Read Zeme Naga 2 KRONIKIL 6 Bible Online

2 KRONIKIL 6 - Zeme Naga bible

2 KRONIKIL 6

¹Chidadege â Solomonbe ne sa ze, “Tingwang ne pa â muîgitbe ge bam gai kanî ra ka’nchâ lei, kacheu de lei.

²Nang betingbeta bam bamrabe bâm hangge ning hang sasuang ze bambeki I ne teleu gai de lei,” ze kacheu de lei.

³Chidadege â Israelme ’nteumena sapbambe luage heguang ne sap’nsua lu ze Israelme wangka’nduime ’nteumena je ’nnam gai de lei.

⁴Zai pa ne, “Tingwang Israelme Rapeu, pe mui gene a peu Dabidbe dage samhatkailube leine pe batâ gene tewpuigaibeipeu je peize toa bam lau.

⁵A peu je, ‘Ijipram gene I ne a gume bau je nguapatkaibe mai gene seu ze a ji bamrabe bâm hang heki tew gai ra Israelme ruage I ne namdi kelâng gai mak lei, zai a gu Israelme bau peireige heguangsinpeu hangge mi je du I ne kelâng gai mak lei;

⁶kane I a ji bamrabe bâm hangge Jerusalem ze I ne kelâng gai zai a gu Israelme bau peireige bam ra hangge I ne Dabidbe je kelâng gai de lei,’ ze kacheupeu jeu.

⁷Zai Tingwang Israelme Rapeu ji gene heki tew gai ra a peu Dabidbe lung ge ’nning bam de lei.

⁸Kane Tingwang ne a peu Dabidbe je, ‘A ji gene heki tew gai ra ning lung ge ’nninggaibe ze yi-desang de lei;

⁹acheusedu nang ne heki ze â tew ra mak lei, kane ning hang lungkeurapeu ning na zene a ji hangge heki tew gu lei,’ kacheu de lei.

¹⁰Chuna â Tingwang ne pe tâ tew ra hatkailube ze tewpui gai ’nde lei; I ne a peu bâm ge chu gai ze, Tingwang ne sam deseugai’ndibe luigum ze Israelme gu heguang-bamrak ge I ne ’ntau ze, zai Tingwang Israelme Rapeu ji gene I ne heki tew gai ’ndi dadegeu.

¹¹Zai Tingwang ne Israelme dage samhatkaibe sam bambe hingde bung ze chige I ne kai gai de lei,” ze kacheu de lei.

¹²Chidadege â Israelme baudime bambe gene Tingwang gu hingdebung suage sap kai lu Solomonbe pe ba kena getuapat kai de lei.

¹³Solomonbe ne besat tewgaibe, petâ sâu mengeu, pedit sâu mengeu zai pehut sâu chum hetageî ne tewgailube ze kerie lung kizesua ge pa ne kai de lei; dadege pa chige sap kai de lei. Chidadege â Israelme baudime bambe ruagene kukdung gai lu tinggîm ’mbe pe ba kena getuachu gai de lei;

¹⁴acheu sa ze, “Hei Tingwang Israelme Rapeu gau, ning tâtewme penui lung leine ne ning masuage tatme dage samhatkaibe nang tei’ntip ze nang hungka’ntipbe teiliapeu, nang gumbe Hera tinggîm ge benai kedei ge mî de ga lei;

¹⁵ning guâ ka’ngguapeu, a peu Dabidbe dage nang ne sam rang’nchigai’ndibe ze nang ne chîtei bam lei; eu lei, nemai ge nang ne ning mui gene sam sa gai bei de lei, zai ning ba ne nemai aize tewpui gai bei de lei.

¹⁶Chipauziegene chunage Hei Tingwang Israelme Rapeu gau, ning guâ ka’ngguapeu, a peu Dabidbe dage nang ne samhat kai ze, ‘Nang ne a masuage tat bambe gum ze ning gume ne penui ’mpuî ge tat’ntîng ze a gu hingde ge tat bei zai â a masuage Israelme gu heguang-bamrâ ge ’ntaurabe kau hang ning hangge ziemmena pat bam gu lei,’ kacheube ze chibam lau.

