Read Zeme Naga EZRA 6 Bible Online

EZRA 6 - Zeme Naga bible

EZRA 6

¹Chidadege heguang Dariabe ne sam rang gai bei de lei, zai Babilonia ram ge leisikuak ramme kai’nduigaibe bâm, rawkeugai’ndibe leine kaibeki ge peu gai de lei.

²Zai Mediaram ge hekuînam Ekbatana ge aigum ze rawgaibe leisizui peudau de lei: “Rawkeugaibe sam.

³Heguang Sirabe heguang changbe raîlangbe kum ge, heguang Sirabe ne samria gai de lei: Jerusalem ge Hera ki bambe deu ge, peize chipau ki ze tewrechichu dai zu lau, herâtewbe ramme peigaibe bâm zai rûkambe-râtew ra teiwanggaibe bâm zeu; pehut ze sâu riakseruk zai pedit ze sâu riakseruk ra lei,

⁴chize tingchu kedibe kechum kua gai lu, zai heching ne sat kat kai dai ze tew ra de lei; heguang ki heubung gene lupat lu peize pemî hang â pei gai be lau.

⁵Zai Hera ki gu gechâk benai gepût merua ramme Nebukadnezzarbe ne Jerusalem ge kellumki bambe gene lupat lu Babilonram ’mbe teiwanggai’ndibe ze peize Jerusalem ge kellumki bambe ge teiwang gai dai ze, pebâm-bâm ge kai dai zu lau; chiramme ze Hera ki ge ningnui kai ra lei,” ze rawgaibe leisikuak zeu.

⁶Chunage chidadege ’nggeuki ze Wîgiamram gu laksaibe Tattenaibe benai Shethar-bozenaibe, zai ningnai kangme ramme ’Nggeuki ze Wîgiam ge laksaibe tewme ramme gau, chigene ningnui bam’ndeu de lau;

⁷aipau Hera ki tâtewbe ge peize tewkebuak ta lau; bepung sing geze Judame gu laksaibe benai Judame gu gechîngme ne aipau Hera ki ze peize tewchu gai dai zu lau.

⁸Chipau peireige du aipau Hera ki tewchudairabe hangge aime Judame gu gechîngme hangge ningnui ne ’ndaikau tew gai ra mei be deu ge du I ne samriakeu gai de lei; ’Nggeuki ze Wîgiamram ’mbene ’mpuâ meiwangbe, heguang ki ge ’mpuâ kai’nduigaibe gene aime je pei’nsangsiak kai ra, zai kelua ze pemî ka’nnangbe hangge peize pei’nsangsiak kai ra lei.

⁹Zai ’ndaikau ka’nnang mei be leine—getumseipoine ramme mei, kemei’nsei ramme mei, meli ramme mei ze tinggîm Rapeu dage rûkambe-râtew gai ra ’nnang zai â, zai Jerusalem ge tingkume ka’nnangbe luigum ze dekuîmeu, ’nchaî, wain, zai taudui mei ze ’nnang zai â—peize chize penui je patingnaigepat sau mak ze pei ze bam lau,

¹⁰dezai tinggîm Rapeu dage pe sui tewka’mmibe-râtewbe peigaichi le ra hangge zeu, zai heguang benai pe name keringbe hangge du kie gai lau.

¹¹Aize du I ne die gai de lei, mi-mige aipau samde peigai’ndibe ze tewkedat’ndibe kau je â, pe ki gene samprai kat tatpat lu, sumgailube ge teichu’nchie gai ra lei, zai pe ki ze keratum chang ra tew gai ra lei.

¹²Heguang ne mei nu baudime ne mei mige ne aipau samde ze tewkedat ra mei nune Jerusalem ge bambe aipau Hera ki ze tew’nsia ra mei ze pe ba ngiêpat ra ka’nningbe kau je â peize chige pe ji di ze bam ra tewgaipeu Hera ne tuâpat kai be lau.

¹³Chidadege, heguang Dariabe ne sam langgaibeibe luigum ze, ’Nggeuki ze Wîgiamram gu laksaibe Tattenaibe, Shethar-bozenaibe, zai penai kangme ze heguang Dariabe ne diegaibeibe tâ ze ’nrî ze tew de lei.

¹⁴Zai kemeume Haggaibe benai Iddobe na Zekariabe ne gecheu’nrakbeibe gene Judame ruage gechîngme ne heki ’nrang ze misongga tâtew’ntuabi-bi di de lei. Israelme Rapeu ne samdiegaibe luigum ze, zai Persiaram heguang Sirabe zai Dariabe zai Artakserksezbe ne diegaibe luigum ze penui ne heki tewbe tâ ze tew kam gai de lei;

¹⁵zai aipau ki ze â, heguang Dariabe ne heguang changbe paserukbe kum, Kena kêu gu hezie pakechumbe mai ge tew kam gai de lei.

¹⁶Dadege Israel name, tingkume benai Lebime, zai kebangtewtatbe gene helatwangkadaime leine ze hesuiyibe gene aipau Hera ki diepat’nchigaibe gu kahengî de lei.

¹⁷Aipau Hera ki diepat’nchigaibe ge penui ne getumsei haî kat, meli’nsei haî na, melipoine haî medai, zai Israelme leine hangge hemui-râtewbe pei gai ra hangge, Israelme riak luigum ze kemei’nsei kereu ze kena peipat kai de lei.

¹⁸Zai Mosabe gu leisikuak ge rawgai’ndibe luigum ze Jerusalem ge Hera guâ ’nggua ra hangge penui ne tingkume benai Lebime je pebau ramme benai besat ramme teichâm gai de lei.

¹⁹Railangbe kêu gu hezie kereu ze medai mai ge kebangtewbe gene helatwangme tat’ntuahengi reibam de lei.

²⁰Tingkume benai Lebime â penui runne herua lu ze hui’nchilube ziegene, penui â ka’nchibe chang di de lei. Chipauziegene penui ne kebangtewbe gene helatwangme leine hang, penui kangme tingkume hang, zai penui runne hangge du tat’ntuahengi gu melipoine tewchat kai de lei;

²¹Israelme kebang ge bambe gene helatwangme, zai Israelme Rapeu Tingwang je kellum ra hanggene heram gu ziemmename kahebâbe ramme gene perunne pechu teichâm lu ze Israelme dage heruagaidibe kau leine ne chize tew de lei.

²²Zai ’nduihîkaimakbe tingku-ngi ze hezie sena penui ne penui suiyi’nta ze kahengî de lei. Israelme Rapeu ne penui suî tew’ngngup kai bei, zai penui Hera ki tewbe ge peize Assiria heguang ne gugaihâ ra pe lung ze penui lam pa ne tei’nrei gai bei dadegeu.