Read Zeme Naga EZRA 5 Bible Online

EZRA 5 - Zeme Naga bible

EZRA 5

¹Chunage kemeume, Haggaibe benai Iddobe na Zekariabe ne Judaram benai Jerusalem ge Judame bamme dage penui peireige bambepeu Israelme Rapeu ji gene kemeu sam rang gai de lei.

²Chidadege Shealtielbe na Zerubbabelbe benai Jozadakbe na Jeshuabe zuachu ze Jerusalem ge bambe Hera ki ze tewchu kadai de lei; zai Hera gu kemeume ne penai je nguatewka’ngngâ de lei.

³Chipau hî sing ge ’Nggeuki ze Wîgiamram gu laksaibe Tattenaibe benai Shethar-bozenaibe zai penai kangme ne penui dage wang lu acheu sa ze, “Châu ne ningnui je aipau ki tewchu ra, zai aize ’nranggailube tewkenui’nchi gai ra âzah pei bei lau,” ze kacheu de lei.

⁴Penui ne aize du ka’nneu de lei, “Aipau ki tewme ramme ji châu châu lau?” kacheu de lei.

⁵Kane penui Rapeu mik â Judame gu gechîngme peireige bam de lei, zai Dariabe dage sam rangchang mak tâne zai chigene aipau deu ge sam kakwang dai mak tâne penui je penui ne tâtew’ntau mak tai de lei.

⁶’Nggeuki ze Wîgiamram gu laksaibe Tattenaibe benai Shethar-bozenaibe zai pe kangme laksaibe ramme ’Nggeuki ze Wîgiamram ge bamme ne heguang Dariabe dage sam kela langgaibe ze aize de lei;

⁷penui ne pe dage paugaibe sam kela ge aigum ze raw gai de lei. “Heguang Dariabe dage, desieyibe leine peize bam lau.

⁸Judaram ge Hera dilangpeu ki ’mbe anui tat kai de lei be heguang ne peize chî gai lau. Tingchu kedibe ramme ne chize tew gai la de lei, zai heching ramme kerie ramme ge kua gai la de lei; aipau tâ ze ’nrî-desang, zai penui ba-tâ ’ntua-desang ze tewtat la de lei.

⁹Dadege anui ne chime gechîngme je sam ’nneu ze aigum ze salia gai de lei, ‘Aipau ki tew ra, zai aipau tâ ’nranggaibe tew kam kenuî gai ra châu ne ningnui je âzah pei gai bei lau?’ zeu.

¹⁰Nang chirabe hanggene penui ji ramme du penui je anui neu gai de lei, dezai penui ruage bepeî changme ji ramme rawkeu gai le ra hangge zeu.

¹¹Zai aize anui je penui ne kakbe sam de lei: ‘Anui â tinggîm benai kedeirei Rapeu guâ ka’ngguame bau lei, zai ’ndâge Israelme gu heguang peranchipeu ne tewchu gai ze tewzungaidiak’ndibeki ze anui â tewrechichu kadai de lei.

¹²Kane anui peume ne tinggîm Rapeu lumpum tewgai’ndibe ziegene aipau ki tew’nsia gai ze ziemmename je Babilonia ’mbe nîmtattipeu Kaldia’mpeu Babilonram gu heguang Nebukadnezzarbe ba ge pa ne penui je pei gai bei de lei.

¹³Acheusede Babilonram gu heguang Sirabe ne heguang changbe raîlangbe kum ge, heguang Sirabe ne aipau Hera ki ze tewchu dai ra hangge âzah pei gai bei de lei.

¹⁴Zai Hera ki gu gechâk benai gepût merua ramme Nebukadnezzarbe ne Jerusalem ge bambe kellumki gene lupat lu Babilonram gu kellumki ge teiwang ze kai’ndibe ze, airamme ze heguang Sirabe ne Babilonram gu kellumki gene lupat lu hangkat pe ji Shes-bazzarbe kacheupeu, pa ne laksaibe hang linggaibeipeu ba ge pei gai bei de lei;

¹⁵zai pa ne chipau peu je, “Aipau merua ramme tei lu Jerusalem ge bambe kellumki ge tat ze kai be lau, zai chipau pung geze peize Hera ki tewchu zu lau,” kacheu de lei.

¹⁶Chidadege aipau peu Shes-bazzarbe zene wang lu Jerusalem ge bambe Hera ki gu bepung dîmchube tâ tew gai de lei; zai chipau ting gene chuna riâ chang ze chize tâtew larei lei, zai chize tewkam mak larei lei,’ ze penui anui dage kacheu de lei.

¹⁷Chidaze, heguang ne yi de lei, zai â, Jerusalem ge Hera ki bambe tewrechichu dai ra heguang Sirabe ne âzah peipat kai bei run mei be heguang ki gu raw’nduigaibe gene peize peu gai ni lau. Zai aipau deu heguang ne ’nninggaibe tak ze anui dage peize chîchang gai dai lau,” kacheu de lei.