Read Zeme Naga 2 KRONIKIL 9 Bible Online

2 KRONIKIL 9 - Zeme Naga bible

2 KRONIKIL 9

¹Zai Sheba gu heguangpui ze Solomonbe pe ji dibe rasam seu lu dadege â pe dage bamme ziemmena betâudime je ngua lu zai perîmyibe reheumoîne, (hegimung) zai gechâk benai tingchu pemîhungbe misongga put-hu ramme ne pung lu, pechu sam gechukbe ramme zene kedak ra Jerusalem ge wang de lei. Solomonbe dage pa wang dadege pe lung ge kebambe leine pechu salia gai de lei.

²Dadege â Solomonbe ne pe gu sam ka’nneube ramme leine ze pechu salia’nchichiak kai ze kak kam gai bei de lei.

³Zai Solomonbe kaningchingbe, pa heki tewgaibe,

⁴pe gu mâ-teube-kaira ge teurabe hetak bambe, pe gu saibe ramme ka’ntaube, zai pe guâ ka’ngguame bambe, zai penui paîni kaibe, pe piak puame, zai penui paîni zai Tingwang ki ge pa ne rûkambe-râtewbe airamme bambe tak leine Sheba heguangpui ngau dadege pe suî ga gai di de lei.

⁵Zai pa ne heguang je, “A ram gene I ne ning rasam benai nang kaningchingbe rasam seube ze peling de lei,

⁶kane I ne wang ze a mik sing ne ngau mak tâne â, hepâu sam ze I ’nnum’mmi mak bam de lei; zai pie le lau, nang ningching-kadesangbe rasam pa’mpi riâ du achu salia gai mak lei; ning rasam ze I seube peirei gene nang â ’ngkeukia de lei.

⁷Ning nâu ramme â penui paurega de lei! Aize ning tâ ka’ngguame ning suage ge sap ze nang kaningchingbe rasam seu bamme â penui paurega de lei!

⁸Tingwang ning Rapeu ningchu ’nchâ ze Tingwang ning Rapeu hangge heguang hang heguang-bamrak ge ningchu tei’ntaugaipeu je peize toa bam lau! Ning Rapeu ne Israelme je hung ze betingbeta penui je teichu gai ze bamrabe ziegene nang ne penui peireige peling benai katelingbe gene tâtew ra, penui peireige pa ne ningchu heguang hang sum gai bei de lei,” kacheu de lei.

⁹Chidadege â pa ne gechâk talent haî kat ze ’ngkai, zai perîmyibe reheumoîne benai tingchu pemîhungbe ramme misongga ze heguang je pei gai bei de lei. Heguang Solomonbe je Sheba gu heguangpui ne reheumoîne peibe gumbe perîmyibe reheumoîne kêdabe ga lei.

¹⁰Chipau peireige du Hurambe gu tâka’ngguame benai Solomonbe gu tâka’ngguame, Ophir gene gechâk teiwangme ne algumching benai tingchu pemîhungbe ramme teiwang de lei.

¹¹Zai algumching zene Tingwang ki gu ’mpuî pichaî sat hang, heguangki hang zai ’nrabung heleu tewchime tei ra hang heguang ne kateleu de lei; besua’ngka ge â Judaram ge chigumbe zat ramme ngau mak lei.

¹²Zai heguang Solomonbe ne Sheba gu heguangpui je pa ne luneibe leine heguang dage pa teiwangbe suadu kie ze pa ne kiebe leine pechu pei gai bei de lei. Dadege â pe kumme je ngua lu pe ram ’mbe pa helatwang dai di de lei.

¹³Zai kum kat ge Solomonbe dage gechâk wangbe riak ze talent haî seruk ze riakseruk ze seruk lei,

¹⁴chipau peireige helîkahedetme benai kerua zuame ne du teiwang de lei; zai Arabia gu heguang ramme benai heram gu laksaibe ramme ne du Solomonbe dage gechâk benai gepût teiwang gai lei.

