Read Zeme Naga 2 KRONIKIL 7 Bible Online

2 KRONIKIL 7 - Zeme Naga bible

2 KRONIKIL 7

¹Solomonbe kellum kam gai dege tinggîm ’mbene hemi wangkeu ze rûkambe-râtewbe benai herâtewbe ramme heimut ’ndi de lei, zai Tingwang ngeudibe ne kellumki lung ze puigit bam di de lei.

²Zai Tingwang ki ze Tingwang ngeudibe ne puigit bamdibe ziegene tingkume ramme Tingwang ki gutchi lak ze bam de lei.

³Hemi wangkeube benai Tingwang ngeudibe ne kellumki ze puigit bamdibe ze Israelbe name ’nteumena ngau lu dege â, ’mpuîki ge penui ju ’ngkumkeu gai lu, Tingwang je penui kellum ze penui suiyibe sam sa ze, “Pa keyibe ziegene pe gu hungka’ntipbe ze â, betingbeta bam bam de lei,” ze kacheu de lei.

⁴Chidadege â heguang Solomonbe benai baudime ’nteumena ne Tingwang suage herâtew gai ze bam lei.

⁵Heguang Solomonbe ne getumsei chang ’ngkai ze kena zai meli chang haî kat ze ’ngkai herâtewbe hang peipat kai de lei. Chigum ze heguang benai baudime ’nteumena ne Hera ki ze diepat’nchi gai de lei.

⁶Tingkume ramme ne penui bâm bâm ge sap kai de lei; Tingwang, pa hungka’ntipbe betingbeta bam-bambeibe ziegene heguang Dabidbe ne Tingwang je toa ra hangge heleutewbe ge teibe kerua ramme ze Dabidbe ne Hera je toabe ge teibe kenat ramme, Lebime ne du tei lu sap kai de lei; Tingkume ne penui je sapda lu hegeîluîkie ramme ka’mmut te lei; zai Israelme leine sapbam de lei.

⁷Dadege Tingwang ki suage bambe heguang ki kerielung gu sûngngang bâm ze Solomonbe ne tew’nchi gai de lei; Solomonbe ne hetageî ne teleugaibe herâtewbe-kaira gene â rûkambe-râtewbe, mâ-himlei-râtewbe zai pechâ peipatbe ze gutkam lak ra changdibe ziegene chipau bâm gene rûkambe-râtewbe benai pechâ ze peipat kai de lei.

⁸Chipau ting ge Solomonbe ne hezie sena hengî ze bam de lei, zai Hamath gutbe kemui gene Ijip ’Nggeuki riâ changbe Israelme leine bamme baudime pe dage bam de lei.

⁹Zai padesatbe mai dege baudime gu ngidi hang tew de lei; hezie sena herâtewbe-kaira diepatka’nchibe tâ tew zai hezie sena hengî-keduahang dadegeu.

¹⁰Pasenabe kêu gu hezie ’ngkai ze kechum mai dege â, Tingwang ne Dabidbe benai Solomonbe zai pe gu Israelme peireige keyibe teiliabe ziegene penui suiyi’nta ze penui ki lam-lam tat dai ra pa ne lang gai bei de lei.

¹¹Aigum ze Solomonbe ne Tingwang ki benai heguang ki tew kam gai de lei; Solomonbe ne Tingwang ki benai pe ki hangge tew ra pe lung ge ’nninggailube leine tew-wangtui kam gai lu de lei.

¹²Chidadege â tingmuîzeu ge Tingwang ne Solomonbe je liâ ze, “I ne ning kuâ seuchang lu ze aipau ki I ne a ki herâtewbeki hang kelâng gai ’nde lei.

¹³Peize tingruikeu mak ra hang tinggîm I ne kebanam’ndibe luage zai kedeirei ge heriâm hang tîngkau, zai a gu ziemmename peireige herarît wang ra I ne samdiegaibeibe luage,

¹⁴a ji gene kûpatkaime a gume bau ne kecheiluîtewkeu ze kellum ze achu peu ze penui kesiabe ’mpuî gene helatwang bei zai â, I ne tinggîm ’mbene seu lu penui gu hemui lun gai ze penui gu heram teleu’mmi gai dai gu lei.

¹⁵Chunage aipau bâm gene ningnui ne kellumbeibe kuâ ge I ne a mik rakpat kai ze a kun ’ndualie gai ze bam gu lei.

¹⁶Chunage betingbeta aipau ki ge peize a ji bam bam ra hang aipau ki ze I ne kelâng gai lu ze tew’nchi gai de lei; pehî leine ge chige a mik benai a lung bam bam gu lei.

¹⁷Zai nang du ning peu Dabidbe tat gum ze a masuage tatchi ze I ne ningchu samdiegaibe leine tew ze a gu hingde rawdiakkaibe ramme benai a gu hingde tewgaibe ramme nang ne reîchi dizai â

¹⁸I ne ning peu Dabidbe dage samhat kai ze, ‘Israelme peireige samramrabe kau hang ziemmena pat bam gu lei,’ ze acheu sagai’ndibe luigum ze, I ne ning gu heguang-bamrak ze tew’ntip kai gu lei.

¹⁹“Kane nang ne tat’mbia ze a gu hingde rawdiakkaibe ramme benai a gu hingde ramme, I ningchu peigaibe, sâu nan ze kêdabe hera ramme guâ ’nggua ze penui je kellum ze bam dizai â

²⁰ningnui je I peigaibe heram gene I ne ningnui je lupat ’ndu lei; zai a ji gene tew’nchigaibe aipau ki ze I ne a mikngau gene lutua ’ndu lei; zai ziemmena leine ruage aize tei’nda ze teisa bam ra I ne tew gai gu lei.

²¹Zai ai suanggai’ndibeki ge tatka’ngguakme leine ne ’nningdaulak ze, ‘’Ndaitew ze Tingwang ne aipau heram benai aipau ki peireige aigum ze tâtew gai lau?’ ze acheu gu lei.

²²Chidezai penui ne, ‘Ijipram gene penui je nguapatkaipeu penui peume Rapeu, Tingwang je penui ne sâu gai nan ze kêdabe hera ramme je ’nggui ze penui je kellum ze penui guâ ’ngguadibe ziegene de lei; chipauziegene penui peireige ai kesiabe leine pa ne pei gai bei de lei,’ ze acheu gu lei,” ze kacheu de lei.