Read Zeme Naga EZRA 4 Bible Online

EZRA 4 - Zeme Naga bible

EZRA 4

¹Hesangme ram ge kebangchangbe gene helatwangkadaime ne Israelme Rapeu Tingwang hangge kellumki tew la de lei be Judabe benai Benjaminbe teureime seu lu dege,

²Zerubbabelbe benai penui peume kiduîme ruage bepeî changme dage penui wang lu penui je acheu sa ze, “Heki tewchube tâ anui benai ningnui tewherua kei lei; ningnui gum ze anui du ningnui Rapeu je kakellum daseu, zai anui je aige nguawanggaipeu Assiria gu heguang Esar-haddonbe ting gene anui â pe dage herâtewbe peipat bambe luî de lei,” kacheu de lei.

³Kane Zerubbabelbe, Jeshuabe, zai Israelme kiria ramme ge bepeî changme ne penui je, “Anui Rapeu ki hang tewbe ge ningnui â anui hangge matâu hang ga lei; kane Persiaram gu heguang, Heguang Sirabe ne anui dage ranggaibe luigum ze Israelme Rapeu Tingwang ki hangge anui runne tew gu lei,” acheu bei de lei.

⁴Chidadege heram deiname ne Judame je penui lung tew’ngkeî gai de lei, zai heki tew ta ra kakehei de lei,

⁵zai penui tâtew ra ka’nningbe ze tewkebuak kai be ra penui ne geteiliachime je puîwang de lei, Persiaram gu heguang Sirabe ting gene chu ze Persiaram gu heguang Dariabe ne kaheguangbe ting riâ chang ze tewkebuak bam de lei.

⁶Zai Ahasu-erabe ne kaheguangbe ting, pa heguangchube pîbang ge, Judaram benai Jerusalem deiname peireige penui ne raw’nteurie gai de lei.

⁷Zai Artakserksezbe ting ge du, Bishlambe zai Mithredethbe zai Tabilbe zai penui kangme kêdame ne Persiaram gu heguang Artakserksezbe dage raw gai de lei; samkela ze â Aramme lad gene raw gai lu ze sam relad kai de lei.

⁸Hereikang pemuiteipeu Rehumbe benai leisirawpeu Shimshaibe ne du Jerusalem je saka’nsiabe sam heguang Artakserksezbe dage aigum ze raw gai de lei—

⁹Chidadege hereikang pemuiteipeu, Rehumbe, leisirawpeu Shimshaibe, zai penai kangme kêdame, samramme, laksaibe changme, tâ-muipuame, Persiame, Erek gu ziemmename, Babilonme, Susa ge lungme chize Elamme,

¹⁰zai reziechibe benai pengêudipeu Osnapparbe ne ’mputtuâ’ndime ze Samaria gu namdi ramme ge benai ’Nggeugiamram ge lung ze bamme heramzat leine ne rang gai de lei, zai chunage,

¹¹aize penui ne ’mputkaibe samkela de lei—“Heguang Artakserksezbe dage: ’Nggeuki ge Wîgiam ge ning guâ ka’ngguame dagene ningchu rechâ gai de lei. Zai chunage,

¹²“Ning dagene hang ze anui dage wanggaime Judame â Jerusalem ’mbe tat ti de lei be heguang ne peize chî le lau. Chipau hegeineibe benai kesiabe namdi penui tew’nsapchu dai la de lei; kerie ramme penui tewgetîng ze la de lei, zai bepung ramme teleugetîng ze la de lei.

¹³Chunage aipau namdi ze tewchu dai lu zai kerie ramme tew kam dizai â penui â ’mpuâ penui peirabe dam, zai penui hî gene chakpatkairabe ramme pei dai ra mak te lei be, zai heguang gu ’mpuâ ngaube ze peran-ga gai gu de lei be peize heguang dage ’nningtâu gai lau.

¹⁴Chunage anui â heguangki gu ’nchaî teu daze zai heguang kahelêube anui ngau ra bui mak daze, samkela anui ne lang gai ze heguang dage pau gai de lei,

¹⁵chidezai ning peume gu rawgaika’nduibe leisikuak gene kemêt ze pie’mmi gai le ra hangge zeu. Aipau namdi ze â ka’nggibe namdi, heguangme benai heram ramme je tewkahereube namdi, zai aigene heguangme je du tingkangrabe tak ’ndâ gene du kelungchu ka’nsui de lei be rawgaika’nduibe leisikuak gene ngaudau lu ze chî gu de lei. Chigumbe ziegene aipau namdi ze tew’nsia gai bei de lei.

¹⁶Aipau namdi ze tewchu gai dai zai kerie ramme tew kam dizai â ’Nggeuki ze Wîgiamram ge â nang heram ’nramdaichi lak ku de lei be heguang dage anui ne chiliâ gai de lei,” kacheu de lei.

¹⁷Heguang ne kakbe sam lang gai de lei: “Hereikang muiteipeu Rehumbe benai leisirawpeu Shimshaibe zai pe kangme Samaria ge benai ’Nggeuki ze Wîgiamram lungge bamme leine dage, desieyibe peize bam lau.

¹⁸“Zai chunage ningnui gu samkela anui dage langgaibe ze a suage kiâliâ’nchichiak kai de lei.

¹⁹Zai I ne samde tew gai bei ze kemêt ze peu gai de lei, zai aipau namdi ze â ’ndâgene du heguangme je ’nggi ra zuachu, zai aigene ka’nggibe benai heguangme je katingkangbe tewpat ka’nsuibe peupat kai de lei.

²⁰Zai ’Nggeuki ze Wîgiamram leine ge samramme, ’mpuâ, penui ne peirabe hedam zai heram ge tâtewbe gu ’mpuâ luteu ze bamme reziechibe heguang ramme ne Jerusalem peireige samram ze bam de lei.

²¹Chidaze chime je tew’ntau ’nde ra samde pei gai be lau, dezai I ne samde pei gai dai mak tâne aipau namdi ze tewchu dai mak ra hangge zeu.

²²Zai aipau deu ge ningkelam mak ra hangge chî’mmi le lau; ’ndaitew ze heguang lung tewhereu ra hangge tâtewka’nsiabe pat ra lau?” ze raw gai de lei.

²³Chidadege, heguang Artakserksezbe gu samkela ze Rehumbe benai leisirawpeu Shimshaibe zai penui kangme suage kiâliâ gai bei dadege â, kelua ze Jerusalem ’mbe Judame tailam hang lu penui je ’nchi-chine penui gu rezie gene tew’ntau ’ndi de lei.

²⁴Dadege Jerusalem ge Hera ki tâ tewbe ze sau gai di de lei; zai Persiaram gu heguang Dariabe ne kaheguangbe pakenabe kum riâ chang ze chipau tâ ze tew ta di ze bam de lei.