Read Zeme Naga 2 KRONIKIL 5 Bible Online

2 KRONIKIL 5 - Zeme Naga bible

2 KRONIKIL 5

¹Heguang Solomonbe ne kellumki tewbe tâ leine tew kam gai lu dege pe peu Dabidbe ne Tingwang hang peipat’nchigaibe kerua pelane gepût, gechâk zai kêdadabe kerua ramme kellumki gu keruaki ge pa ne kai de lei.

²Chidadege Solomonbe ne Israelme gechîngme benai pezat ge besuitewme, Jerusalem ge Israelme kibaume ruage kanguame besuitewme ramme je, Zaion kacheube Dabidbe gu namdi gene Tingwang gu samhatkaibebung teihang ra, nguawang’ndui gai de lei.

³Zai pasenabe kêu ge kahengîbe ge Israelme ’mpeumi leine heguang suage wang’ndui gai de lei.

⁴Zai Israelme gechîngme leine wang gai de lei, zai Lebime ne hingdebung ze teihang de lei.

⁵Zai penui ne hingdebung ze Hera bambe paîki, paîki lungge heli ka’nchibe pelane teihang de lei; tingkume benai Lebime ne chiramme teihang de lei.

⁶Zai heguang Solomonbe benai pe suage wang’nduigaime Israelme bau leine hingdebung suage wang ze misongga riamkamlakbe meli benai getumsei ramme zene herâtew de lei.

⁷Chigum ze tingkume ne Tingwang gu samhatkaibebung ze kerubme kan kangge ’nchilangbe bâm helunglangbe kakellumbe bâm, pebâmrabe ge teiwang gai ze kai de lei.

⁸Kerubme (kena ne) hingdebung benai bechia ramme ruichim ra hangge, hingdebung kaibe bâm peireige penai kan kehingpat kai de lei.

⁹Pa’ntung ramme ze tie kagesang lei, pa’ntung tûnroi ramme ze helunglangbe kakellumbe bâm suage ’nchilangbe bâm gene ngau lu lei; kane hela gene â chiramme ze ngauchi lak lei; zai chiramme ze nemai riâ la lei.

¹⁰Hingdebung lungge Ijip gene Israelme patbe mai ge Tingwang ne penui dage samhatkaibe bâm, Horeb ge Mosabe ne tingchudepei kena kaibe runne zangno, kêdabe â mâ de chige ga lei.

¹¹Ka’nchibe bâm gene tingkume ramme zuapat dege (chige tingkume bamme leine â, penui ruage mâ de gechâmbe bam mak ze penui runne penui je tew’nchi kam lu ze bam di de lei;

¹²zai Lebime heleutewchime, Asapbe, Hemanbe, zai Jeduthunbe, penui name benai penui kiduîme penui paîni yibe kaizun lu ze hegeîluîkie ka’mmutme tingkume ziemmena haî kat ze ’ngkaime je ngua lu herâtewbe-kaira gene tingbia ’mbia ge ’nsum, ’ntoî, zai ’nra ramme tei lu ze sap te lei;

¹³zai Tingwang dage hegeîluîkie ka’mmutme benai heleutewme ne hesuiyibe getoabe pei gai ze heleutew-kehingbinggairabe ze penui deu de lei), zai hegeîluîkie benai ’nsum ramme, zai heleu gu kerua zat ramme leine tei ze Tingwang je toa ze, “Pa â yi dadege, pe gu hungka’ntipbe â betingbeta bam bam lei,” ze heleu tuachu gai dege Tingwang ki geze kemua ne puigit ze bam di de lei,

¹⁴chidadege â chi kemua zene tingkume tâ’nggua ra sapchuchi ta di de lei.