¹⁷Chipauziegene chunage Hei, Tingwang Israelme Rapeu gau, nang ne ning guâ ka’ngguapeu Dabidbe peireige sagaibe ning sam ze peize tew’ntip kai be lau.

¹⁸“Kane Hera ne kedeirei ge ziemmena dage bam bam ra run de mei? Pie le lau, tinggîm benai hulangbe tinggîm zene ningchu â ’nrakgut kam lak lei; aipau ki I ne ning hangge tewgaibe ze chei’mpia di zeu!

¹⁹Acheuleusedu ning guâ ka’ngguapeu ne ningchu kiâm ze kiebe kuâ ’ngking gai lau, zai ning guâ ka’ngguapeu ne kiâm ze kiegaibe ze, Hei Tingwang a Rapeu gau, ’nningtinggeu gai lau;

²⁰ning guâ ka’ngguapeu ne aipau bâm ’mbia ’nrik ze kellumgaibe kuâ nang ne seu le ra, ning ji teichu gai ra, nang ne deseugaibe bâm aipau ki ’mbia ge nang ne tîngna, tingmuî ning mik ne pie bam ra hangge zeu.

²¹Ning guâ ka’ngguapeu benai ning gu Israelme baume ne aipau bâm ’mbia ’nrik lu ze kellum dezai penui gekiebe kuâ ze nang ne ’ngking gai lau; eu lei, nang bambe bâm tinggîm ’mbene ’ngking gai lau; zai nang seu dezai lun gai lau.

²²“Mige pa ne pe ramname peireige kesiatew gai bei ze pa deseu ra chang ze aipau ki ge ning gu herâtewbe-kaira suagene pa deseu ra wang dizai â

²³tinggîm ’mbene nang ne ’ngking gai ze pa ne miramme je kesiatewbe gu pe tatew ze pe runne pe peireige wangchang dai ra tewgaibe zene kemaube hang pechu chakkaibe chang ze, zai pelingtewme je pa pelingtewbe luigumbe gene pechu gugaihâbe chang ze ning guâ ka’ngguame je nang ne samram gai lau.

²⁴“Ning gu Israelme bau ne ning mikngau ge hemuigai’ndibe ziegene penui teureime ne penui je duî nan ze penui chigene helatwang dai ze ning ji kû ze aipau ki gene kellum ze ning dage penui keneibe kie gai dizai â

²⁵nang ne tinggîm ’mbene ’ngking gai lu ning gu Israelme bau gu hemui lun gai lau, zai penui benai penui pau-paime hangge nang ne heram peigaibe ge penui je nguawang gai dai lau.

²⁶“Ning mikngau ge penui ne hemuigai’ndibe ziegene nang ne tinggîm kebanam ze hedui ga di ze aipau bâm ’mbe penui ne ’nrei’nsua lu ning ji lutau gai ze penui je nang ne tewkahereube lua penui gu hemui gene helatwang dezai,

²⁷nang ne tinggîm ’mbene ’ngking gai lu ze penui tatrabe ’mpuî keyibe nang penui je geteigaibe luage ning gu Israelme ning guâ ka’ngguame gu hemui ze lun gai lau; zai nang ne ning gume hangge penui heu hang heram peigaibe peireige tingruikeu gai ra pei lau.

