Read Zeme Naga EZRA 1 Bible Online

EZRA 1 - Zeme Naga bible

EZRA 1

¹Persiaram gu heguang Sirabe ne heguangsapbe raîlangbe kum ge Tingwang gu sam Jeremiabe mui gene sagaibe tewpui gai le ra hangge, pe gu heguangram leine ge rangba gai ze leisi rawkeu gai ze kiâliagairabe hanggene Tingwang ne Persiaram gu heguang Sirabe lung tew’nrak kai bei de lei:

²“Persiaram gu heguang Sirabe ne acheu ze rang lei: Tingwang, Tinggîm Rapeu ne heguangram ramme leine achu pei gai bei de lei, zai Judaram ge bambe Jerusalem ge pe ki hang tew gai ra pa ne achu rang gai de lei.

³Pe gu ziemmena leine ruage pe gu kau dage â, pe dage peibe Hera ne nguada lau, zai Judaram ge bambe Jerusalem ge peize tatchu lau, zai Israelme Rapeu Tingwang ki peize tew’nsapchu dai zu lau— pa â Jerusalem ge bambe Hera lei;

⁴zai ringpatme leine â, ’ndai-dai ge pa rêu ze la mei be ge peize pa bambe bâm gu ziemmena ne gepût benai gechâk, merua ramme benai kaurui ramme ’ngngâ gai be lau, chipau peireige du misuiyibe kela ramme Jerusalem ge bambe Hera ki hangge peize ’ngngâ gai lau,” kacheu de lei.

⁵Chidadege â Judabe benai Benjaminbe kichîngme ruage besuitewme ramme, zai Tingkume benai Lebime, zai Jerusalem ge Tingwang ki tewchurabe hangge tat ra penui je tew’nrakkaibeime leine zuachu di de lei;

⁶zai penui ngualung ze bamme leine ne ’ngngâ ze gepûtli ramme, gechâk merua ramme, kaurui ramme, zai merua pemîhungbe ramme, chipau peireige du ’nta peipatkaibe kela ramme misongga ze pei gai bei de lei.

⁷Heguang Sirabe ne Tingwang ki gu heli ramme Nebukadnezzarbe ne Jerusalem gene sut-tat lu pe gu hera ramme ki ge kai’ndibe ze du teipat kai de lei.

⁸Persiaram gu heguang Sirabe ne rangkâng teipeu Mithredethbe ba ge airamme teipat ze rezie pei gai bei dege pa ne Judame gu samrampeu Shes-bazzarbe dage seipatkailia de lei.

⁹Zai periak ramme ze â aize de lei: Gechâk’ntui chang kat, gepût ’ntui chang kat, mâ-perîmyibe ka’ntaube bung ’ngkai ze sekui

¹⁰gechâkkuak himreu, gepûtkuak chang na ze haî medai ze kereu, zai kêdabe heli zat ramme chang kat;

¹¹gechâk benai gepûtli ramme leine ze â chang mengeu ze haî medai ze riakseruk ze sekui lei. Airamme leine ze kebang nîmtattime je Babilon gene Jerusalem ’mbe nguahang kadaibe ge Shes-bazzarbe ne teihang de lei.