¹⁵Heguang Solomonbe ne gechâk lualube ne hinggei kedibe haî na chiam gai de lei; hinggei kat tewbe ge gechâk hekilube shekel haî seruk gut ti de lei.

¹⁶Zai pa ne gechâk hekipatlube ne hinggei kat tewbe ge gechâk shekel haî chum gut ti de lei; zai chiramme ze heguang ne Lebanon hênamkang ge Heguang ki bambe ge kai de lei.

¹⁷Heguang ne heguang-bamrâ du hepuagim ne chiam gai lei, zai chize gechâk ka’nchibe dui ne zuâlik kai lei.

¹⁸Heguang bâmra ge desua seruk, zai gechâk ne tewbe pîchaîra tewhelakgit kai lei, zai bâm gu kena lam ’mbia ge mi ba ka’ngkûmbe-ra bam lei, zai mi ba ka’ngkûmbe-ra hela ’mbia ge duilui kena sapbe luî tew gai lei,

¹⁹chige duilui kereu ze kena sapbe luî tew gai lei, desua seruk kaibe, betû ’nsangne ge duilui luî kat-kat kai lei. Heguangram mâ-mâ ge mâdau du aigumbe ze tewpat kai mak rei lei.

²⁰Heguang Solomonbe sakbe piak leine gechâk ne tew lei, zai Lebanon Hênamkang ge heguang ki bambe lungge heli ramme leine gechâk ka’nchibe ne tew lei; Solomonbe ting ge gepût ze â mâ-hang du chak kai mak lei.

²¹Hurambe gu tâka’ngguame ramme je ngua lu ze heguang gu dui’nneikuak ramme Tarshis ’mbe tat ze bam lei; kum chum ge lua kat â Tarshis gu dui’nneikuak ramme gene gechâk, gepût, hepuagim, gepie, wûengruî ramme teiwang ka’nsui lei.

²²Chigum ze heguang Solomonbe ne keheube benai kaningchingbe lam ge kedeirei heguangme leine suadu yi lang di de lei.

²³Dadege â Hera ne Solomonbe je pe lung ge kaningchingbe kaibeibe ’ngking ra kedeirei gu heguangme leine ne Solomonbe je hedau ra peu di de lei.

²⁴Penui ’nteumena ne kum’nsangne ge kela, gechâk benai gepût, kerua ramme, paîni ramme, Mur, perîmyibe reheumoîne zat ramme, hekun ramme zai hekunmerângne ramme pe gu-gu misongga teiwang-wang de lei.

²⁵Solomonbe ne pe gu hekun ramme benai hekuntimriang ramme kairabeki hangge pe gu hekunki chang medai bam lei, zai pa ne timriang kiebe namdi ramme ge benai Jerusalem ge heguang dage hekunteime ziemmena chang kereu-ze-kename je kai de lei.

²⁶Zai Euphrates gene Philistiaram zai Ijipram ’nrai riâ ge heguangme bamme leine peireige pa ne samram ze bam de lei.

²⁷Zai Jerusalem ge tingchu bambe riâ gepût ne bam ra, zai Shephela ge ’ndutchî kiebe riâ kedarching ne bam ra heguang ne tew gai bei de lei.

²⁸Zai Ijipram gene benai heram ramme leine gene hekun ramme Solomonbe hangge ’mputwang ze bam de lei.

²⁹Chunage Solomonbe ne tâtewbe bepîbang gene chu ze betun riâ changbe gu rasam kêdabe ramme ze kemeu’mpeu Nathanbe rasam rawgaibe ge benai Shilo’mpeu Ahijabe gu kemeu sam rawgaibe ge zai Nebatbe na Jeroboambe deu ge kemeu’mpeu Iddobe keliâbe ngaube rasam rawgaibe ge chiramme raw gai mak ti lau?

³⁰Solomonbe ne Jerusalem ge Israelme leine peireige kum hedai samram gai de lei.

³¹Zai Solomonbe pe peume dage jeikeu gai di de lei, zai pechu â pe peu Dabidbe gu namdi ge bai gai bei de lei; dadege pe na Rehoboambe ne pa kelei ge kaheguang de lei.