²⁸“Heram ge herakûm mei, herarît mei, kezai mei, heriâmkau mei, tinggûmbe mei, penui gu namdi ruage namdi kat peireige penui teureime ne sut mei; mi duânggabe tewkahereube hang ’ndaikau kau zat ne wang mei,

²⁹mi-mige ne mei nune ning gu Israelme leine ne mei pechu tewkahereube benai pe suikahereube chî kam lu aipau ki lam’mbe pe ba kena getuapat’nrik kai lu kellum ze mâ-mâ luneibe kie gai dizai â,

³⁰nang bambe bâm tinggîm ’mbene ’ngking gai lu, penui je lun gai ze (ning runne ne ziemmena leine lungtak â chî lu daze) penui kebambe tak leine nang ne chî lu ze penui ka’nnangbe pei gai lau;

³¹chidezai anui peume hang heram nang peigaibe ge penui lungbe ge ningchu hingchi ze penui keringbe ting ge peize ning ’mpuî ge tat bam le ra hangge zeu.

³²“Chipau luigum ze mige hesang’mpeu ning gu Israelme zat makme, ning ji kedibe benai ning ba ranchi zai ning ba getuapatkaibe ba hang ziegene heram kedeu ’mbene wang ze aipau ki lam’mbe ’nrik lu kellum dezai,

³³nang bambe bâm tinggîm ’mbene nang ne ’ngking gai ze hesangkedeu’mpeu ne ningchu kube luigum ze pe hang nang ne tew gai lau; chidezai ning gu Israelme ne tew gum ze kedeirei ge ziemmena zat leine ne ning ji chî lu ningchu hingchi ze bam ra, zai I ne tewgaibe aipau ki ze â ning ji gene tewgaibe ki lei be peize penui chî le ra hangge zeu,

³⁴“Ning gu ziemmename ne penui teureime dage herei’nggi ra penui je nang langgaibe ’mpuî gene zuapat ze nang ne kelânggaibe aipau namdi benai ning ji gene I tewgaibe ki lam’mbe penui ’nrik lu ningchu kellum dizai â

³⁵nang ne penui kakellumbe kuâ benai penui keneibe kiebe kuâ tinggîm ’mbene seu lu ze penui deu hangge ’ngngâ gai lau.

³⁶“Hemuimakbe kau mî de ’nggabe ziegene ning mikngau ge penui ne hemui tâ tew gai bei ze nang ne penui peireige ning râta ze penui je heram kenahia ge benai heram kedeu ’mbe kebang hang nguatat kai ’nde ra penui teureime ba ge pei gai bei de lei;

³⁷acheuleusede penui je kebang hang nguatatkai’ndibe heram gene penui lung heli ze penui kebang chang ze bambe heram gene ning dage penui ne penui keneibe kie ze, ‘Anui ne hemui gai ze kemakbe tâ tew ze tâ kesiabe tew gai ’ndi de lei,’ acheu ze;

³⁸penui ne penui ka’nningbe benai penui lung leine ne penui je kebang hang nguagaibe heram, penui kebangtewbe heram gene penui ne penui lung leine ne benai penui ka’nningbe leine ne heliwang ze, nang ne kelânggaibe namdi, penui pau-paime je nang peigaibe heram ’mbia benai ning ji hanggene I tewgaibe heki ’mbia penui ne kellum gai di zai â,

³⁹nang bambe bâm tinggîm gene penui kellum-kuâ benai penui keneibe kiebe kuâ ’ngking gai lu, penui ka’nnangbe hangge tew gai ze ning mikngau ge hemui tâ tewme je lun gai lau.

⁴⁰A Rapeu gau, chunage aipau bâm ge kakellumbe kuâ ge ning mik peize rakpat kai ze ning kun ’ndualie gai lau.

⁴¹“Zai chunage a Wang a Rapeu gau, chu lu nang tâtewchibe hingdebung tei lu nang gesaube bâm ’mbe tat zu lau. Hei Tingwang a Rapeu gau, ning gu tingkume je peize tewka’nringbe ne bâ gai lu ze bam lau, zai ning gu ziemmena ka’nchime ne peize nang keyibe ge penui suiyigaihâ ze bam lau.

⁴²Hei Tingwang Hera gau, ning gu ’nnukkai’ndipeu je tuâpat kai ra mak te lei! Ning guâ ka’ngguapeu Dabidbe ziegene ning gu hungka’ntipbe ze chibam lau,” ze kacheu de lei.