Read Zeme Naga EZRA 3 Bible Online

EZRA 3 - Zeme Naga bible

EZRA 3

¹Hekêu pasenabe wangchang dadege, zai Israelbe name â namdi ramme ge bamdibe ting ge, Jerusalem ge ’nteumena lungkat-suikattew ze wangka’ndui de lei.

²Chidadege Jozadakbe na Jeshuabe ne pe kangme tingkume je ngua lu, zai Shealtielbe na Zerubbabelbe benai pe kiduîme je ngua lu ze tâtew ra zuachu de lei, zai Hera gu ziemmena Mosabe gu hingde ge rawgaibe luigum ze rûkambe-râtew ra hangge penui ne Israelme Rapeu gu herâtewbe-kaira tew gai de lei.

³Chige lungbe heram ramme deiname je penui hingbe ziegene herâtewbe-kaira ze pebamrabe ge kai lu, chige Tingwang dage rûkambe-râtewbe ramme hechua hegî peipat kai ze bam de lei.

⁴Zai rawgai’ndibe luigum ze hetiam-ngi penui reibam de lei, zai nai’nsangne ka’nnangbe riak hingde-sie gene bambe luigum ze nai’nsangne rûkambe-râtewbe peipat kai de lei,

⁵zai chipau chângge sau mak ze rûkambe-râtewbe ramme, hekêu-tenang ge peipatbe ramme, zai Tingwang gu riagai’ndibe hengi ramme, zai ’nteumena ne misuiyibe kela Tingwang hangge peigaibe ramme tewtat bam de lei.

⁶Pasenabe kêu gu naimikpui raîlangbe mai gene Tingwang hangge rûkambe-râtewbe penui peichu di de lei. Kane Tingwang gu kellumki-pung penui ’ndamchu gai mak bam rei lei.

⁷Dadege tingchu tâ tewme benai heching tâ tewme je rangkâng penui pei gai de lei, zai Persiaram gu heguang Sirabe ne peipatkaibe luigum ze sungkling ’mbe Joppa ge kedarching teiwang gai ra Sidonme benai Tirame je penui ne teu ze sakrabe benai taudui ramme pei gai bei de lei.

⁸Chunage Jerusalem ge Hera ki ge penui wanggaidibe pakenabe kum, pakenabe kêu ge Shealtielbe na Zerubbabelbe zai Jozadakbe na Jeshuabe ne penai puiname tingkume benai Lebime, zai kebang changbe gene zuapat ze Jerusalem ge wangdime leine je ngua lu tâtewputchu de lei. Penui ne Lebime kum ’ngkai benai bepeirei tattibe kau je Tingwang gu heki tewbe tâ ze reî ra ling gai de lei.

⁹Zai Jeshuabe benai pe name zai pe kiduîme, zai Kadmi-elbe benai pe name Judabe name ne Henadadbe benai Lebime, zai penui name benai penui kiduîme je nguaherua lu ze Hera ki ge tâtewme je reî de lei.

¹⁰Zai hekitewme ne Tingwang gu kellumki gu pedimpung kai dadege tingkume penui puâ kai lu ze hegeîluîkie ramme tei lu zuapat te lei, zai Lebime, Asapbe name â Israelme gu heguang Dabidbe ne geteiliabe ramme luigum ze Tingwang je toa ra ’ntoî ramme tei lu zuapat te lei;

¹¹zai heleutewkak ze, Tingwang dage getoabe benai hesuiyibe sam pau gai ze, “Pa â yi lei, Israelme hangge pa hungka’ntipbe â, betingbeta bam bam daseu,” ze kacheu de lei. Zai Tingwang ki gu heki pedimpung kai’ndibe ziegene penui Tingwang je toabe luage ’nteumena ’ngkiak-kadesang de lei.

¹²Kane misonggame ne penui suigut ne ’nrungkeleulia ze bam sede, tingkume benai Lebime zai penui peume kiria ge bepeîchangme, gechîngme heki tewgairaibe ki ngaulume misonggame ne aipau ki gu pedimpung kai’ndibe ngau gai lu dadege hap ze bam di de lei;

¹³chidadege â baudime kehapbe kuâ ramme zene penui suigut ne ka’nrungbe kuâ zat ramme ziemmena ramme ne seupatchi ta di de lei, baudime ’nrungkeleulia bambe kuâ kedeu ’mbene seu di dadegeu.