Read Zeme Naga 2 KRONIKIL 8 Bible Online

2 KRONIKIL 8 - Zeme Naga bible

2 KRONIKIL 8

¹Solomonbe ne kum ’ngkai lung gene Tingwang ki benai pe ki hang tewbe hetûnwang dege,

²pechu Hurambe ne namdi ramme peigaibe ze Solomonbe teleu’mmiwang dai lu ze, chige Israelme je lung ra kai de lei.

³Zai Solomonbe ne Hamath-zoba ge tat ze pa ne chize lu ’ndi de lei.

⁴Hênamkang ge pa ne Tadmor namdi tew gai de lei, zai Hamath ge kerua kairabe bâm hang namdi ramme tew gai de lei.

⁵Zai pa ne ’Nreibe Beth-horan benai ’Ngkangbe Beth-horan du tew gai zai namdi ramme chige kerie ramme, kemui ramme, zai ’ngkamcha kedibe ramme kai ze,

⁶zai Baalat benai Solomonbe gu kerua kairabe namdi ramme, zai pe gu timriang zai hekunchingchuame bamrabe namdi zai Jerusalem benai Lebanon zai pa ne kaheguangberam leine ge tew’ntiprip kai de lei.

⁷Israelme makme Hethme, Amorme, Perizme, Hibme, Jebusme ’nsakkaidiakme,

⁸heram lungge, penui chângge penui chaname ’nsakkaibeime Israelme ne tewchatmaktaime, aime je Solomonbe ne kebang hang chui gai bei de lei, nemai riâ du penui acheu larei lei.

⁹Kane Israelme je â Solomonbe ne pe gu tâ tew ra kebang hang chui gai mak lei; penui je â hereikang hangge gut ra, pe gu tâ-muipuabe tâ tew ra, zai pe gu timriang ramme benai pe gu hekunteime peireige besuitewme hang kai bei de lei.

¹⁰Zai aime bau ze heguang Solomonbe gu tâ-kedibe tewme baudime peireige rezietei ze tâtewme ziemmena haî na ze rengeume bau de lei.

¹¹Solomonbe ne, “Tingwang gu hingdebung wanggaibe bâm ze â ka’nchibe changbe ziegene Israelme gu heguang Dabid ki ge a nâu bam ra mak lei,” ze pa ne kacheube luigum ze, pa ne Pharaobe na heleu’mpui je Dabidbe gu namdi gene pe nâu ki hang pa tewgaibe ki ’mbe pechu nguahang gai bei de lei.

¹²Chidadege Solomonbe, pa ne namsûng ge Tingwang gu herâtewbe-kaira tewgaibe peirei gene Tingwang hangge rûkambe-râtew gai de lei,

¹³’ntakbambe mai ramme, keuhâ mai ramme, zai patingkum lungge kahengîbe zat ramme kechum—’nduihîkaimakbe tingku-ngi, ’ntakkak-ngi zai hetiam-ngi gu herâtewbe ramme patingnai’nsangne tew ra ka’nnangbe luigum zeu.

¹⁴Pe peu Dabidbe ne hingde tewgaibe luigum ze pa ne tingkume tâtewrabe hangge ’nzipâng gai zai Lebime, penui getoabe leutew ze tingkume patingnai’nsangne tâtew ra bambe ge tâtewrabe hangge ’nzipâng gai zai kemuireîme ne kemui gechâm-châmbe ramme ge bamrabe hangge ’nzipâng gai de lei; aigum tewrabe hangge Hera gu ziemmena Dabidbe ne samdie gai bei dadegeu.

¹⁵Mâ-mâ deu leine ge benai kerua pemîhungbe reîbe lam ge heguang ne tingkume benai Lebime je samdiegaibeibe gene penui tewkeli mak lei.

¹⁶Tingwang ki gu pedimchukâng kaibe mai gene tewkamgaibe riâ chang ze Solomonbe gu tâtewbe leine aigum ze tewtat bam de lei, chigum ze Tingwang ki tew kam gai lu de lei.

¹⁷Chidadege Solomonbe Edomram ge sungkling kung gene Ezion-geber benai Eloth ’mbe tat ti de lei.

¹⁸Dadege â Hurambe ne hedui’nneikuak ramme pe guâ ka’ngguame dagezene pe dage lang gai de lei, zai tâka’ngguame ze sungkling ge tatkedeubamme bau lei, zai penui ze Solomonbe gu tâka’ngguame je nguakangkattew ze Ophir ’mbe tat ti de lei, zai chigene gechâk talent haî medai ze rengeu lu lu heguang Solomonbe tailam teiwang gai bei de lei.