme heguang ne langlua gai de lei.

¹⁸Solomonbe ne airamme misongga ze tewgaibe ziegene hetageî rît ’ndeuchi ta di de lei.

¹⁹Chigum ranggaibe tak luigum ze Solomonbe Hera ki ge bambe merua ramme leine tew gai de lei: Gechâk ne tewbe herâtewbe-kaira, Hera hang tingku peipatkaibe kairabe mâ-kaira,

²⁰hemibung-kaira benai helunglangbe ka’nchibeki suage mâ ’ntaurabe hemibung-kaira benai chige gechâk ka’nchibe ne tewbe hemibung ramme tew gai de lei.

²¹Mâpâ ramme, hemibung ramme, desip ramme, ’nchilangbe gechâk ramme,

²²kachâ melei kateleube tegîne ramme, duikuak ramme, mâ-perîmyibe keruakaibe kuak-piak ramme, zai hemikuak ramme, gechâk ka’nchibe ramme, kellumki ’ngkam ramme, ’nchilangbe bâm gu ’ngkam ramme, zai kellumki lungge hekisiâm kedibe ’ngkam ramme ze gechâk ne tew de lei.